Wir^a) des haligen Ro^emschen riches stett, die den bunde vmb den Sê¹ mit ain ander haltent, alz wir vf dis zit ze Bůchorn² bi ain ander gewesen sint, vergehint mit vrkúnd || dis briefes vor aller ma^engelich allen den, die disen brief an sehent oder ho^erent lesen, von der sto^ess zůsprúch vnd missehellung wegen, so die wisen fúrsichtigen vnser aitgenossen || amman burgermaister ra^et vnd die statt gemainlich ze Rauenspurg³ vnd diz nachgeschriben búrgen Wilhalm Maigenberg, Búrk Bader vnd die andern búrgen an ainem tail || vnd o^vch die wisen vnd beschaiden die von Wangen⁴ vnser aitgenossen von ir burger wegen Hanmans Isenbaches vnd Vrsellen siner elicher husfrowen an dem andern tail ze sament gehebt hant, alz die von Rauenspurg dem selben Isenbachen von ainer pene tusent guldin zů gesprochen hant nach lut vnd sag ir brief vnd alz vns die vorgenanten von Wangen von der selben sache wegen dik vnd vil gemant vnd angeru^effet hant vnd o^vch dar vmb vff diz zit gen Bůchorn gemant wurdent vnd o^vch die vorgenanten von Rauenspurg vnd ir búrgen vnd o^vch die von Wangen vnd o^vch ir vorgeschriben burger aller ir vorgenanter sto^ess vnd zůsprúch, die zwischen in biz^b) her vff gestanden vnd ergangen sint, frilich vnd vnbezwenlich vnd mit gůter vorbetrahtung hinder vns ze ainem spruch vnd vff vns ze den minnen komen vnd gegangen sint vnd o^vch betrahteklichen ze baiden tailen ir brief rede vnd widerred vnd alle ir vffzúg aygenlichen ingenomen vnd verho^eret habint, da habint wir si ze baiden tailen lieplich vnd frúntlich mit ain ander verainba^ert vnd verriht, alz hie nach aigenlich an disem brief geschriben stat, vnd also daz die vorgedahten von Rauenspurg amman burgermaister ra^et vnd die búrgen alle vnd o^vch die stat gemainlich riche vnd arm vnd die von Wangen vnd ir burger Hanman Isenbach vnd Vrsel sin elichiu husfrowe vnd alle, die ze diser sach haft vnd gewant sint, ain ander gůt luter frúnde wesen vnd sin sont vmb alle die sto^ess zůsprúch krieg vnd missehellung, die zwischen in biz vff disen hu^etigen tag, alz diser brief geben ist, vff gestanden vnd sich erloffen hettent, vnd sond ze baiden tailen frúnde ze frúnd gewinnen vnd die sach gegen ain ander niemermer gea^efern. Ze dem ersten haben wir vns erkent vnd gesprochen, daz der vorgenant Hanman Isenbach oder sin erben den vorgeschribnen von Rauenspurg fúr die vorgenanten pene vnd bůss geben sol vff nu die na^echsten mann fasenaht, die ze na^ehst kumpt nach dem tag, alz diser brief geben ist, sibenhundert pfunt vnd fúnfzig pfunt alles Italiger gůter werder gena^emer haller múnss, vnd wenn die vorgenanten von Rauenspurg der vorgenanten summe geltz vor dem zil, wenn daz wa^er, vff daz zil oder nach dem zil von dem beschriben Hanman Isenbachen oder von sinen erben gewert vnd bezalt wurdint, so sond si im dar nach vnuerzogenlich vnd a^vn alles verziehen vnd o^vch die búrgen vnd o^vch siner vorgedahter husfrowen oder iren erben a^elliu irú gelegnú gu^eter, wie die genant sint, die si im vnd siner husfrowen in disen widersa^etzzen entwert vnd verko^vft hant, vnd dar zů alle ir gúltan vnd brief, die si in verheft hettent, vnd sunderlich die zwen ho^vptbrief der pene vnd der búrgen brieff vnd dar zů, was varender hab noch hie vor wa^er oder noch funden vnd gezaiget wurd, daz vor ma^vlz nit verko^vft wa^er, daz vorgeschriben alles sond in die vorbedahten von Rauenspurg vnd ir búrgen wider geben entschlahen ledgen vnd von ma^engelichen ledig