Wir Johans von gottes uerhengde abt vnd der conuente gemainlich dez gotzhuses ze sant Johanne in Tûrtal¹ sant Benedicten ordens in Costentzer || bistům tu^egint kund vnd ueriehint offenlich an disem brief fúr v´ns vnd alle v´nser nachkomen allen den, die in an sehent lesent oder ho^erent || lesen, daz wir mit gemainem râte vnd gůter vorbetrahtung v´nsers capitels durch meren nutz vnd besserung willen v´nsers obgenanten gotz||huses den beschaiden man Hansen Burkart von Bussenang², der v´nsers der^a) vorgescribenen gotzhus reht aigen waz, habint reht vnd redelich geben vnde gewehselt mit sinem libe vnd gůt dem gotzhuse ze Vischinan³ in Costentzer bistům v´nsers ordens ze rehtem aigen vmb Hainrichen den Kofman von Wingarten⁴ vnd vmb sin gůt, den v´ns daz gotzhus ze Vischinan mit libe vnd mit gůt da wider ze rehtem aigen geben vnd gewehselt het, vnd so^elint wir noch enkain v´nser nachkomen daz selbe gotzhus ze Vischinan an des vorgenanten Hansen Burkartz lib noch gůt nimmer bekrenken noch bekúmberen mit geriht noch ane reht dehainen weg, wir vnd v´nser nachkomen so^elint och des obegenanten wehsels vnd gebens wer sin nach reht, wa sin daz gotzhus ze Vischinan bedarf ald notdúrftig ist vf gaistelichem vnd weltelichem geriht, vnd entzihent v´ns mit disem brief aller der reht vorderung vnd^b) ansprache, so wir ald v´nser nachkomen ze dez obegenanten Hansen Burkartz libe ald gůt vntz vf disen hútigen tag, als dirre brief gen ist, ie hettunt ald gewnnent ald wir hie nach dar zů immer han ald gewinnen mo^ehtunt von reht ald von gewonhait, vnd entzihent v´ns och in diser sache aller frihait, so wir habint von ba^ebsten ald von bisco^effen ald von dien vnder denan sint ald von v´nsers ordens wegen, vnd aller der fúnde, die ietzent funden sint ald hie nach funden werdent, vnd allez dez schirmes, da mit wir daz gotzhus ze Vischinan an den^c) vorgescribenun sachen immer bekrenken ald bekúmbern mo^ehtint vf gaistelichem ald vf weltelichem geriht ald ane reht. Vnd ze ainer sta^etun vestun sicherherhait^a) aller vorgescribener dinge vnd bedingde henken wir vorgenanten abt Johans vnd der conuent dez gotzhus ze sant Johanne in Tûrtal v´nserú insigel an disen brief. Dis geschach vnd wart dirre brief gen ze Wil⁵ in der stat, do man zalte von gotes gebúrt drútzehenhundert jar, vierzig jar, dar nach in dem sehsten jar, an dem na^ehsten zinstag vor sant Vitus vnd sant Modestus tag.

Source Fulltext: Chartularium Sangallense VI, Nr. 3987, S. 519.