Allen, die disen gegenwúrtigen^a) ansechent alder ho^erent lesen, kúnd ich her Amor von Lutterberg ritter vnd vergiche des offennlich an disem brieff, dz ich willenclich vnd mit gůtter vorbetrachtung nach miner gůter frúnnde vnd ander erber lúte ra^vt den erwirdigen gaischlichen frowen der a^eptissinen vnnd dem conuennte des closters vnnd des gotzhuses ze Maggeno^vw vnnd ir nachkomen habe ze kouffen geben recht vnd redlich den hof ze A^eschlikon, der min lehen waß von minen herren den graffen von Toggenburg vnd zwúschen des Kupfersmides vnd der Bo^eschen gůt von Wile¹ gelegen ist, vnd waß zů dem selben hof geho^ert, es syg mit wasen mit zwy mit holtz mit velde mit wysan mit ackern mit allen nútzen vnd gewonhaiten vnd mit allen rechten gesůchs vnd vngesůchs wisendes ald vnwissendes, als es min vordern an mich bra^vcht hand vnnd als ich den selben hof vnd waß dar zů ho^ert besessen vnd genossen habe her vntz an disen húttigen tag, den vorgenanten hof ze A^eschlikon mit den rechten, so vorgeschriben sta^vt, habe ich inen ze kouffende geben vmb sechs vnd vierzig marck silbers lo^etiges Costentzer gewa^eges vnnd bin ouch der gar von inen gewert vnd sind in minen redlichen nutz komen vnd bekert, als ich vergihe an disen^b) brieue, vnnd verzihe mich dar úber fúr mich vnd alle min erben vnd nachkomen gen der vorbenempten a^eptissinen vnnd gen dem conuente ze Maggeno^vwe vnd gen allen iren nachkomen aller ansprauch aller vordrunge alles schirms alles vszugs vnd alles rechtes gaischlichs vnd weltlichs gerichtes, da mit ich ald kain min erbe vnd nachkomen ald jeman andre von vnseren wegen den vorgenanten hof vnd waß dar zů ho^ert ko^endin ald mochtin angesprechen ald da mit wir wider disen vorgeschriben dingen komen ald getůn mochtin. Ich sol ouch des vorgenanten hofes vnd waß dar zů ho^eret der vorgenanten frowen vnd ir nachkomen recht wern sin nach recht ane geuerde ane allen ir schaden, ta^et ich des nit, wo vnd wye si mich danne dar vmbe geno^eten mugent, des sond si vollen gewalt han, es syg mit gericht ald ane gericht, vnd sol mich da vor nit schirmen weder gaischlich noch weltlich gerichte, vnd habe dis alles geta^vn vnd folfu^ert mit allen den worten wercken vnd geta^eten, so dar zů ho^ert ald geho^eren mo^echte nach recht vnd nach gewonhait des landes. Vnnd ze warem vnd offem vrkúnnde vnd sta^eten vnd ewiger sicherhait alles des, so hie an disem brieffe geschriben sta^vtt, gibe ich der vorgenante her Amor von Luterberg fúr mich vnd alle min erben vnd nachkomen der vorbenempten a^eptissine vnd dem conuente ze Maggenow vnd allen iren nachkomen dar úber disen brieff mit minem aigen insigel besigelten. Dis beschach vnd ist dirre brieff ze Maggenow geben, do man von Cristus gebúrt zalt drúzehenhundert ja^vr, dar nach in dem fúnf vnd drissgosten ja^vre, an dem na^echsten donstag nach sant Margreten tag.

Source Fulltext: Chartularium Sangallense VI, Nr. 3592, S. 214-215.