Dilecto filio Ludwico de Rutlingen^a)1 rectori parrochialis ecclesie in Stainach² Constantiensis^b) diocesis iurisperito salutem etc. Litterarum scientia vite ac morum honestas aliaque laudabilia merita probitatis, super quibus apud nos fidedigno commendaris testimonio, nos inducunt, ut personam tuam condignis favoribus et gratiis prosequamur. Cum itaque sicut accepimus tu nuper parrochialem ecclesiam in Stainach Constantiensis^b) diocesis vacantem tibi canonice collatam pacifice fueris assecutus tuque continuas occupationes negociorum habes in serviciis venerabilis fratris nostri Vlrici episcopi Constantiensis^b)3, cuius vicarius in spiritualibus existis, nos volentes te premissorum intuitu, pro quo etiam dictus episcopus super hoc nobis humiliter supplicavit, necnon aliis certis ex causis rationabilibus nobis expressis prosequi favorabiliter in hac parte, ipsius episcopi ac tuis supplicationibus inclinati, ut tu usque ad biennium a data presentium computandum ratione dicte parrochialis ecclesie, cuius rector et infra annum a tempore ipsius ecclesie tibi concessi regiminis existis, non tenearis ad aliquem sacrum ordinem promoveri neque ad id a quoquam invitus valeas coartari, Lugdunensis concilii⁴ et aliis quibuscumque constitutionibus contrariis nequaquam obstantibus, auctoritate apostolica tibi de speciali gratia tenore presentium indulgemus, proviso quod eadem parrochialis ecclesia interim debitis obsequiis non fraudetur et animarum cura in ea nullatenus negligatur, quodque lapso dicto biennio te facias statutis a iure temporibus in presbyterum promoveri. Nulli ergo etc. nostre concessionis infringere etc. Dat. Auinione VIIII. kl. novembr. anno sexto.

Source Fulltext: Chartularium Sangallense VI, Nr. 4050, S. 561.