Wir Kv^on von gottes gnaden abt dez gotzhus ze sant Gallen¹, daz ane allez mitel zůgehoret dem stůl ze Rome, tu^egent kunt vnd vergehint offenlich mit disem brief allen, die in ansehent oder ho^erent lesen, daz fúr vns kam ze Wile² in der statt an dem tag, alz dierre brief geben ist, der vest man herre Waltz vom Stain³ ritter vnd offnot fúr vns vnd sprach, er hetti mit gůter williger vorbetrachtung vnd mit wolbedachtem můte den ersamen lúten V^olrich Búrgin stattamman ze Lindow⁴ vnd Růdolf dem Mayger burger ze Lindow vnd allen iren erben sin gůtte ze Ra^eterschen⁵ die zwen ho^ef vnd den wingarten vnd den bongarten vnd den halben torggel ze Ra^eterschen, die von vns vnd vnserm gotzhus lehen sind, mit allen rechten vnd zůgeho^erden ains rechten redlichen kouffs ze kouffent geben hetti vmb nv´ntzig pfund pfenning genger vnd gůter Costentzer múntz, alz der kouffbrief wiset vnd seit, den sy darumb inne hettind, vnd bat vns gar ernstlich, daz wir die obgenanten gu^eter mit allen rechten vnd zůgeho^erden von im vfna^emint zů vnsern handen vnd die lihint den vorgenanten V^olrich Búrgin vnd Růdolf dem Mayger vnd allen iren erben, darumb erhorten wir sin ernstlich bett vnd nament die obgenanten gut von im vff zů vnsern handen vnd habint den obgenanten V^olrich Búrgin vnd Růdolf dem Maiger besunder die frúnndtschafft vnd gnade getan, daz wir inen vnd allen iren liberben der tochter alz dem knaben die obgenanten gu^eter mit allen rechten vnd zůgeho^erden gelihen habint, alz vmb semlichú gůt vnd lehen gewonlich vnd recht ist ze lihent, ane geuerde, vnd vollefu^ertend die lehenschafft mit allen den worten werchen vnd geta^eten, so von recht oder von gewonhait dartzů geho^ert vnd noturfftig waz. Vnd dez allez ze offem vnd warem vrkúnd vnd sta^eter sicherhait geben wir vorgenant apt Kůn ze sant Gallen disen brief darúber besigelt mit v´nserm aygen angehenkten insigel v´ns vnd v´nserm gotzhus an allen v´nsern rechten vnscha^edlich vnd one schaden. Dis geschach vnd ist dierre brief geben an dem nechsten fritag vor st. Othmars tag nach Christus gebúrt drúzehenhundert jar, darnach in dem zway vnd achtzigosten jar.

Source Fulltext: Chartularium Sangallense X, Nr. 5933, S. 106-107.