Ich Dietrich von Rúti¹ ein friio tůn kunt allen den, die disen brief ansehent oder ho^erent lesen, das ich || wol bedacht vnd mines gůten willen han gegeben dien geistlichen herren . . dem apte vnd . . dem conuent || des gotzhus ze sant Vrban² des ordens von Cytels in Kostentzer bistům luterlich dur got vnd dur miner || sele heiles willen zwen zehenden, die gelegen sint einer ze Vrsibach³ vnd der ander ze Vrwile⁴, dien man sprichet zů der Zimertu^ellen⁵, vnd ein malter kornes, daz daz gotzhus von sant Gallen git von irem zehenden, der da lit ze Rôrbach⁶, alle jâr, als daz von teiles wegen har komen ist zwischent dem vorg(enanten) gotzhus von sant Gallen vnd mir, vnd ist des ein mútte roggen, ein mutte weissen, zwen mútte habern, vnd han inen die vorg(enanten) zehenden gegeben fúr recht fri erbe von dem gotzhus von sant Gallen, vnd von dien man alle jâr git fúnf schillinge ze erbe zinse dem vorg(enanten) gotzhus, vnd han inen daz gegeben vnd geuertigot mit des kellers hant von Rorbach an des probstes stat von sant Gallen mit allem dem rechte vnd gewanheit des hofes von Rorbach, in den die selben zehenden ho^erent, vnd han inen och daz voluertigot mit briefen vnd mit willen des vorg(enanten) probstes von sant Gallen⁷, der da probst vnd phleger ist, vnd darzů mit des aptes briefen⁸ ze einer merer sicherheit. Ich han inen och die selben zehenden also gegeben mit dien gedingen, daz der herren von sant Vrban einer, der denne pytancier ist, die selben zehenden innemen sol vnd och die vier march geltes, die ich inen vor gegeben hatte, vnd daz ze einander samnen getrúwelich, vntz daz er dar vs als vil phenningen erlo^eset, daz man iechlihem herren gegeben mag ein kuglen vnd einen rok eins gůten berwers, vnd och als dike, als man daz erzúgen mag, darnach als daz korn denne gat, daz si alle jar older ze zwein, als mans denne erzúgen mag an alle geuerde. Teten si daz nit, so hant si mit irem gůten willen ein pene v´ber sich gesetzet, swenne si es abe liessen, daz der zins, der des jars geuallen were, so si es nit engeben, werden sol ze dem halben teile den herren des gotzhus von Tungstetten⁹ vnd ze dem halben teile den kappellanen von Zouingen¹⁰, als der brief stat, den die selben herren darumb gegeben hant vnder iren ingesigelen. Ich der vorg(enante) Dietrich von Rúti han och die selben herren von sant Vrban in nutzlich gewer gesetzet der vorg(enanten) zehenden vnd kornes vnd verzihe mich vnd alle min erben vnd nachkomen daran alles rechtes vnd aller hilfe geisliches vnd weltliches gerichtes, geschribens vnd vngeschribens iechlichs svnderlich vnd aller gemeinlich, vnd aller vszúgen vnd fúnden, da mitte ich, min erben vnd nachkomen hie wider iemer mo^echten getůn keinen weg noch nieman gehellen, der daz tette. Ich geloben och fúr mich vnd min erben, der vor(genanten) zehenden rechten weren ze sinde des vorg(enanten) gotzhus von sant Vrban an geislichen vnd an weltlichen gerichten, wa si sin bedúrfen, als man erbes nach gewanlicher werschaft wer sol sin, an alle geuerde. Vnd des ze einem waren vnd offenen vrkúnde vnd och ze einer merer sicherheit alles des, so hie vor geschriben stat, so han ich Dietrich von Rúti vorg(enanter) min eigen ingesigel gehenket an disen brief. Der gegeben wart ze sant Vrban an dem nechsten mendage vor sant Gallen tag des jars, do man von gottes gebúrte zalte drizehenhundert jar, darnach in dem zwei vnd vierzigostem jare.

Source Fulltext: Chartularium Sangallense VI, Nr. 3825, S. 388-389.