Allen, die disen brief ansehent, lesent oder ho^erent lesen, tůn ich Johans von Littenhaid schultha^esse ze Wîle¹ kunt vnd vergihe || offenlich an disem brieue, das fur mich kamen, do ich ze geriht sas, die beschaiden tohtran Margrêt vnd Ita von Lo^emberg || mit dem êrbern ritter herr Hainrichen von Lo^emberg² ir vatter vnd bâten mich eruarn an gemainer vrtail, wie sú die || hofstat gelegen in der obrun vorstat ze Wîle, da des Ru^edlingers stadel vffe stât, vnd die zwên garten, die da hinder ligent, die ir aigen wâren, bringen môhtin in der êrwirdigen hant in gotte der a^ebtissenne vnd der frowan gemainlich des conuentes ze Ta^ennikon³ vnd wie sú sich der selbun hofstat vnd der garten entzîhen soltin, das es kraft hette nu vnd ouch hie nah. Do wart vor mir ertailet mit gesamneter vrtail, das sú das soltin vnd môhtin tůn mit vogt vnd mit fúrsprechen. Do namen sú den vorgenemten herr Hainrichen von Lo^emberg ir vatter ze vogt, der von reht ir vogt was, vnd Hainrich Lo^embergen in der Grůb⁴ ze fursprechen vnd entzigen sich mit des selben ir vogtes hant gûnst vnd willen der aigenschaft der vorgenemtun hofstat vnd garten vnd gaben sú vf frîlich vnd willeklich nah der stat reht vnd gewonhait ze Wîle der vorgenemtun a^ebtissenne vnd dem conuent ze Ta^ennikon gemainlich in allem reht vnd mit aller gewonhait, als sú die selbun hofstat vnd garten hattan gehebt vnd genossen vntz vffen disen hutigen tag. Vnd ist dis geschehen reht vnd redlich mit allen den worten vnd werchen, so darzů gehort vnd nôtdúrftig was von reht vnd von gewonhait. Vnd ze ainem wâren vrkúnde der selben dinge henk ich min insigel an disen brief. Wir die vorgenemten Margrêt vnd Ita von Lo^emberg veriehen ainer gantzer wârhait aller der vorgeschriben dinge, vnd won wir nút aigenr insigel haben, dauon haben wir v´nsern vatter vnd herren her Hainrichen von Lo^emberg gebetten, das er sin insigel henk an disen brief ze ainer sta^etun sicherhait der vorgeschriben dinge. Ich Hainrich von Lo^emberg ritter vergih ainer gantzer wârhait aller der vorgeschriben dinge vnd henk ouch min insigel an disen brief ze ainer merun sicherhait der selben dinge. Dis geschah vnd ward dirre brief geben ze Wîle in der stat, do man zalt von gottes geburtte drúzehenhundert jâr, darnah in dem ahtvnddrissegosten jâr, an sant Alexius tage.

Source Fulltext: Chartularium Sangallense VI, Nr. 3692, S. 282-283.