Wir Wenczlaw von gotes gnaden Romischer kunig zu allen czeiten merer des reichs vnd || kunig zu Beheim embieten den burgermeistern reten vnd gmeinden der stete Costnicz, || Auspurg, Nuremberg, Vlme, Esslingen, Rutlingen, Wil, Vberlingen, Memingen, Bibrach, Ra||uensburg, Lyndow, sant Gallen, Pfullendorf, Mulhusen, Kempten, Kouffburren, Lutkirch, Ysni, Wangen, Nortlingen, Rotenburg vff der Tawber, Gmunde, Halle, Haltprunn, Dinkespuhel, Winczheim, Weissenburg, Winpfen, Winsberg, Giengen, Aulen, Popfingen, Wil in Turgow, Buchorn vnd Buchow vnsern vnd des reichs lieben getrewen vnser gnade vnd alles gute. Wir haben dem edlen Hansen dem eltern lantgrafen zum Luthemberg³ vnserm rate vnd lieben getrewen bescheiden vfczuheben drey tawsent guldein von sulchen vierczig tawsent guldein, als ir vns von der juden wegen yeczunt zugeben pflichtig seit, douon so heissen vnd gebieten wir euch ernstlichen mit diesem brief, das ir dem egenanten lantgrafen dieselben drey tawsent guldein von der egenanten summen genczlichen vnd gar richtet vnd beczalet, wann so ir das getan habet, so sagen wir euch dreyer tawsent guldein der egenanten an den egenanten vierczig tawsent guldein genczlich vnd gar qweit ledig vnd loze. Mit vrkunt dicz briefs versigelt mit vnserm anhangendem insigel. Geben zum Burgleins noch Cristes geburde dreyczehenhundert jare vnd dornach in dem fumfvndachczigisten jaren des suntags vor sand Margreten tage, vnserr reiche des Behemischen in dem dreyvndczweinczigisten vnd des Romischen in dem czehenden jaren.

Source Fulltext: Chartularium Sangallense X, Nr. 6089, S. 275.