Allen den, die disen brief ansehent oder ho^erent lesen, kúnde ich Heinrich von Kenelbache vogt || vnd wir der rat der statt ze Rapreswil¹ vnd veriehen offenlich an disem brief, daz || fúr v´ns kamen in offen gericht V^olrich Kamrer von Winterthur² ze einem teile vnd || Ru^edi Brunman burger ze Rapreswil ze dem andern teile, vnd offnot V^olrich Kamrer mit sinem fúrsprechen, daz er Ru^edin Brvnman recht vnd redlich ze ko^vffenne geben hetti daz hus vnd hofstat mit mistwúrfinen vnd mit aller rechtung vnd zů geho^erd, dz ze Rapreswil in der stat gelegen ist an der Weber gassen, sto^vst einunt an Haintzen Glarners hus vnd sto^vst andrunt an der Langbeininen hus vnd mit dem gedinge, daz jerlich ab dem selben hus vnd hofstat achtzehen pfening gand an die kilchen ze Rapreswil, vnd hier vmb so hett V^olrich Kamrer von Ru^edin Brunman empfangen in eins rechten ko^vfs wise sechs vnd zwentzig pfund pfening Zúricher múntz genger vnde genemer, der er gentzlich von im gewert were vnd in sinen gůten nutz bewendet hett nach siner vergicht, vnd also stůnd der selb V^olrich Kamrer dar an den stab vnd verzehe sich fúr sich vnd sin erben aller rechtung vordrung vnd ansprache, so er zů dem vorgenanten hus vnd hofstat ie gehatt oder iemer mer gewúnnen mo^echte mit geistlichen oder mit weltlichen gerichten oder an gericht ald mit deheinen sachen, vnd vertgotz Ru^edin Brunman vnd sinen erben in sin hand, als gericht vnd vrteile gabe. Es het o^vch V^olrich Kamrer mit gůten trúwen gelobt fúr sich vnd sin erben, dez vorgenanten hus vnd hofs recht wer ze sinne nach recht als lang, vntz daz Ru^edin Brvnman oder sin erben ein gewer da bi schirmen mag vnd daran habent ist nach der stat recht ze Rapreswil, an alle geuerde. Vnd dez ze warem vrkúnde alles, so an disem brief geschriben stat, won daz vor v´ns an offem gericht beschehen ist, alz gericht vnd vrteil gab vnd als v´ns vnd ander erber lúte, die hier vmb gefragt wurdent vnd erteiltent vff den eid, daz die důcht, daz es beschehen were, daz es billich kraft vnd macht hett nv vnd hie nach, da von so haben wir die vorgenanten der vogt vnd der rate der stat ze Rapreswil der selben v´nser stat insigel von dez gerichtez vnd durch beider teile bett wegen offenlich gehenkt an disen brief. Der geben ist an sant Dyonisien abend in dem iar, do man zalt von gottez gebúrt drúzehenhundert vnd achtzig jar vnd dar nach in dem vierden jar. Hie bi warent die ra^ete Růdolf Keller, Claus Walpersperg, Hans Vndergarten.

Source Fulltext: Chartularium Sangallense X, Nr. 6040, S. 210.