Nicolaus dei gratia episcopus Constantiensis¹ universis et singulis confratribus decanatus apud sanctum Gallum nostrae Constantiensis diocoesis salutem in domino. Cum, ut ex parte vestri nobis est expositum querelose, in vestra loca et vestras parochias hactenus etiam pro pecuniario debito et alias irrationabiliter sint prolata ecclesiastica interdicta, unde non tantum vos verum etiam vestri subditi contra iustitiam gravamina multa pertulistis, vosque petieritis per nos in hac parte oportunum remedium adhiberi, nos in quantum de iure valemus huiusmodi oportunum remedium adhiberi volentes vobis et cuilibet vestrum firmiter et districte praecipiendo mandamus, quatenus deinceps constitutionem felicis recordationis domini Bonifacii papae VIII, cuius tenor est talis: Proinde^a) attendentes, quod ut frequentius quamvis non sine causa sine culpa tamen multorum interdicti sententiae proferuntur, quamquam nonnulli sint iudices nimis prompti ad proferendas easdem etiam in negociis sine causa, que plus interdum ex cupiditatis quam charitatis radice perspicuis indiciis procedere arguuntur, queque tempore interdicti divina organa suspenduntur et laudes nec ecclesiastica sacramenta ministrantur, ut solent, tolluntur mortuis seu minuuntur suffragia, praesertim per oblationem frequentem hostiae salutaris, adolescentes et parvuli participantes rarius sacramenta minus inflammantur et solidantur in fide, fidelium tepescit devotio, haereses pullulant et multiplicantur pericula animarum, praesentis constitutionis providemus edicto, ut nulla provincia civitas castrum villa locus territorium vel districtus authoritate ordinaria vel delegata supponantur ecclesiastico interdicto pro pecuniario debito vel pro cuiusvis monetae vel pecuniae quantitate sub quacunque occasione vel causa seu quovis quaesito colore, pro eo maxime, quod ipsorum domini rectores seu officiales, quocunque nomine censeantur, vel incolae seu habitatores aut singulares personae ipsorum statutis vel statuendis ordinatis vel ordinandis terminis huiusmodi debitum seu quantitatem non solverunt hactenus aut inantea persolvant. Nos enim ex nunc decernimus irritum et inane, si secus hactenus existit attemptatum vel contigit attemptari, illudque revocamus omnino non obstantibus quibuscunque contractibus obligationibus pactis conventionibus compositionibus submissionibus fideiussionibus consensibus et sententiis super hoc habitis vel habendis iuramentorum pcenarum spiritualium et temporalium seu multarum vel quacunque alia firmitate vallatis, nisi talis suppositio interdicti hactenus foret facta vel inantea fieret de apostolicae sedis speciali licentia et expressa per ipsius sedis patentes litteras apparente^b), attendatis et custodiatis nec aliquod interdictum ecclesiasticum contra mentem et tenorem praescriptae constitutionis deinceps apostolica vel ordinaria seu quacunque alia authoritate promulgandum advertatis vel aliquatenus observetis. Datum Constantiae anno domini millesimo CCC.LXXX quinto, XVIII kal. maii, ind. VIII^a.

Source Fulltext: Chartularium Sangallense X, Nr. 6071, S. 251.