Allen, die disen brief sehent oder ho^erent lesen, kúnde ich Fridrich von Húnwile¹ ritter vnd ich Bilgri Russinger burger || ze Raprehswile² vnd veriehen beide offenlich mit disem brief, daz fúr V^olrich Warcus von Húnwile v´nser beider || amptman kamen an der stat, do er ze v´nser beider handen offenlich ze gerihte sass, Růdolf Kerman von Vegswile³ || v´nser vogtman einhalb vnd der geistlich herre herr Jacob von Rauenspurg⁴ closterherr vnd schafner des gotzhus ze Rúti⁵ anderhalb, vnd batte da der vorgenant Růdolf Kerman mit fúrsprechen ze erfarn, wie er dz nu vnd hernach kraft vnd maht hette mo^ehte gevertgen dem selben herren ze des vorgenanten gotzhus ze Rúti handen sehs viertel kernen jerliches geltes Zúrich mêss vff allem dem liggenden gůt, daz er des tags hatte, vnd da ward vmb gefraget vnd ward erteilt vff den eid mit gesamnoter vrteil, dz er sich der selben sehs fiertel kernen enzige vnd vff gêbe an den richtstab vnd sú der obgenant herr ze sines gotzhûs handen enpfienge von dem stab, vnd dz geschach dz der vorgenant Růdolf Kerman vff gab an den stab vnd enzêhe sich fúr sich vnd alle sin erben vnd vertget an dem stab dú egenanten sehs fiertel kernen jerliches geltes in allem dem liggenden gůt, dz er des tags hatt, es si hûs oder hôf genemptes oder vngenemptes, vnd enpfiengt do der obgenant herr Jacob ze sines gotzhus handen dú vorgenanten sehs fiertel kernen geltes, vnd do ward aber gefraget, ob dis vertgen wer geschehen, als reht wer, vnd ob es it billich kraft vnd maht hette nu vnd hernach, vnd daz ward och erteilt vff den eid mit gesamnoter vrteil, dz disi vertgung wol wer beschehen reht vnd redlich vnd dz es billich kraft vnd maht habe nu vnd hernach. Dar nah ward aber gefraget, ob ieman briefen bedo^erfte von diser vertgung wegen, ob man im die it billich gebe, vnd dz ward och erteilt vff den eid, dz man billich brief dar vmb gebe, wer ir bedo^erfte. Vnd dar vmb won alles daz, dz hie vor an disem brief geschriben stat, als reht vnd redlich als frag vnd vrteil gab, geschehen ist, so henken wir die obgenanten Fridrich von Húnwile ritter vnd Bilgri Rússinger von Raprehswile v´nserú insigel vnserm rehten vnschedlich an disen brief, der geben ward ze Raprehswile des jares, do man zalt von gottes gebúrt drúzehenhundert achzig jar, dar nah in dem vierden jar, an der nehsten mitwochen nach v´nser fro^vwen tag ze mittem o^vgsten, vnd waren da bi, do dis geschach, V^olrich Steiner von Ermiswile⁶, Ru^edi Suter von Widriswile⁷, Heinr. Múller von Kenmos⁸, Heinr. Wehli vsserm Húlistein⁹, V^olr. Hechler von Verrich¹⁰ vnd ander erber lúte.

Source Fulltext: Chartularium Sangallense X, Nr. 6032, S. 204.