Ich Růdolf von Nydegge¹ tůn kunt vnd vergih offenlich mit rehter vergiht allen den, die disen brief ansehent oder ho^erent lesen, daz ich dem erberen man || Jacob Sigbotten burger ze Ysni² vnd sinen erbon reht vnd redlich ze koffend han geben minú zwai gu^eter zen Mellun³, der daz ain haisset Růtmans gůt vnd min || reht aigen ist, vnd daz ander Wetzels gůt vnd min lehen ist von sant Gallen, div selben zwai gu^eter baidú vnd daz holtz, daz man nemmet in Grůbun oder || im Túffen Brande, daz bi den selben vorgenanten gu^etern gelegen ist, han ich im vnd sinen erbon reht vnd redlich geben mit allen rehten nútzen vnd gewonhait, die darzů geho^erent oder geho^eren sont von alter, von reht oder von gewonhait, ez sige in holtz, an velde, vnder erd, ob erd, gesůhtz vnd vngesůhtz, genantz vnd vngenantz, vmbe sibendhalps vnd zwaintzig pfunde pfenning gůter vnd ga^eber Costentzer múnse, der ich gar vnd ga^entzlich gewert bin vnd in minen nutz komen vnd bewent sint, vnd han im daz vorbenente gůt, daz lehen ist, geuertgot von dem lehen herren, als reht ist. Dar zů sol ich vnd min erben sin vnd siner erbe reht geweren sin vmbe div vorben(entú) zwai gu^eter vnd vmbe daz vorgenante holtz im Túffen Brande, als reht ist, vmbe daz aigen nach aigens reht, vmbe daz lehen nach lehens reht. Vnd ze ainer bessrun sicherhait han ich im vnd sinen erbon zů mir ze ainem rehten geweren geben vmbe div vorben(entú) gu^eter vnd vmbe daz vorgenante holtz Joh. von Zwirgunberg⁴ minen swager mit selcher beschaidenhait, wa^er daz ieman in oder sin erben an den obgenanten gu^eter vnd waz dar zů geho^ert oder an dem vorgenanten holtz im Túffen Brande irren oder krenken welt in dehainen weg, ez sige vf gaischlichem oder vf weltlichem geriht, daz ich vnd min erben vnd . . der vorben(ente) gewer si da vertretten vnd versprechen sont mit dem rehten vnd als reht ist, vnd sol ich vnd min erben den vorgenanten geweren von der selben werschaft lo^esen ane allen sinen schaden. Vnd des ze ainem gewa^eren vrkúnde aller der vorgeschribenne dinge han ich Růd. von Nydegge vnd der vorben(ente) gewer im vnd sinen erbon disen brief geben besigelten mit vnser baider aignen insigeln. Ich Johans von Zwirgunberg ze ainem vrkúnde der obgenanten werschaft vnd durch bet Růd. des vorgenanten henk min insigel an disen brief. Der geben wart an sant Martins abent im dem jar, do man zalt von Cristes gebúrt drúzehenhundert jar, dar nach in dem sibenden vnd viertzgosten jar.

Source Fulltext: Chartularium Sangallense VI, Nr. 4055, S. 571-572.