Allen^a) den, die disen brief an sehent lesent oder ho^errent lesen, kúnd ich Bertolt vss dem Holtz¹ amtman der edlen wolerborn miner gna^edigen || herschaft von Tokkenburg, dz ich offenlich ze geriht sass ze Cúmriswille² in dem dorf in Turtal gelegen vnd das da fúr mich kament || fúr offen jargeriht die gebursami gemainlich sesshaft ze Ennentbu^els³ och in Turtal gelegen mit ir fursprechen, vnd offenotont, || das in der alp genant Lútis alp⁴ gelegen in Turtal hinder Ennentbu^els nieman reht hett noch in die alp varn noch triben solt denn die ze Ennentbu^els in dem dorf hushablich sesshaft warint vnd da iar vnd tag verschinen wa^erint, vnd wer der wa^er, der von Ennentbu^els zug vnd da nit me sesshaft mit hus wa^er, der hett och enkain reht fúrbass in die alp ze triben noch ze varn mit sinem vih, vnd wo^elten dar vmb liden vnd tůn, was reht wa^er, vnd baten mich och ze erfarn an ainer vrtail, wie sú dz kuntlich solten machen, als reht wa^er vnd nû vnd hienach wol kraft vnd maht hett vnd haben mo^eht. Vnd wart ertailt nach miner frag mit gemainer vrtaild, wa die von Ennentbu^el daz mo^ehtint wisen mit drin erber mannen, die dar vmb ze den hailgen swu^erent, dz das war wa^ere, daz die von Ennentbu^el des billich vnd durch reht nû vnd hienach da bi solten beliben. Do staltent sú ze zúgen dar A^ernin Kofman, Wa^eltin Amman von Johansen Ha^echen von Ennentbu^el, die swôrent alle drie gemainlich vnd ieglicher besunder ainen liplichen gelerten aid ze den hailgen mit vf gebotten vingern, das inan ze wissent wa^ere, dz von rehtz wegen in die vorgenanden alp genant Lútis alp mit sinem vih nieman solt triben noch varn denn die ze Ennentbu^el jar vnd tag hushablich sesshaft gewesen wa^erint, vnd wer och dannen zug vnd niemme sesshaft da wa^erint, die hettint och fúrbass enkain reht in der selben alp. Do batent sú mich ze erfarn, ob sú daz hetten kuntlich gemacht vnd erzúget, als reht wa^er, vnd wart ertailt nach miner frag mit gemeiner vrtaild, es wa^er beschehen, als reht wa^er vnd nû vnd hienach wol kraft vnd maht hett. Do batent sú, inan hier v´ber des gerihtes brief geben, ob es reht wa^er, die wrdent inan ertailt mit gemainer vrtaild. Vnd sint a^ellu' vorgescribnú ding vnd geding beschehen vnd vollefu^ert mit aller ehafti hantvesti worten werchen ra^eten vnd geta^eten, so dar zů gůt nútzze vnd notdúrftig warent vnd darzů gehort von reht vnd gewonhait. Vnd des ze vrkúnd vnd ze merer sicherhait aller vorgescribner ding vnd geding han ich Bertolt vss dem Holtz amtman da vorgenant min aigen insigel von des gerihtes wegen offenlich gehenket an||
disen brief. Der geben ist in dem vorgenanden dorf ze Cúmriswille an dem na^echsten dunstag vor mittem mayen in dem iar, do man zalt von Cristus gebúrt drúzehenhundert iar, ahtzig iar vnd dar nach in dem andern iare.

Source Fulltext: Chartularium Sangallense X, Nr. 5904, S. 68-69.