vnd lo^vs machen a^vn allen iren schaden. Vnd was o^vch die vorgeschriben von Rauenspurg oder ir búrgen vss win korn fihe gefider hus ra^vt oder vss ander farender hab, wie die genant wa^er, erlo^est hant vnd daz noch vor handen ist, daz sol dem egenanten Hanman Isenbachen an der vorgeschriben summ geltz ab gan. Wir habint vns mer erkent vnd gesprochen, daz die vorgenanten von Rauenspurg den beschribnen búrgen geben vnd bezalen sond vier vnd zwaintzig pfunt haller an dem schaden, den si diser sach genomen hant vnd des noch vssligent. Dar zů sont o^vch die vorgenanten von Rauenspurg Frikken dem Rintmanger sin huss wider schaffen vnd ine antwurten, daz im verko^vft ward, vnd sol o^vch biz vff sant Georgen tag den na^echsten a^vn zins in Isenbaches huss beliben, da wider sol aber der vorgenant Frikk Rintmanger den vorgenanten von Rauenspurg geben aht pfunt vnd zehen schilling alles gůter haller, die er vorma^vlz an der losung in genomen hett. Mer haben wir vns erkent vnd gesprochen, daz der vorgenant Hanman Isenbach in die stat ze Rauenspurg noch in irú geriht niemermer komen gan noch wandelen sol, es beschech dann mit irem gůtem willen. Vnd weder tail fúrbas ze dem andern ze sprechent hett oder ze schaffent gewunne, da sol ie der klagen tail dem andern ze sinen gerihten, da er gesessen ist, nach varen vnd reht da nemen vnd sol sich da rehtes benu^egen lassen. Was o^vch zinses vnd hůbgeltes sich vff sant Martis tag den na^echsten der hin ist vff der verko^vften gelegnú gu^eter sich ergangen hettent, die selben nútzz zins vnd hůbgelt der selben gu^eter sond die selben, die die vorgenanten gu^eter geko^vft hant, den selben nútzz vnd nit fúrbas haimen haben vnd ine nemen, vnd dann hin sond die vorgeschriben gu^eter dem beschriben Isenbachen oder sinen erben ledig vnd lo^vs sin. Vnd was o^vch jetweder tail diser sach biz her schadens genomen hat, den selben schaden sol o^vch iegelicher tail selber liden tragen vnd haben, vssgenomen alz vor an disem brief begriffen ist vnd a^vn alle gefa^erd. Wir vergehint o^vch mit disem brieff, daz der vorgenant Hanman Isenbach mit gůtem frigem willem vnd vnbezwenlich ain gelerten ayd ze den hailigen mit vff gebottenen vingern vor vns gesworn vnd getan hat, diz rihtung vnd disen spruch von wort ze wort, alz diser brief wiset vnd sait, wa^vr vnd sta^et ze haltent vnd ze folle fu^erent vnd da wider niemermer ze tu^end haimlich noch offenlichen noch kain sach fúrbas ze a^efernt weder mit worten noch mit werchen noch mit kainem geriht gaistlichem noch weltlichem, vnd wa der vorgenant Hanman Isenbach der stuk ains oder mer v^ebersa^ech bra^ech vnd v^eberfu^er, des wir nit getruwen, so sol er vns den stetten vnd dem bunde vnd o^vch den von Rauenspurg libes vnd gůtes verfallen sin a^vn alle widerred. Bi disem spruch sint gesin amman Hakk vnd Cůnr. in der Búnde von Cost(enz), der Haintzel vnd Ru^edi Mayger von Lindowe⁵, der Zan vnd Ranbu^ehel von V^eberlingen⁶, Garnleder vnd ain zunftmaister von sant Gallen, der Klenker von Pfullendorff⁷, Cůnrat Hagen vnd Ha^enny Wagenman von Bůchorn. Vnd dez ze vrkúnd hand die von Bůchorn von vnser gebet vnd aller haissentz wegen ir stat insigel an disen brief gehenket ze ainer zúgnúst diser sach. Der geben ist des jares, do man zalt von Cristus gebúrt drúzehenhundert vnd ahtzig jar, dar nach in dem vierden jar, an sant Thomas abent des hailigen zwo^elfbotten.

Source Fulltext: Chartularium Sangallense X, Nr. 6049, S. 220-222.