Wir^a) Kůno von gottes gnâden abt des gotzhus ze sant Gallen¹, daz ân alles mittel zůgeho^ert dem stůl ze Rôme, sant Benedichten ordens in Costentzer || bystum veriehen vnd tůn kunt offenlich mit disem brieue allen, die den selben disen brief an sehent oder ho^erent lesen, das fúr v´ns kam ze Wil² in v´nser stat || an disem húttigen tag, alz dirr brief geben ist, der beschaiden kneht Cůnrat der Strâsman von Gabrais³ mit den erbern lúten Johansen dem Karrer || von Obrahaimen⁴ ietz vff dis zit sesshaft ze Růdenwille⁵ vnd mit V^olrich dem Keller von Mos⁶ des selben Johanses tochterman vnd offente vnd veriah do der selb Cůnrat Strâsman offenlich vor v´ns vnd sprach, daz er mit wolbedahtem můt von siner kumberhafti vnd redlichen not wegen verkoft hetti fúr sich vnd fúr alle sin erben vnd nahkomen den zehenden ze Gabrais, der da geho^eret in den hof ze Amptenzell⁷, der sin lehen wa^eri von v´ns vnd v´nserm vorgedahten gotzhus ze sant Gallen, vnd hetti ze koffenn geben ains rehten besta^eten ewigen vngeuarlichen vnd vnwiderru^eflichen kofs mit allen rehten nútzzen vnd gewonhaitten, so darzů vnd darin geho^erent, den vorgenanten Johansen Karrer vnd V^olrich dem Keller beden gemainlich vnd vnuerschaidenlich vnd allen iren erben vmb zwaintzig pfunt vnd vmb ain pfunt pfenning alles gůter vnd gena^emer Costentzer múns, dero er aller gar vnd gentzlich von in beden wa^eri gewert vnd bezalt an den stetten, da ers in sinen offenn redlichen schinbaren gůten nutz geben vnd bewendet hetti. Vnd nach der vergiht do gab v´ns do ze stund der selb Cůnrat Strâsman mit gůter wissentlicher vorbetrahtung den vorgeschriben zehenden ze Gabrais mit aller zůgeho^erd letklich vnd frilich vf an v´nser hand vnd batt vns mit flissigem ernst, den selben zehenden lihen den vorgenanten Johansen Karrer vnd V^olrich Keller vnd iren erben ze rehtem erblehen. Vnd von besundern gnaden verhortent wir sin bett vnd verlihen do ze stett den vorgeschriben zehenden mit aller zůgeho^erd den vorgenanten Johansen dem Karrer vnd V^olrich dem Keller beden gemainlich vnd iro erben vnd lihen och reht vnd redlich mit kraft dis briefs ze ainem rehten erblehen in allen dem rehten, alz a^endrú hof gu^eter vff dem selben hof ze Amptenzell verlihen sint, vnd doch och also v´ns vnd v´nsern nahkomen vnd v´nserm vorgeschriben gotzhus vnd och dem hof ze Amptenzell an allen v´nsren rehten nútzzen vnd zinsen in dirr sach gentzlich vnscha^edlich. Vnd des vnd hierúber ze ainer besta^eten warhait aller vorgeschribener ding haben wir abt Kůno da vorgenant v´nser insigel offenlich gehenkt an disen brief. Der geben ist in der vorgeschriben v´nser stat ze Wil an der na^ehsten mitwochen nach der alten vasnaht, do man zalt von gottes gebúrt drúzehenhundert jar, ahtzig jar, darnah in dem dritten jare.

Source Fulltext: Chartularium Sangallense X, Nr. 5947, S. 118-119.