Wir graue Albreht vom Hayligen Berg der elter lantvogt in Swaben vnd ich graue Albreht vom Hayligen Berg der junger¹ gebrůder tu^ent kunt || vnd veriehen allen den, die disen brief an sehent oder ho^erent lesen, daz wir lieblich vnd tugentlich ains tails v´berain komen sien mit || ainander vmb allez daz gůt, daz v´nz baiden ze tail wart von v´nserm va^etterliche(m) vnd mu^eterlichem erbe, also daz wir dar vmb lieblich vnd frv´nt||lich gelo^vzet haben o^vn alle gefa^erde, vnd ist mir dem vorgenanten graf Albreht dem eltern mit dem lo^vz ze tail worden vnd gefallen Bludentz² die stat, Montafphun³ daz tal, die vesti ze Búrs⁴, die vesti ze Schellenberg⁵, die vesti zům Eglolfz⁶ vnd die zehen phunt phenning Costentzer múntz ja^erlichz geltz in dem Rintal vnd zwen wingarten ze Rinegg⁷ gelegen, der ain an dem Nidern Bůchberg⁸ haisset der Hafen⁹, der ander an dem Obern Bůchberg haisset der Ower¹⁰, vnd dú losung dez kelleho^vfz ze Wolffurt¹¹. Disú vorbenempten gu^eter a^ellú sint mir zů minem tail worden mit allen aygenscheften lehenscheften zwingen vnd bennen zo^ellen gerihten gewonhaiten mit fa^ellez vnd gela^ezen bi wasen vnd bi zwii mit holtz vnd mit veld mit a^eckern vnd mit wisen mit wasser wasser rúnsen vnd wasserlayti vnd vischentzen mit wegen vnd mit stegen mit allen ehaftinen mit stúren diensten mit allen nútzen rehten vnd zůgeho^eden^a), so zů ald in die vorbenempten gu^eter oder in ieglichz besunder ho^ert ald geho^eren mag, vnder erde oder ob erde nútz vzgenomen befundenz vnd vnbefundens besůchtz vnd vnbesůchtz o^vn alle gefa^erde, vnd hab och ich der vorbenempt graue Albreht der elter reht vnd vollen gewalt ze lo^esen a^ellú dú gu^eter, die vz den vorgeschribnen gu^etern, die mir ze tail worden sint, versetz sint. So ist mir dem egenanten graue Albreht dem jungern mit dem lo^vz ze tail worden vnd gefallen die vesti der Haylig Berg¹² vnd Zange¹³ disú zwai mit allen aygenscheften lehenscheften zwingen vnd bennen zo^ellen gerihten gewonhaiten mit fa^ellen vnd gela^ezen bi wasen vnd bi zwii mit ho^vltz vnd mit veld mit a^eckern vnd mit wisen mit wasser wasser rúnsen vnd wasserlayti vnd vischentzen mit wegen vnd mit stegen mit allen ehaftinen mit stúren diensten vnd mit allen nútzen rehten vnd zů geho^erden, so zů ald in die vorbenempten zwai gůt oder in ir entweders besunder geho^erd ald geho^eren mag, vnder erde vnd ob erde nútz vz genomen befundenz vnd vnbefundenz besůchtz vnd vnbesůchtz o^vn alle gefa^erde, so hab och ich der egenant graue Albreht der junger reht vnd vollen gewalt ze lo^esen a^ellú dú gu^eter, die vsser den obgeschribnen gu^etern, die mir ze tail worden sint, vormals versetz sint, vnd sont wir die vorgenanten gebrůder ietwedra den andern an sinem tail weder sumen noch irren bi geswornnen ait, die wir baid mit vf gebottenen fingern geta^vn haben, vnd sol vnd mag nun hinnahin v´nser ietweder mit den gůten vnd mit allen zůgeho^erden, die v´nser ainem ze tail worden sint, tůn vnd la^vzen nach sinem willen on alle gefa^erde. Vnd dez ze warem offenn vrkúnde so haben wir vorgenanten graue Albreht der elter vnd graue Albreht der junger ietweder sin insigel gehenckt an disen brief. Der geben ist zům Hayligen Berg in dem jare, do man zalt von Crystz gebúrt drúzehen hundert vnd in dem zwai vnd ahzigosten jar, an sant Oswaltz tag.

Source Fulltext: Chartularium Sangallense X, Nr. 5916, S. 79-80.