Allen dien^a) disen brief sehent oder ho^erent lesen, kúnden wir Berenger von Landenberg ritter, Růdolf von Lindenberg || vnd Johans von Múnchwile, das wir dur got vnd dur liebi, die wir ze dem kloster haben ze Thennikon, nach dem || vnt Walther von Bichelnse vf gab v´nserm herren von gottes gnaden apt Herman ze sant Gallen ein halbe múli, der man || sprichet ze Mose, an des vorgenanden klosters stat, als getrúwe trager enphiengen vnd enphangen haben, swas der vorgenande Walther von Bichelnse ze der vorgenanden halben múli ze lehen von sant Gallen hatte vnt vf gab, als vorgeschriben ist, vnd veriehen o^vch, das wir ze der selben halben múli nicht recht haben anders, denn als wir hie vor geoffent vnd^b) veriehen haben, vnd^b) enso^elen wir noch v´nser nachkomen das selbe gotzhus ze Thennikon an der vorgenanden halben múli niemer betru^eben noch enkein wis besweren vnt súlen dem selben kloster ze Thennikon die vorgeschriben halben múli ze Mose tragen vnd^b) schirmen ân alle geuerde als getrúwe trager. Beschehe o^vch das, das v´nser herre der vorgenande apt oder sin nachkome die vorgenanden halben múli dem kloster ze Thennikon vertegon wolte vnd wir dar zů notúrftig wêrin oder nútze ze vf gebenne ald ze andren sachen, wa das vnder v´ns allen drin einer tůt an ir alr stat, der sol des gewalt han, vnt hat das kraft vnd macht, als ob wir es alle tetin. Wir vnt v´nser nachkomen súlen o^vch mit vf gebenne vnd^b) mit andren sachen tůn vmb die vorgenanden halben múli, als des v´ns bittent vnd^b) můtent dú ebtischin vnt der conuent des klosters ze Thennikon. Vnd das dis war si vnd stete belibe, so henken wir v´nser insigel an disen brief ze einem vrkúnde aller der dinge, so vor geschriben stat, vnd geben inen disen brief also besigelten. Dirre brief wart gegeben, do man zalte von gottes gebúrte drúzehenhundert iar, dar nach in dem vierzegosten jare, an sant Peters vnd sant Pauls tag der zwelbotten^c).

Source Fulltext: Chartularium Sangallense VI, Nr. 3751, S. 330.