Ich graf Joh. von Hapspurg¹ kúnd allen den, die disen brief ansehend oder ho^errent lesen, das ich durch mins herren vnd vatters seligen graf Joh. von Hapspurg² vnd miner fro^vwen vnd můter Agnesen³ grefin von Hapspurg selen heil willen luter durch got vnd miner vnd aller miner vordern sele gesetzt vnd geordnet han mit gůtem wolbedachtem willen vff min múli, die gelegen ist in der statt ze Rappreschwil⁴, zwen mút kernen geltz, die ein jeklicher, der denn die múli hat, jerlichen richten vnd weren sol den herren ze Rúti⁵ Wisses ordens in Cost(enzer) bistům ze herpst an sant Matheus tag dex^a) zwelffbotten, vnd súllen darumb die vorg(enanten) herren von Rúti jerlich began erwirdikhch vnd loblich mins vatters vnd můter jarzit der vorg(enanten), der jarzit man jetweders sunderbarlich began sol, als si vallent, vnd aller ir vordern, vnd also dz man den herren ze Rúti des tages, so si die jarzit begand, visch vnd win geben sol, als vil vnd ein mút kernen kumpt, ze jetwedrem jarzit, vnd sol man inen das geben gemeinlich v´ber tisch des selben tags, so si die jarzit bega^vnd. Ouch han ich mir selben die fryheit vnd das geding vsbehept, das ich oder min erben, ob ich enwere, die vorg(enanten) zwen mút kernengeltz ledigen vnd ablo^esen mugen mit sechs march silbers Zúricher gewicht, wenn es v´ns fu^egt. Ouch sol man wússen, dz ich wil vnd mit namen gesetzt han, beschech das ich oder min erben das vorg(enant) gelt ab der eg(enanten) múli losten, dz denn die herren von Rúti mit dem selben gůt kouffen sond zwen mút kernengeltz vff eim gewissen gůt, also das inen die selben zwen mút kernen gemeinlich ewenklich dienent v´ber tisch desselben tages vnd in aller der wise, als vorg(eschriben) stat. Man sol ouch sunderbar wússen, wenn ich oder min erben die eg(enante) gúlt ab der múli losten, wo denn die herren von Rúti nit bewisen vnd offenbar gemachen mo^echten innrent jars frist mit vier erbern mannen, die denn des ra^vtes ze Rappreschwil sind, das si dasselb gůt an geleit haben, als vorg(eschriben) ist, so súllen denn die herren von Rúti mir vnd minen erben schuldig sin wider ze geben die eg(enanten) sechs march silbers, vnd sol ich vnd min erben dannenhin jemer ewenklich ledig sin von den herren von Rúti, vnd sol denn die gúlt gentzlich ab sin von des wegen, das si ir eg(enant) nútz versumpt hand. Vnd wenn die herren von Rúti die jartzit nit begand vnd ouch nit vsrichtent, als vorg(eschriben) ist, so sol ouch das gelt ledig sin. Des alles ze sta^etem vrk(únd) so henk ich der vorg(enant) graff Joh. min eigen insigel fúr mich vnd min erben an disen brief. Der geben ward vff der burg ze Rappreschwil an sant Agnesen tag anno domini M°CCC° XL°.

Source Fulltext: Chartularium Sangallense VI, Nr. 3731, S. 309.