Allen den, die disen brief ansehent oder ho^erent lesen, kúnden wir V^olrich der Giel von Glatburg¹ vnd Katherin || dú Frigin sin elichú vrowe vnd veriehent offenlich mit disem brief, das wir mit gemainem rat vnd mit || ainmu^etigem willen zwo^elf schilling Costenzer phenning zwai phenning minr zinsgeltes, die ja^erklichs gant von || den gu^etern, dú gelegen sint ze v´berlingen² in dem Bru^el, ze koffenn habent gegeben reht vnd redlich vfgegeben vnd geuertgot mit allen den worten vnd werken, dú darzů hortent oder notúrftig warent, fúr ain rehtes lediges fries vnd vnbekúmbertes zinsgelt dem erbern man Hainrich Knipen burger ze v´berlingen vnd sinen erben vmb aht phunt phenning Costenzer múns sehs schilling minr, der wir ga^entzlich von im gewert sient vnd in v´nsern gůten nuzze komen vnd bekert sint. Wir habent v´ns och gebunden vnd binden v´ns an disem brief fúr v´ns selb v´nd fúr v´nser erben gen dem vorgenanten Hainrich Knipen vnd gen sinen erben vnd nachkomen, iro wer ze sinde des vorgescribenen zinsgeltes nach reht ane alle geua^erde. Wir habent v´ns och verzigen reht vnd redlich vnd verzihent v´ns mit disem brief fúr v´ns selb vnd fúr v´nser erben gen dem vorgenanten Hainrich Knipen vnd gen sinen erben vnd nachkomen an dem vorgescribenen zinsgelt aller aigenschaft aller reht vnd aller der vorderung vnd ansprach, die wir ald v´nser erben iemer gehan oder gewinnen mo^ehten an das vorgescriben zinsgelt. Vnd das dis wâr sie vnd iemerme sta^et belib, dar vmb so geben wir bedú fúr v´ns selb vnd fúr v´nser erben dem vorgenanten Hainrich Knipen vnd sinen erben vnd nachkomen disen brief besigelt mit minem des vorgenanten V^olrichs des Gieln insigel, vnder das wir v´ns bedú verbunden hant sta^et ze habenn, was da vor geschriben stat. Dis beschach vnd wart dirre brief geben ze v´berlingen, do man zalt von gotz gebúrt drúzehenhundert jar, dar nach in dem fúnf vnd vierzigosten jar, an sant Thomas abent des zwo^elfbotten.

Source Fulltext: Chartularium Sangallense VI, Nr. 3963, S. 498-499.