Wir Cůn von gottes gnaden abt des gotzhus ze sant Gallen¹, daz a^vn alles mittel zů geho^ert dem stůl ze Ro^vm, veriehent vnd tůnd kunt offenlich mit disem || brief allen, die in ansehent lesent oder ho^errent lesen, dz fúr vns kam ze Wil² in vnser statt an disem húttigen tag, alz dirre brief geben ist, die beschaiden || Růdolf von Barenberg³ vnd Cůnrat Búrster vnd zo^egtand vns von dem fromen vnd wolbeschaidnen Růdolf Swenden burgermaister ze || Zúrich⁴ ainen offenn brief, der mit sinem aigenn insigel ze end der geschrift besigelt was, an dem selben brief v´ns der vorgenant Růdolf vff sant an vnser hand den hof ze Tunrton⁵ gelegen mit allem dem rehten, so darzů geho^errent, der sin reht erblehen waz von vns vnd von vnsrem vorgenanten gotzhus ze sant Gallen vmb ainen erb zins ja^erlichs ie ze sant Gallen tag v´ns vnd vnserm vorgeda^vhten gotzhus dauon ze gebenn ain halb pfund wachs, vnd batt v´ns den selben hof ze Tunrton mit allem reht, so darzů geho^ert, lihen den vorgenanten Růdolfen von Barenberg vnd Cůnrat Búrster vnd iren lib erben ze rehtem erblehen, won er hett in den hof ze ko^vffen geben, darvmb erhorten wir do sin bett vnd habent mit wolbeda^vhtem můt den vorgenanten hof mit aller zůgeho^ert den vorgenanten Růdolf von Barenberg vnd Cůnrat dem Búrster vnd iren lib erben gelihen vnd lihent in o^vch mit vrkúnd diz brieues ze rehtem erblehen vnd in rehtz erblehens wise vnd doch och vmb den erb zins, den si v´ns vnd v´nserm vorgenanten gotzhus dauon geben vnd rihten sont, alz vorgenant sta^vt. Diz ist beschehen vnd vollfu^ert redlich vnd reht nach vnsers gotzhus gewonhait vnd reht, alz es krafft vnd maht ha^vt vnd haben sol nû vnd hie nach. Vnd ze ainem waren offenn vrkúnd haben wir vnser insigel offenlich gehenkt an disen brief. Der geben ist an dem na^ehsten samstag nach aller hailgen tag, do man zalt von Cristi gebúrt drúzehenhundert jar vnd vier vnd ahtzig.

Source Fulltext: Chartularium Sangallense X, Nr. 6043, S. 213.