Allen den, die disen brief ansehent oder ho^erent lesen, kúnde ich her V^olrich von Kienberg ritter vogt ze Rapreswille¹ vnd gemeinlichen wir der rat der selben stat, der || nam hie nach geschriben ist, daz fúr v´ns kamen her Johans dechan kilcherre ze Rapreswille, her Herman pfrůnder ze Walde², her Růdolf ze dem Sewe keller des klosters ze Rúti³ || ze des selben ir klosters wegen, brůder Johans Banwart vnd Berchtolt sin brůder, vnd veriahen offenlichen, daz die geistlichen lútte der abt vnd der conuent des vorge||nanden klosters ze Rúti ein ansprach hatten an brůder Johansen Banwart vorgenanden vmb dú gu^eter, dú sú im verluhen hatten nach der brieue⁴ recht, die er von in hat, dú gu^eter ir recht eigen sint, daz erste heisset das Ober Aspe⁵, daz ander das gůt ze Kempten⁶, daz Růdolf Salkenbacher bût vnd giltet fúnf stûk, daz drit daz gůt vf dem Etzel⁷, daz da heisset Legbuchs⁸ vnd giltet vier stuk an molken, vnd wan die vorgenanden teil . . der abt vnd der convent ze Rúti ze ir des selben klosters wegen vnd brůder Johans Banwart sto^essig wurden in der vorgenanden ansprach, dar vmb so kamen die beid teil des selben stoss wol bedacht vnd mit rat vf die vorgenanden her Johansen den dechan vnd hern Herman von Wald vnd verbůnden sich beidenthalb, den satz stet ze hann mit einer genanden bůs, den sú beidenthalb behalten hant nach ir vergicht, die selben her Johans der dechan vnd her Herman von Wald namen vf sich den vorgeschribenn stôss nach beider teil bette vnd willen vs ze richtenn nach min vnd nach recht, also daz sú gewalt hettin, ein zů innen ze nemen, er wer pfaffe oder ley, des rat sú hettin, ob sús bedorftin, vnd daz och die sach vf innen belibe, dar nach do sich her Johans der dechan vnd her Herman von Wald vorgenanden bedachten, do gaben sú tag beiden teiln vs ze sagenn vnd vs ze richten die vorgenanden sach nach dem als sú sich erkanden, vnd kamen beid teil vnd och Berschi Banwart vorgenand vf den tag ze ho^erenn vnd ze volleistenn, daz die vorgenanden her Johans der dechan vnd her Herman von Wald vs seiten vnd sich bedacht hatten, vnd gelobten vnd verbůnden sich beid teil brůder Johans Banwart vnd Berschi sin brůder vorgenanden mit gelerten eiden, brůder V^olrich Kistler, brůder Růdolf ze dem Sew vnd brůder Heinrich von Schafůsen⁹ ze ir klosters wegen mit zweintzig march silbers, dar vmb sú búrgen gaben her Herman von Wald vnd V^olrichen Rûssinger v´nser bůrger, stet ze hanne vnd ze volleistenn, wes sich die vorgenanden her Johans der dechan vnd her Herman von Wald erkanten vnd sú hiessen tůn in der vorgenanten sach, do seit der selb her Johans der dechan mit her Herman von Wald vs vnd hiess brůder Johansen den Banwart vnd Berschin sin brůder sich verziehen fúr sich vnd alle ir nachkomen an des vorgenanden brůder Růdolfs ze dem Sew des kellers ze Rúti hant ze sins klosters wegen der vorgeschribener drier gu^eter mit aller rechtůng vnd besitzung, so sú dar an hatten alder wanden han, vnd mit aller ansprach vnd vorderůng, die sú an die vorgenanden geistlichen lútte mo^echtin gew|nnen an geistlichem alder an weltlichem gericht alder an gericht vmb die selben gu^eter, vnd daz hant och sú getan nach ir vergicht. Dar nach hiess der vorgenand her Johans der dechan mit her Herman von Wald die vorgenanden brůder von Rúti an ir klosters stat geben jerlichen brůder Johansen Banwart zend siner wil ze rechtem libgedinge zehen mút kernen Zúrich mess ze sant Martis dult ze Rapreswille vsser irn kâsten, vnd were daz der vorgenand Berschi brůder Johansen v´ber lebti, so súln sú im geben fúnf mút kernen des vorge schribnen messes zend siner wil ze rechtem libgedinge, als da vor vnderscheiden ist. Swenne aber got v´ber sú gebút vnd sterbent, so sint in dú selben lipgeding alleklich ledig noch ensint die selben geistlichen lútte dú lipgedinge nieman fúrbasser schůldig ze gebenne, vnd sv´ln sú brůder Johansen vnd Berschin sim brůder ze warer sicherheit vmb daz lipgeding geben ir brief besigelt mit des abtes vnd mit des conventes insigel, daz hant och sú getan nach ir beider vergicht. Vnd ze warem vrkúnd vnd bestetůng aller dirr vorgeschribenn vergicht vnd richtůng do batten v´ns die vorgenanden teil brůder Johans Banwart, Berschi sin brůder vnd brůder Růdolf der keller ze Rúti, daz wir der vorgeschriben rat geben den vorgenanden geistlichen lútten dem abt vnd dem conuent vnd ir kloster ze Rúti v´nser brieue besigelt mit v´nser stat insigel, dz wir getan han nach^a) ir bett, als hie schinber ist. Des rates namen sint her Růdolf Trůchsesse¹⁰ ritter, V^olrich Růssinger, Heinrich Gamlistein, Johans Hassler, Andres Snepffo, Růdolf Brůnner, Johans Brůno, V^olrich Adolswiller, Arnolt Amman, Wernher Wisseling, Otto von Ranbach vnd Heinrich Lenzli. Dis geschach vnd wart dirr brief geben ze Rapreswille vor v´ns, do wir ze rat sassen, do von gottes gebúrt waren drúzechen hůndert jar, dar nach in dem ein vnd vierzigosten jare, ze vs gendem meijen. Alles, daz hie vor geschriben ist, veriehen wir offenlich her Johans der dechan vnd her Herman von Wald mit allem vnderscheid, als es da vor vnderscheiden ist, vnd ze offennen v´rkúnde vnd warer gezúgnúst der selben ding so henken wir beid v´nserú insigel an disen brief.

Source Fulltext: Chartularium Sangallense VI, Nr. 3775, S. 349-351.