Allen, die disen brief ansehent, lesent oder ho^erent lesen, kúnden vnd veriehen wir Johans von Luterberg, dem man sprichet der Pfulwe, Wilhelm vnd Růdolf von Luterberg¹ gebrůder, das wir mit gůter vorbetrahtunge vnd beschaidenhait willeklichen gesworn haben v´nser || iegliche besunder ainen gelerten aid ze den hailgen mit vfgehabenr hant ain gantze sůn vnd ain getrúwe sta^et frúntschaft vmb alle sto^esse vnd mishelli, die wir vntz her gehebt haben mit dem êrwirdigen v´nserm gna^edigen herren von gottes gnaden abt Herman des gotzhus ze sante Gallen² vnd mit dem gotz||hus ze sante Gallen. Wir haben ouch gelobt bi dem selben aide, des vor genemten v´nsers herren abt Hermans vnd aller der frúnt ze sînne, die v´ns an v´nserm libe ald an v´nserm gůte mit worten ald mit werchen kainen schaden getân hant, vmb alle die sto^esse vnd mishelli, die wir vntz vffen disen húttigen tag gehebt ha||ben mit v´nserm vorbenemten herren abt Herman vnd mit dem gotzhus ze sante Gallen, vnd in v´nser frúnde ze frúnden ze^a) gewinnenne. Ich der vorgenant Johans von Luterberg han ouch gelobt bi dem selben aide, das ich noch min erben niemer kain ansprâche haben súlin weder mit gaistlichem noch mit weltlichem gerihte noch ân geriht an die wise, die man nemmet Vorbrunnen³, noch an die zehenden ze Sîdwâld⁴, noch an lúte noch an gu^eter ze dem Akker⁵, noch an lút noch an gu^eter ze Waltiswîle⁶, noch an kainú gu^eter, dú Johans der Kamrer von Wîle⁷ vnd sin êlichú wirtenne vntz her hant inne gehebt, noch an kainú gu^eter, dú der vorbenemte min herre abt Herman vnd sin gotzhus vnd des gotzhus lúte vntz her inne gehebt hant. Ich der vorgenant Johans von Luterberg vergih ouch, das ich gelobt han bi dem selben aide, das ich wider minen vorgenemten herren abt Herman noch wider sin nahkomen noch wider das gotzhus ze sante Gallen niemer sol sîn noch getůn mit kainen sachen. Wa^er aber, das ich wider diser vorgeschribenr dinge kainem ta^ete oder der stuk kaines bra^eche, dú vorgeschriben sint, das got nút welle, swenne ich danne von minem vorgenemten herren abt Herman oder von sinen nahkomen oder von dem cappittel des gotzhus ze sante Gallen, ob kain herre da wa^ere ald ob er vnnútz wa^ere, gemant wirde ald mit ir brieuen ald mit ir gewissen botten ze huse ald ze houe ald vnder ôgen, so sol ich mich antw|rten gegen sant Gallen in die stat oder gegen Wîle in die stat, in weder stat ich gemant wirde, vnd sol das widertůn vnd abieggen nah der manunge inrunt dem na^ehsten mânod, wie sich die drige schidlút oder der mêre tail vnder in erkennet, die darzů gesetzet sint, das ich es ablegen súl. Das ist herr Eberhart von Búrglon⁸ frîge vnd ritter, herr Beringer von Landenberg⁹, herr Cůnrat der Schenk von Landegge¹⁰ bêd ritter. Wa^er ouch, das der driger kaine abgienge von tôdes wegen oder ân das vnnútz wrde ald darzů nút komen wolte ald mo^ehte, so hat min vorbenemter herre abt Herman vnd sin nahkomen oder das cappittel, ob kain abt da wa^ere^b) ald ob er sús vnnútz wa^ere, gewâlt ân geua^erde, ainen andern êrbern man zů den andren schidlúten ze gebenne, der als schidlich sie, als der was, der abgangen ist, vnd sol ich denne gehorsam sîn ze tu^enne, das sú alle oder der mêre tail vnder in mich haisset tůn, in allem reht, als vor