Allen den, die disen brief ansehent^a) oder ho^erent lesen, kúnden wir abt Herman¹ von gotz || genaden und das kappitel gemainlich^b) des gotzhus ze sant Gallen sant Benedicten Ordens gele||gen in Kostentzer bistum, das wir mit gemainem rat und gůter vorbetrahtung in únserm kappitel des || úberain sigen komen, das wir dem hohgebornen man hern Walther von der hohen Clingen^c)2 ob Stain³ dem eltsten frigen und ritter habin die aigenschaft an der hofstat der cappellen ze Klingenzelle⁴ und des holczes und der rútinan und aines wislins, die darzů ho^errent und gelegen sint in der Sêhalden⁵ und da ainhalb anstosset junkher ůlriches des vorgescribenn^d) hern Walthers brůder holcz und anderhalb ůlriches und och ůlriches sines brůders sún⁶ holcz und da bedú undnan und obnan anstossent die zelgan des dorfes ze Manbúran⁷, und den zehenden halben úber den hof ze Morwilen^e)8, der hof des gotzhus ze Kalcherun^f)9 ist, dú aigenschaft únser und únser gotzhus reht aigen was, habin gegeben recht und redlich in aines rechten wehsels wise umb die aigenschaft der vogtay úber den hof ze Wengen¹⁰, der des gotzhus ze Wagenhusen¹¹ ist und den Stehelli^g) buwet, dú aigenschaft des vorbenemten von Klingen recht aigen was, dú sol nu únser und únsers gotzhus recht aigen sin, und sol er sin^h) von úns und únserm gotzhus ze rechtem lehen han an geverde. Und sol o^vch er die aigenschaft an der vorgedachten hofstat der kappelle und an den gu^etern, die hievor benemt sint, zů der hofstat han ze rechtem aigen an geverde iemerme als endrú die aigen, dú er het. Wir verzihen úns och bedú fúr úns und alle únser nachkomen an únsers gotzhus stat aller hilf, gaischlichs und weltliches gerichtz, damit wir, únser nachkomen ald únser gotzhus mo^ehti wider gevordron die eigenschaft nu oder hernach an den vorbenemten gu^etern an geverde. Und ist dis alles beschehen mit aller ordenung, offenung und mit namen mit allen dingen, dú darzů horton oder ho^erren solton, und als es kraft und maht hat und haben sol von gewonhait und von recht. Und des ze ainer sicherhait und offenemⁱ⁾ urkúnd henken wir únserú insigel an disen brief. Der wart gegeben in únserm vorgescribenn^d) gotzhus ze sant Gallen, in dem jar, do man zalt von gottes gebúrt drúzehenhundert jar und in dem sehsten und drissigosten iar, an dem nahsten^k) cinstag vor dem balme tag.

Source Fulltext: Chartularium Sangallense VI, Nr. 3612, S. 224-225.