Wir^a) bruder Vlrich von gotz vnd des stuls ze Rom gnaden bischof ze Chur¹ kunden vnd veriehen || offenlich mit disem brief, das wir dem edeln herren graf Fridrich von Toggenburg² vnd vro || Kungund hern Donatz seligen von Vatz³ elicher tohter vnd des vorgenanten graf Fridrichs || von Toggenburg elicher husvrowen vnd allen iren elichen lib erben sunen vnd tohtren, ob da sún nut enweren, lihen vnd gelihen haben ze rehtem lehen die burg Winegg⁴ vnd was dar zů ho^eret, Ist och, das der vorgenant graf Fridrich von Toggenburg biuindet bi dem aid, den er vns gesworn hat von sinen lehen hinnan ze sant Jacobs tag dem nehsten, das das tal Tafaus⁵ vnd Valkenstain⁶ diu burg vnd anders dehain gůt von vns vnd vnserm gotzhus lehen ist oder vnser vnd vnsers gotzhus aigen ist vnd das vns von des vorgenanten hern Donatz seligen von Vatz tod an genallen ist, so so^ellen wir ims lihen vnd sol ers von vns ze lehen han. Wer aber, das sich der vorgenant graf Fridrich in dem vorgeschriben zil des nit eruu^er, wenn wirs denn an in vordrend, so sol er vns ains vnuerzogen reht dar vmb chorsam sin, vnd sol des her Johans von Haiwille⁷ ritter pfleger in Sungo^e8 gmainer man sin oder wen er vns git ze aim gmainen, ob er selb dar zů niht komen mo^eht, zů dem wir zwen vnd der vorgenant graf Fridrich zwen man sond geben, vnd was wir vor den bewisent mit dem rehten, das von vns lehen ist oder vnser vnd vnsers gotzhus aigen ist, das vns von des vorgenanten von Vatz tod an genallen ist, das so^ellen wir im lihen vnd sol von vns vnd vnserm gotzhus lehen sin in allen den rehten als dú vordern lehen, dú wir im gelihen han. Sich verziht och der vorgeschriben graf Fridrich willeclich vnd vnbetwvngelich vur sich vnd vur die vorgenanten vrowen sin elichen husvrowen, der vogt er ist, vnd vur alle ir erben aller der ansprach vnd tails der pfender, diu vnser voruar bischof Johans⁹ selig hern Donat seligen von Vatz versetzt hat, vnd aller der ansprach, die er vnd diu vorgenant vro sin elichú husvrow vnd all ir erben hand vnd haben mo^ehten an dem zerbrochen turn, der wilend hies Spinnio^el¹⁰, vnd der hofstat, dú zwiswent dem selben turn vnd Kurtessell¹¹ ze Chur in der stat gelegen ist. Was och vns vnserm gotzhus vnsern corherren vnseren luten dienstluten vnd dienern lút oder gůtz abtwung(en) ist vnd abgebrochen in dem krieg, das in sinr gwaltsami gelegen ist, was wir des bewisen mugen, das sol man vns wider lassen, das selb so^ellen och wir im vnd sinen lúten dienstluten vnd dienern lassen widervaren. Vnd des ze aim waren vnd offen vrkund aller der vorgeschribenen ding so geben wir im disen brief besigelten mit v´nserm^b) insigel. Dis beschah vnd wart dirr brief geben des iars, do man zalt von gotz geburt druzehenhundert iar, dar nah in dem aht vnd drisgosten iar, an dem fritag vor sant Lucien tag ze Wesen¹² vf der múli.

Source Fulltext: Chartularium Sangallense VI, Nr. 3700a, S. 615-616.