ist beschaiden. Wa^er ouch, das ich der vorgenant Johans von Luterberg wider diser vorgeschribenr dinge kainem ta^ete ald ich der stuk kaines bra^eche, das got nút welle, vnd ich damitte von dem lande fu^ere oder mich ân das entsaiti mit geua^erden, das man mich niht gemanen mo^ehte, so hat min vorbenemter herre abt Herman vnd sin nahkomen oder das cappittel, ob kain herre da wa^ere ald ob der herre vnnútz wa^ere, gewalt, die vorgenanten drige schidlút ze manenne, vnd erkennent sich die alle oder der mêr tail vnder in, das ich minen vorbenemten herren abt Herman ald sin nahkomen ald das gotzhus ze sante Gallen kainen weg geschadgot han, so sint minem vorgenanten herren abt Herman vnd sinen nahkomen oder dem cappittel, ob kain herre da wa^er oder ân das vnnútz wa^ere, hundert march gůtes silbers Kostentzer gewiht geuallen, vnd hant sú darvmb gewalt, die búrgen, die hie nah geschriben stânt, ze manenne vnd ze no^etenne. Vnd ze ainer merun sicherhait aller der vorgeschriben dinge vnd gedinge haben wir die vorgenanten Johans, Wilhelm vnd Růdolf von Lûterberg v´nserm vorbenemten herren abt Herman vnd sinen nahkomen vnd dem gotzhus ze sante Gallen hundert march silbers gůtes vnuersprochens Kostentzer gewiht verbúrgot. Wa^er ob wir diser vorgeschriben dinge kaines bra^echin ald v´berfu^erin, als vor beschaiden ist, so sont in die búrgen haft sîn vmb die hundert march silbers, die in von v´ns geuallen sint. Vnd sint dis die búrgen v´nser herre graue Albreht von Werdenberg der elter¹¹, v´nser herre graue Fridrich von Tokkenburg¹², herr Eberhart von Búrglon⁸, herr V^olrich von der Altun Klingen¹³ der junger, herr Albreht vnd herr Fridrich von Bussenank¹⁴ alle frygen vnd ritter, herr Burkart von Ramswâg¹⁵, herr Cůnrat vnd herr Bernhart die Schenken von Landegge¹⁶, herr Hainrichwalther von Sultzberg¹⁷, herr Johans von Zwingenstain¹⁸, herr Johans von Haidelberg¹⁹, herr Amor von Luterberg²⁰, herr Johans von Sternegge²¹ alle ritter, Walther von Bychelnse²², Eglolf von Altstetten²³, Herman von Sultzberg²⁴, Peter von Luterberg²⁵, Johans vnd Hainrich von Meldegge²⁶, Johans von Staina²⁷, V^olrich vnd Hainrich die Giel von Glatburg²⁸ gebrůder, Hug von Luterberg²⁹, Ru^edi von A^emptz³⁰, Burkart vnd Otto von Ainwile³¹, Růdolf der Rinegger³², Albreht von Hugoltzhouen³³, Albreht der Betler³⁴, Dyethelm von Mose³⁵, Růdolf der Aster vnd Jacob von Wittenwîle³⁶. Die hant alle gesworn iegliche besunder ainen gelêrten aid ze den hailgen mit vfgehabenr hant, wa^er das wir die vorgenanten von Lûterberg der vorgeschriben dinge kaines bra^echin ald v´berfu^erin vnd das nút widerta^etin, als sich die vorbenemten schidlút erkandin, als hie vor ist beschaiden, wenne sú danne von v´nserm vorbenemten herren abt Herman ald von sinen nahkomen oder von dem cappittel, ob kain herre da wa^er ald ob er vnnútz wa^ere, ald mit ir brieuen ald mit ir gewissen botten ze huse ald ze houe ald vnder ôgen ermant wrdin, so son sú sich ân alle geua^erde nah der manunge inrunt den na^ehsten vierzehen tagen antw|rten gegen sante Gallen in die stat ald gegen Wîle in die stat, in weder stat iegliche wil, vnd son da reht giselschaft laisten vngeuârlichen in offenr wirt húser iegliche zwai mâl an dem tage, vnd son von der giselschaft niemer