In^a) dem namen gottes amen. Wir dis nachgeschriben des hailigen Ro^emschen richs stett Costentz, Rauenspurg¹, Lindow², V´berlingen³, sant Gallen, Pfullendorff⁴, Wangen⁵, Bůchorn⁶, Isyni⁷ vnd Lútkilch⁸ vff der Haid⁹ || tůnt kvnd vnd vergehen des offenlich an disem brief allen, die in ansehent oder ho^erent lesen, als sich der edel hoherborn herre graue Hainrich von Montfort herre ze Tettnang¹⁰ zů v´ns vnd zů v´nserm bund vmb den || Sê¹¹ verpflichtet vnd verbunden ha^vt, dv´ na^ehsten fúnff jar, die nach an ander koment, v´nser hobtman ze sinde vnd v´ns mit zehen spissen ze dienent, die selben ffúnff jar vnd darnach die nachga^enden fúnff jar || by dem selben v´nserm bund ze belibend vnd v´ns beraten vnd beholfen sin mit lip vnd mit gůt wider aller ma^englich vnd v´ns sin vestinen sloss vnd stett v´nser offenn húser sin, als dis alles der brief vo^elleklicher wiset, den er v´ns darumb mit sinem insigel besigelt geben ha^vt, daz wir im dawider och alle ainberlich verhaissen vnd gelobt habent, daz wir im die selben zehen jar mit lib vnd mit gůt wider aller ma^engelich beholfen sin so^ellent, vssgenomen v´nser herre der kv´nig vnd dem hailigen Ro^emschen rich sini reht ze tůnd, vnd so^ellent im och also beholfen sin bi gůten trúwen vngeuarlich vnd sont im och alle v´nser stett vnd sloss die wil sini offni húser sin. Vnd wa^er, daz die vier riuieren des grossen bundes ze sament zugent mit iro hobtlúten, dahin sol er och ziehen vnd by inen sitzen vnd daz best vnd daz erberost raten vnd helfen âne alle geuerde. Wa^er och, daz sin die nidern stette des grossen bundes begertint, daz si in fúrbass bruchen vnd an keren woltent danne ainen andrem hobtman, des sol er willig sin, vnd sont si im danne darumb als lieb tůn nach erkantnúss v´nsers bundes vmb den Sê, was si im darumb tůn so^ellent. Wa^er och, daz wir die obgenanten stett des bundes vmb den Sê v´nser spiess antderthin schikken wurdent, dazů sol er v´ns och sin zehen spiess schikken, als dik v´ns daz notdúrftig wirt. Wa^er och, daz er ainem sinem frúnd oder gesellen dienen wolt, daz mag er wol tůn, so wir sin oder siner spiess nit bedo^erftent, vssgenomen v´nser aigenossen, die in v´nserm bund sint, daz er wider die nit sin sol, vnd och also, gieng in von des selben dienstes wegen dekain stoss an, darzů soltent wir im nit beholfen sin. Wa^er och, daz in fúr ka^eme, daz man v´nser der obgenanten stett dekain bestúrmen oder no^etgen wo^elt, darzů sol er bi gůten trúwen vnuerzogenlich keren, verna^em er aber, daz der zog anderswahin keren wolt, danne in fúrkomen wa^er, dahin sol er sich och bi gůten trúwen âne fúrzug keren, es wa^er danne, daz wir die stett oder daz mertail vnder v´ns jena antderthin enbutent ze koment, daz sol er och âne fúrzug tůn. Wa^er och, daz er oder sin diener mit ir selbs handen jeman geuiengent vff dem veld, mit denen mv´gent si varen, als si dvnkt, daz es inen fůgklich sie, doch also, daz si dekainen ledig lassen sont, er versicher vnd versprech im e mit aiden vnd als ferre er danne vermag vngeuarlich, daz er wider v´ns noch wider den bund nit sie disen krieg weder mit werken ra^eten noch geta^eten, es wa^er danne so ferre, daz iro ainer geuangen wa^er, daz si ainen gen dem andern ledig liessent. Wa^er och, daz wir vnd och der obgenant graff Hainrich von Montfort dekain schloss oder vesti no^etigen oder bekv´nbern wurdent vnd daz wir die gewnnent vnd daz er vnd sin diener lút darinne viengent mit iren handen vnd daz wir die stett, die danne dabi wa^erent, die lút vnd die geuangen in der gewnnen stat scha^etzen woltent, so mv´gent der selb graff Hainrich von Montfort vnd sin diener och ir geuangen scha^etzen. Wa^er aber, daz wir die stett ze ra^vt wurdent, daz wir die gewnnen sta^et verwu^estlich halten woltent vnd die geuangen nit scha^etzen woltent, so sol och er vnd sin diener ir geuangen och nit scha^etzen. Wa^er och, daz der selb graff Hainrich von Montfort vnd sin diener dekainen edeln man in den selben gewnnen slossen viengent, der selb geuangen sol doch v´nser der stett gevangen sin. Wa^er och, daz der obgenant v´nser herre gra^vff Hainrich von Montfort oder sin diener dekainen geuangen viengent, mit dem der krieg erobert mo^eht werden, den selben geuangen sol der selb graff Hainrich manen sich ze antwurtent, in wely stat v´nsers bundes vmb den Se graff Hainrich wil, den selben geuangen so^ellen wir doch da also vngeuarlich geuangen halten, also daz man in nit entliben noch blo^ekken noch túrnen noch hert legen sol. Wa^er och, daz dekain stat oder herre zů v´ns in v´nsern bund ka^eme ald burgerreht in der selben v´nser stett enpfieng, wider die sol der selb v´nser herre gra^vff Hainrich von Montfort nit sin. Darzů haben wir och dem vorgenanten v´nserm herren graff Hainrich von Montfort bi gůten trúwen verhaissen, so er mit sinen spiessen in dekain v´nser stat, als vorgeschriben sta^vt, komet v´ns ze dienent, daz wir danne da im vnd den sinen herberg vnd geliger strow holtz vnd lieht âne sinen schaden vngeuarlich geben sont. Vnd wa^er, ob wir des obgenanten v´nsers herren graff Hainrichs bedo^erftent ze ritent, es wa^er ze ta^edingent oder in bottschaft ze schikkent, des sol er willig sin ze tůnd, wir so^ellent in aber danne vngeuarlich verkosten. Es sol och enkaine v´nser der obgenanten stett in den obgenanten zehen jarn dem obgenanten v´nserm herren gra^vff Hainrich von Montfort vnd sinen dienern, die er ietz hett, enkainen iro aigen man vogtman vnuerrechnoten amptman ald die inen stúrbar sint, in den obgenanten v´nsern stetten ze burger nit enpfahen, wele er aber hinnanhin disú zehen jar ze diener nemen wil, die sol er nemen mit v´nser der obgenanten stett willen wissent vnd ra^vt. Vnd ze warem vnd offem vrkv´nd aller dirre vorgeschriben ding geben wir die obgenanten stett Costentz, Rauenspurg, Lindow, V´berlingen, sant Gallen, Pfullendorff, Wangen, Bůchorn, Ysini vnd Lútkilche dem obgenanten v´nserm herren graff Hainrich von Montfort darúber disen brief mit v´nsern insigel besigelt. Dirre brief ze Costentz geben, do man von Cristes gebúrt zalt drúzehenhundert jar, darnach in dem vier vnd ahtzigosten jar, an sant Georyen abende in dem aberellen.

Source Fulltext: Chartularium Sangallense X, Nr. 6009, S. 184-186.