Allen den, die disen brief an sehent lesent oder ho^erent lesen, kúnd ich Johans von Múnchwille schulthaisse vnd^a) rihter ze Wile¹ in der stat vnd uergihe offenlich an disem || brief, daz fúr mich kamen ze Wile in der stat fúr daz geriht, da ich offenlich ze geriht sas, Johans vnd Eberhart die Kofman von Wile gebrůder vnd nament da || Johansen von Arnoltswille² burger ze Wile ze fúrsprechen vnd veriahent da offenlich mit iro fúrsprechen, daz sú mit gůter beschaidenhait vnd vorbetrahtung mit iro || frúnde râte die schůpůsse gelegen ze Rikenbach³ genant des Kofmans schůpůsse vnd die wise gelegen in Tûr O^vwe⁴ vnder dem raine, die man nemmet dez Kofmans wise, du^e gu^eter iro aigen warent, reht vnd redelich von iro not wegen hettint verkoffet vnd ze koffen gen vnd gent sú^b) och ze koffen mit disem brief mit allen rehten nútzen zinsen vnd gewonhaiten, die dar zů vnd dar in geho^erent von reht ald von gewonhait, der êrwirdigun vrown vro Annun a^ebtissenne dez klosters ze Maggenowe⁵ vnd dem conuent gemainlich dez selben klosters vnd och dem vorgenanten kloster ze Maggenowe vmb fúnf pfund vnd vmb drissig pfunde pfenning allez gůter vnd gena^emer Costentzer múns, der pfenning die egenanten Kofman gebrůder gar vnd gantzlich gewert wa^erint vnd sint vnd in iro schinba^eren nutz hettint bewendet, vnd wo^eltint och dú vorgenanten gu^eter da vor geriht mit allen rehten nútzen vnd gewonhaiten, die dar zů vnd dar in ho^erent, ledeklich vf gen . . der egenantun a^ebtissenne vnd dem conuent gemainlich dez klosters ze Maggenowe vnd och dem kloster ze Maggenowe, vnd battent inen eruaren an offenem geriht, sit Eberhart der vorgenant Kofman noch ze sinen tagen noch ze sinen jaren nit komen wa^er vnd noch vogtba^er wa^ere, wie sú denne die egenantun schůpůsse vnd die wise mit allen rehten nútzen zinsen vnd gewonhaiten, die dar zů vnd dar in ho^errent, vf gen so^eltint der vorgenantun a^ebtissenne vnd dem conuent gemainlich des klosters ze Maggenowe ze dez selben klosters handen, daz ez nu vnd hie nach kraft vnd maht hetti. Do fragt ich vrtailde vmb. Do wart ertailet mit gemainer gesa^emenoter vrtailde, daz Johans der Kofman dú ob genantun schůpůsse vnd die wise mit siner hand vf gen so^elte vor geriht an der egenantun . . a^ebtissenne hand ze dez conuentes vnd dez klosters handen ze Maggenowe, vnd daz Eberhart der Kofman, sit er ze sinen tagen noch nit komen wa^er vnd noch vogtba^er wa^ere, ainen vogt nemen so^elte vor offenem geriht mit sinez vorgenanten brůders willen vnd gunst v´ber dise sache vnd so^elte da mit sines vogtes willen râte vnd hand vnd och mit siner hand die vorgenantun^c) schůpůsse vnd die wise ledeklich vf gen an der vorgescribenun a^ebtissenne hand zů dez vorgenanten conuentes vnd dez klosters handen ze Maggenowe. Do gab Hans der vorgenant Kofman die vorgescribenun schůpůsse vnd die wise mit allen rehten nútzen zinsen vnd gewonhaiten, die dar zů vnd dar in geho^erent, ledeklich vf vor offenem geriht an der egenantun a^ebtissenne hand ze des vorgescriben conuentes vnd dez klosters handen ze Maggenowe. Dar nach nam Eberhart der Kofman mit Hansen sines vorgenanden brůders willen rât hand vnd gunst Burkart den Risen burger ze Wile ze vogt vor dem geriht, der im och mit vrtailde ze vogt geben wart v´ber dise sache, vnd gab da der selbe Eberhart Kofman mit sines vorgenanden vogtes willen râte handen vnd gunst die vorgescribenun schůpůsse vnd die wise mit allen rehten nútzen zinsen vnd mit allen gewonhaiten, die dar zů vnd dar in ho^erent, ledeklich vf an der vorgenantun a^ebtissenne hand ze des conuentes vnd dez klosters handen ze Maggenowe, vnd entzigent sich da Hans der Kofman mit siner hand vnd Eberhart sin brůder mit sines vogtes hand aller der reht vorderung vnd an sprache, so sú an denan vnd zů denan vorgescribenan gu^etern ie hettunt ald gewnnent ald sú hie nach immer gewinnen mo^ehtint ad^d) iro erbun dehainen weg, vnd entzigent sich da alles dez vszuges vnd schirmes, da mit sú ald ir erben ald iemen von iro wegen sich immer schirmen mo^eht ald mag vf gaistelichem ald vf weltelichem geriht dehainen weg in diser sache, vnd hatten mich die vorgenanten Kofman gebrůder, der vorgescribenun a^ebtissenne vnd dem conuent dez closters ze Maggenowe vnd och dem selben kloster dez gerihtes brief gen, ob ez reht wa^er, v´ber dise sache, der wart inen ertailet, vnd sint allú vorgescriben ding geschehen ze Wile in der stat vor offenem geriht mit vo^egten fúrsprechen worten werchen ra^eten vnd geta^eten vnd mit allen dingen, dú dar zů hortunt nútz vnd gůt warent, vnd als mit gemainer gesa^emenoter vrtailde ertailet wart vor offenem geriht. Vnd da von ze merer sicherhait aller vorgescribener ding vnd von emsiger bette der vorgenantun Hansen dez Kofmans vnd Eberhartes dez Kofmans vnd Burkartes dez Risen sines vogtes in diser sache so henk ich min insigel an disen brief. Wir Hans vnd Eberhart die Kofman gebrůder vnd Burkart der Rise veriehint offenlich an disem brief ainer gantzun warhait aller der vorgescribenun ding, so Johans von Múnchwille der vorgenant schulthaisse vnd rihter ze Wile von v´ns an disem brief ueriehen het, vnd ze merer sicherhait der selbun dinge henk ich Hans Kofman min insigel an disen brief, an den och ich Burkart der Rise min insigel henk, won ich vogt waz in diser sache. Dis geschach vnd wart dirre brief gen ze Wile in der stat, do man zalte von gottes gebúrt drúzehenhundert^e) jar vierzig jar, dar nach in dem fúnften jar, an sant Laurencien abent.

Source Fulltext: Chartularium Sangallense VI, Nr. 3944, S. 484-486.