Wir Herman von gottes vnd des stůls gnaden ze Rôme besta^eter abt des gotzhus ze sante Gallen¹ || enbúten dem ersamen manne Martin von Zâggenhouen² lantrihter vf der Haide³ v´nsern frúntlichen grůs || vnd alles gůt. Wir tůn dir kunt, das wir vernomen haben, das der erwirdig herre abt Burkart von || gottes gnaden des gotzhus ze Kempten⁴ sie vor dinem geriht ge anlait vf die lúte vnd vf dú gu^eter, dú Ludwig sailig der Esel von v´ns vnd von v´nserm gotzhus ze sant Gallen ze lehen hatte, vf den mayierhof ze Gersunriet⁵ mit allen den gu^etern, dú ze Gersunriet sint, vf dú gůt zů dem Rúdlis⁶ vnd ze Alrichsriet^a)7, vf Hainrich Raissen, vf sin wib vnd vf sinú kint vnd vf a^ellú sinú geschw|stergit, vf sinen swâger, vf Laris wip vnd kint, vf des Spilmans wip vnd vf sinú kint. Darzů ist v´ns ouch kunt getan, vf dú vorgeschriben gu^eter vnd lúte sigent ouch Johans der Vnrain vnd Hainrich Râpper geanlait. Vnd darvmb senden wir v´nsern getrúwen lieben Johans den Meldegger⁸ fur dich vnd fur din geriht ze ainem gewissen botten von v´ns vnd von v´nserm vorbenemten gotzhus ze sante Gallen an v´nser stat, die selbun anlaitunge, dú vf dú vorgeschriben gu^eter vnd lúte genomen sint, ze versprechenne nah rehte, vnd bitten dich vlisklichen vnd mit ernst, das du den vorbenemten Johansen den Meldegger v´nsern wâren vnd gewissen botten an v´nser stat wider in die gewêr setzist, wan ouch wir aller mainlichen vmb dú vorgenemten gůter vnd lúte reht wellen tůn ane fúrzug, swa wir es dur reht tůn súlin. Vnd ze ainem waren vrkúnde der vorgeschriben dinge henken wir v´nser insigel an disen brief. Dirre brief ist geben ze Wîle⁹ in der stat, do man zalt von gottes geburt drúzehenhundert jâr, darnah in dem fúnfvnddrissegosten jâr, an sant Vrbans tage.

Source Fulltext: Chartularium Sangallense VI, Nr. 3583, S. 209.