Wir graf Johans von Habspůrg¹ tůnt kůnt fúr v´ns vnser geswistergit vnd v´nser erben allen den, die disen brief sechent oder ho^erent lesen, daz || fúr v´ns kam v´nser lieber her Johans der Gúller kilchher ze Rapreswile² in v´nser stat vnd gab vf an v´nser hant ledkelich mit bedachtem můt || drie jůchart reban, sint gúlegen vnder v´nser vogtey ze Steffe³ ob der kilchen an des Venden gůt vnd an die akker Johans von v´ricon⁴, vnd sint || erb lechen von dem gotzhus ze dien Eisidellen⁵ sant Benedictes orden, jerlichen dem selben gotzhus da von ze erb cinss zegebenne ein mút kernen Rapreswiler mess, dar nach důrch siner bett willen liehen wir im die vorgenanden drie juchart reban ze niessenne vnd ze habenne ze einem lipgedinge jerlichen v´ns da von ze gebenne zwen henschů, vnd wenne er enist vnd erstirbet, so haben wir im gůnnen willeklichen vnd frilichen důrch siner sell heil vnd trost zů^a) jůchart reban der vorgenanden, die er gefu^eget hatt nach sinem tode an den altar in der vorgenanden kilchen ze einer pfrůnde, der selb altar gelegen ist ze der rechten siten der kilchen vnd heiset sant Katherinen alta^er, die dritten jůchart haben wir willeklichen gůnnen frow Adelheiden siner tochter och ze einem lipgedinge ze niessenne, die wil si lebt, vnd wenne si erstirbet, so ist dú selb jůchart och ledkelich geuallen an den vorgenanden altar vnd die pfrůnde des selben altars, wer aber, daz dúselb pfrůnde so vil sich gebesseret hett, e dú selb jůchart reb dar an geuiel, daz v´ns vnd v´nseren rat ze Rapreswile du^echt, daz ein erber priester mit der selben pfrůnd wol vnd erberlichen leben mo^echt, so sol dú selb jůchart ledkelich vallen an den altar der vorgenanden kilchen, der da lit ze der lengen sitten vnd heiset sant Lawrencien altar, ein vrsprůng vnd ein an vang ze sine einer anderen pfrůnde, wir haben och dis vorgenanden drie jůchart reban gefriet, daz wir nút wellen, daz nů oder hie nach ieman dehein stúr oder ander dienst da von fordern oder nemen, och hatt er mit v´nserem willen vnd gůnst gefu^eget nach sinem tode alles sin gůt, es sie ligendes oder varndes, vnd sůnderlich alles sin husgeschirre bette vnd betgewant vnd wie daz husgeschirre genant sie, es sie lútzel oder vil, benemt oder vnbenemet, an die vorgenanden pfrůnde des altars sant Katherinen, dis alles loben wir fúr v´ns vnd v´nser geswistergit bi gůten trúwen ze trost vnd ze růwe v´nsers lieben herren vnd vatter seligen⁶ seil vnd alle v´nser forderen stet vnd vest ze habenne vnd hie wider niemer ze tu^enne mit worten mit werchen mit reten mit geteten noch mit deheinen anderen sachen, daz dis sůmen oder irren mo^echt mit gerichten oder an gericht, won ze fu^erderren vnd ze rattenne mit allen sachen, so wir wissen, so dar zů gůt sin můg vnd notúrftig, es sie fúrbasser mit briefen v´nserem insigel oder an brief, vnd daz dis alles war stet vnd vest belibe nů vnd hie nach, so haben wir graf Johans von Habspůrg disen brief offenlich besigelt mit v´nserem insigel fúr v´ns v´nser geswistergit vnd v´nser erben. Wir der rat vnd die bůrger gemeinlich der stat ze Rapreswile veriechen offenlich an disem brief, daz wir alles daz, so hie vor geschriben ist, gelobt haben bi gůten trúwen ze volfu^errenne mit allen dien stůken vnd artikeln, so hie vor geschriben stat, als och v´nser gúnediger herre graf Johans von Habspůrg gelobt hat ze tu^enne, vnd des ze einem offennen v´rkúnde so haben wir disen brief offenlich besigelt mit v´nser sta^et insigel. Dis búschach vnd wart dirre brief geben an v´nser frowen abende der liechtmiss, do man zaltt von gottes gebúrte drúzechen hůndert jar, darnach in dem zwei vnd vierzigosten jare.

Source Fulltext: Chartularium Sangallense VI, Nr. 3799, S. 369-370.