Allen den, die disen brief sechent oder ho^erent lesen, kúnden wir graf Johans von Habspurg¹, . . der vogt vnd der . . rat || der stat ze Rappreswile² vnd wir Johans von Hasla³ vnd Otto von Rambach phleger des spitals ze Rappreswile⁴ vnd ich || brůder Johans Banwart spitalmeister⁵ des selben spitals vnd der dúrftigen vnd veriechen offenlich an disem brief fúr || v´ns vnd alle v´nser nachkomen, die wir festklich vnd eweklich hie zů binden, won o^vch alles daz, so hie nach verscriben ist, war stet vest vnd ewig beliben sol nů vnd hie nach iemer me an sumung vnd an allen irsal, daz wir mit bedachtem můt mit wisem rat vnd sunderlichen durch gůten nutz des vorgenanden spitals mit dem erbern manne V^olrich von Russinkon⁶ burger ze Rappreswil v´berein komen sien vnd er mit v´ns vmb ein selgeret, so er siner sel vnd aller siner vordren oder nachkomen selen ze heil ze trost vnd ze růw durch got vnd durch den heiligen geist luterlichen geordenot hat, mit solicher bescheidenheit vnd ordenung, daz der vorgenand spitalmeister vnd alle sin nachkomen iemer me eweklich an sumung jerlichen vierstunt im jar ze den vier fronvasten in ieklicher fron vasten an dem fritag bachen súllent ein mút kernen Rappreswiler messes vnd dar vs machen zwentzig vnd hundert prot, dero man zwei geben sol ze ielicher fronvasten eim priester, der caplan ist in dem vorgenanden spital, daz ander brot man geben sol ze einer spende armen lúten vnder der kilchtúr ze Rappreswil vnd nach sim tod nebent sim grab in dem kilchof an alle geuerde, vnd súllent dar zů nemen, so man die spenden teillet, einen sinen nechsten frúnt vnd nachkomen, der die spenden ordene vnd helf teillen, als vor geschriben ist, dis alles, so vor geschriben ist, ein ieklicher spitalmeister eweklichen vsrichten sol bi dem eit, so er dem spital schwerent wirt trúwe vnd warheit, vnd sunderlichen so sol man dien spitalmeistern daz selb in den eit geben vnd binden, won aber dis spendan ewig sint, lebti denn enkein des vorgenanden V^olrichs nachkom, als die lút abgant vnd todemlich sint, so sol doch ein ieklicher spitalmeister, der denn spitalmeister ist, bi dem eit, so er gesworen hat, oder die husbrůder die spenden vs richten vnd teillen iemer me eweklich ze den vier fronvasten, als vor geschriben ist. Vnd súllent o^vch die spenden vf dem hus des spitals, da die dúrftigen vnd husbrůder inne wonhaft sint, stan vnd vf allen den gu^etern, so der spital inne habent wirt, won o^vch der vorgenant V^olrich von Russinkon die vorgenanden vier mút kernen, die man eweklich ze spendan geben sol, recht vnd redlichen ko^vft hat vf dien vorgenanden gu^etern vmb sibenzig phunt phenning Zúricher múntz, die in des vorgenanden spitals der husbrůder vnd der dúrftigen des spitals gůten vnd offenbaren nutz komen sint. Vnd ze merer sicherheit, daz die vorgenanden spenden an fúrzug eweklichen werden berichtet mit der ordenung, als vor geschriben ist, an alle geuerde, so haben wir vf den vorgenanden spital die dúrftigen vnd husbrůder ein vrsatz gesetzzet, wer daz man keines males iemer liessi kein spend der vorg(enanden) abgan, also daz si nút bericht wurdi, als vor geschriben ist, an geuerde, als dik daz beschicht, so ist ein spitalmeister vnd die husbrůder des vorgenanden spitals an wider rede vnd an allen fúrzug gebunden ze gebenne dien geistlichen herren von Rúti⁷ ein mút kernen vnd dien geistlichen fro^vwen von Wurmspach⁸ ein mút kernen Rappreswiler messes, dar vmb man vnsern spital vnd alles sin gůt an griffen sol vnd mag, vntz man dien vorgenanden klo^estern die zwen mút kernen vs berichtet. Dis ist alles beschechen mit aller der sicherheit ehafti worten vnd werchen, als man ein ewig selgeret versicherren sol vnd mag, daz es billich kraft vnd macht nů vnd hienach iemer me haben sol, vnd loben o^vch wir hie wider niemer ze tu^enne mit worten noch mit werchen mit reten noch mit gedeten mit geistlichen noch mit weltlichen gerichten noch mit keinen sachen, so nů oder hie nach hie wider ieman erdenken ko^end oder mo^echt. Vnd des^a) offennem waren stetten vnd ewigem v´rkúnd so han ich graf Johans von Habspurg disen brief offenlich besigelt mit minem insigel vnd wir der vogt vnd der rat disen brief offenlich besigelt mit v´nser stat insigel, vnd wir die vorgenanden phleger vnd der spitalmeister haben o^vch disen brief offenlich besigelt mit des vorgenanden spitals insigel. Der geben wart, do man zalte von gottes gebúrte drúzechenhundert jar, vierzig jar, dar nach in dem sechsten jar ze ingentem meiien.

Source Fulltext: Chartularium Sangallense VI, Nr. 3979, S. 513-514.