komen ân v´nsers vorgenemten herren abt Hermans willen ald siner nahkomen ald ân des cappittels willen, ob kain abt da wa^er ald ob der abt vnnútz wa^ere, ê das sú in die hundert march silbers Kostentzer gewiht gantzlichen verrihtent vnd gewerant. Wele aber der búrgen nút selb laisten mag ald wil, der sol ân alle geua^erde ainen êrbern kneht mit ainem maiden an sin stat ze gisel legen, der ân geua^erde giselschaft laiste an siner stat, als ob er selb laisti vnd gisel la^ege. Wa^er ouch, das der vorgenemten búrgen kaine abgienge von tôdes wegen ald von andren sachen vnnútz wrde, so súlin wir ainen andern erbern búrgen als gewissen an des stat geben, der abgangen ist, inrunt dem na^ehsten manod, wenne es von v´nserm vorbenemten herren abt Herman ald von sinen nahkomen oder von dem cappittel, ob kain herre da wa^er ald ob der herre vnnútz wa^ere, ald von ir gewissen botten ald mit ir brieuen an v´ns geuordrot wirt ze huse ald ze houe ald vnder ôgen. Ta^etin wir des niht, so son die andern búrgen alle laisten, so sú ermant werdent, in allem reht, als vor beschaiden ist, vntz das geschiht. Es hant ouch die vorgenemten burgen alle in selber bedinget vnd behalten, wele vnder in nút laisten mag ald wil, wenne der sinen tail an den hundert marchen gît, der in denne angezúhet vnd antriffet, der sol ledig sin von diser búrgschaft vnd giselschaft. Wir die vorgenanten Johans, Wilhelm vnd Růdolf von Luterberg haben ouch gelobt bi dem aide, den wir gesworn haben, die vorgeschriben búrgen ze lo^esenne von allem schaden, in den sú koment von diser búrgschaft vnd giselschaft. Vnd ze ainem waren vrkúnde vnd ze ainer sta^etun sicherhait aller der vorgeschriben dinge vnd gedinge henken wir v´nsrú insigel an disen brief. Wir die vorgenemten búrgen graue Albreht der elter von Werdenberg, graue Fridrich von Tokkenburg, Eberhart von Búrglon, V^olrich von der Altun Klingen der junger, Albreht vnd Fridrich von Bussenank frygen vnd ritter, Burkart von Ramswâg, Cůnrat vnd Bernhart die Schenken von Landegge, Hainrichwalther von Sultzberg, Johans von Zwingenstain, Johans von Haidelberg, Amor von Lûterberg, Johans von Sternegge alle ritter, Walther von Bychelnsê, Eglolf von Altstetten, Herman von Sultzberg, Peter von Lûterberg, Johans vnd Hainrich von Meldegge, Johans von Staina, V^olrich vnd Hainrich die Giel von Glatburg gebrůder, Hug von Luterberg, Ru^edi von A^emptz, Burkart vnd Otto von Ainwile, Růdolf der Rinegger, Albreht von Hugoltzhouen, Albreht der Betler, Dyethelm von Mose, Růdolf der Aster vnd Jacob von Wittenwile veriehen offenlich an disem brieue, das wir die vorgeschribnun burgschaft vnd giselschaft gesworn haben ze laistenne ân alle geua^erde iegliche besunder mit vfgehabenr hant, als vor geschriben vnd beschaiden ist, wele aber vnder v´ns sinen tail gît, der in denne angezúhet an den hundert marchen, als vor beschaiden ist^c), der sol von diser búrgschaft ledig sin, vnd ze ainer merun sicherhait der vorgeschriben dinge vnd gedinge henken wir ouch v´nsrú insigel an disen brief. Der geben ward ze sante Gallen in der stat, do man zalte von gottes geburt drúzehenhundert jâr viertzeg jâr, darnah in dem vierden jâre, an sant Fîdun tage.

Source Fulltext: Chartularium Sangallense VI, Nr. 3901, S. 447-450.