Ich Burkart von Ramswag¹ ritter tůn kunt vnd vergich offenlich an disem brief allen, die in an||sehent lesent oder ho^erent lesen, das ich willeklich vnbetwungenlich vnd mit bedahtem můt gesworn || hab ainen gelerten aid ze den hailgen mit vfgehepter hant ze Lindo^vwe in der Barfůssen² crúzgang, || da ze gegen wârent die êrwirdigen hêrren graf V^olrich von Montfort³, grâf Hartman von Werdenberg⁴ vnd her Hainrich von Swenningen lantfogt des riches in Obern Swâben⁵ vnd ander êrber lút ritter vnd kneht genůg, das ich mit der burg ze Blattun⁶, die min burgsa^esse ist von ainem abt vnd hêrren des gotzhus ze sant Gallen, warten sol, als ain burgman von sinem burgsa^esse billich vnd von reht warten sol, vnd tůn von disem tag hinnanhin, als dirre brief geben ist, dem êrwirdigen hêrren hern V^olrich von Enna probst vnd pfleger des gotzhus ze sant Gallen⁷ da vorgenempt, alle die wîle er pfleger ist vnd haisset. Wa^er aber, das ain ander pfleger wurd ze dem vorgenempten gotzhus ze sant Gallen, dem bin ich o^vch gebunden, als da vorgeschriben stât. Ich bin o^vch gebunden ainem abt, ob kain pfleger ze dem vorgedahten gotzhus ist, ald dem conuent des vorgeschriben gotzhus, ob da niht abtes ist, mit der vorgenempten burg ze Blattun ze tu^end vnd ze wartent vngeuârlich in allem dem reht, als vor stat geschriben. Vnd ze ainem offenem vrkúnd vnd ze ainer sta^eten sicherhait aller der vorgeschriben ding darumb so gib ich Burkart von Ramswâg ritter da vorgenempt disen brief besigelten mit minem insigel, das daran hangot. Dis beschach vnd wart dirre brief geben ze Lindowe, do man zalt von gottes gebúrt drúzehenhundert jar, vierzig jar vnd darnach in dem sechsten jâr, an dem ma^entag nâch sant Marien Magdalenen tag.

Source Fulltext: Chartularium Sangallense VI, Nr. 3990, S. 521.