Frater Gerardus abbas Cistertii¹ venerabili in Christo nobis carissimo coabbati nostro de Marisstella² salutem et diligentiam in commissis. || Annue visitationis offitium, quod religiosis in Christo nobis dilectis filiabus abbatisse et conventui monasterii de Wurmespach³ || non possumus personaliter impendere aliis ordinis nostri negotiis multipliciter impediti, vobis per immediate sequens || triennium duximus ex certa scientia commitendum dantes vobis et concedentes auctoritatem et nostram plenariam potestatem in dicto monasterio visitandi corrigendi reformandi ac etiam statuendi tam in capite quam in membris quecumque ibidem visitationis correctionis ac reformationis benefitio noveritis indigere. Proviso tamen, quod visitatio prefata usque post festum beate Marie Magdalene annis singulis differatur, sane si abbatissam in dicto monasterio destitui vel institui oportuerit, destitutionem huiusmodi ac etiam institutionem tam ante visitationem quam post per vos fieri volumus in nostra et ordinis plenaria potestate, servatis tamen in omnibus premissis et singulis canonicis et nostri ordinis consuetudinibus et statutis. Damus insuper vobis auctoritatem et nostram plenariam potestatem omnium personarum regularium dicti loci confessiones audiendi ipsasque absolvendi in omnibus et singulis casibus, in quibus eas de iure absolvere possumus et debemus, confessoresque instutuendi, qui consimilem absolvendi habeant potestatem, ipsosque ac procuratores monasterii mutandi instituendi destituendi, si et quotiens suadente ratione videbitur oportunum, universis autem et singulis dicti monasterii personis regularibus damus tenore presentium firmiter in mandatis, quatenus in omnibus premissis et singulis ac dependentibus ab eisdem vobis obediant humiliter ac devote pareant tanquam nobis presentibus per continuum triennium, ut prefertur, in suo robore duraturis. Datum Cist(ertii) sub sigillo nostro anno domini millesimo trecentesimo octogesimo secundo, tempore nostri capituli generalis.

Source Fulltext: Chartularium Sangallense X, Nr. 5922, S. 84.