Ich^a) Jacob Růpreht, den man nemmet der Lo^ew, stat amman ze sant Gallen¹ tůn kunt vnd vergich offenlich mit disem brieue allen, die in || sehent lesent oder ho^erent lesen, daz fúr mich kam ze sant Gallen in der stat an dem tag, alz dirre brief geben ist, do ich offenlich ze ge||riht saz armen vnd richen, die beschaiden fro^vw Vrsella, Walther Kaltysens burgers ze sant Gallen elichi wirtinne, Hainrich Arnoltz sa^elgen || elichi tohter, vnd nam ze fúrsprechen Hainricen Garnleder den schriber o^vch burger ze sant Gallen, der offenot an ir stat vnd von ir wegen offenlich vor mir an gemainem geriht vnd sprach, daz si vnd Elzbeth Arnoltin ir êlichi swester den obern hof ze Ainswille² vff der egge vnd den nidern hof ze Ainswille, die ainhalb stossent an den hof ze No^echla³ vnd anderthalb an den Giessen⁴ vnd ze der dritten siten an daz Tal⁵ vnd stossent ze der vierden siten an Cůnratz gůt von Ainwille⁶ ze Atzzisperg⁷, die iro lehen wa^erint von dem erwirdigen gotzhus ze sant Gallen, mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit stok mit stain mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^ert, waz daz ist ald wie ez genemt ist, vnd dar zv^o mit sehszehen maltern baider korn sant Galler messes, die sv´ vff die selben ho^ef ze samen verlihen hettint, redlich vnd reht verko^vft vnd ze ko^vffenn geben hettint den beschaidnen fro Adelhaiten, Cůnrat Ho^ern sa^elgen wilunt burgers ze sant Gallen elichen wirtinnen, vnd Johansen Ho^ern ir êlichem sun o^vch burger ze sant Gallen baiden gemainlich vnd vnuerschaidenlich vnd iren erben, ob sv´ enwa^erint, vmb sibenzig phunt vnd vmb ahtenthalb phunt phenning gůter vnd gena^emer Costentzzer múnse, der sv´ gantzlich von in gewert wa^erint vnd an iren offenn nutz bekert hettint. Vnd won si von krankhait ir libes selber fúr minen herren abt Chůn abt dez vorgeschribenen gotzhus ze sant Gallen⁸ niht komen mo^eht, so wo^elt si die vorgeschribenen ho^ef vnd gu^eter mit allen rehten vnd mit aller zv^o geho^erde willeklich vf senden zv^o dez obgenanten lehenherren hant, vnd bat mich eruarn an ainer vrtail, wie si daz tůn so^elt vnd mo^eht, alz reht wa^er vnd daz ez kraft hett vnd haben mo^eht nv vnd o^vch hie nach. Daz tet ich vnd ward ertailt mit gemainer vrtail, daz si ainen vogt nemen so^elt mit dez vorgenanten ir elichen mannes willen an dem ring, wen si wo^elt, vnd daz si der ze drin malen vsser dez gerihtes ring fu^eren so^elt vnd si fragen, ob si ez willeklich vnd gern ta^et vnd tůn wo^elt, vnd daz si danne die selben ho^ef vnd gu^eter mit allen rehten vnd mit aller zv^o geho^erde mit ir vnd mit dez selben ir vogtes handen vnd o^vch mit dez gerihtes stab in aines erberen mannes hant, der o^vch lehen hetti von dem selben gotzhus ze sant Gallen, vf geben vnd vf senden so^elt zv^o dez vorgenanten lehenherren hant vnd in bitten, daz er sv´ lihi den vorgenanten fro Adelhaiten Ho^erinen vnd Johansen ir êlichem sun baiden gemainlich vnd vnuerschaidenlich ze rehtem lehen vnd ze ainer rehten gemainde, vnd daz ez danne also wol kraft vnd maht hetti nach dem rehten. Do nam si ze vogt v´ber diz sache mit dez vorgenanten ir êlichen mannes willen Laurentzzen Arnolt ir anerbornen vogt o^vch burger ze sant Gallen, der fůrt si ze drin malen vsser dez gerihtes ring vnd fragot si, alz ertailt waz, ob si ez willeklich vnd gern ta^et vnd tůn wo^elt. Der sait ze ieklichem mal bi sinem aide, daz si spra^ech, daz si ez vnbezwungenlich ta^et vnd willeklich vnd gern tůn wo^elt. Vnd gab o^vch do ze stette die vorgenant Vrsella Kaltysnin an offenem geriht willeklich frilich vnd vnbezwungenlich mit ir vnd mit dez vorgenanten Laurentzzen Arnoltz ir vogtes handen vnd o^vch mit dez gerihtes stab mit gelerten worten, alz reht sitte vnd gewonlich waz vnd alz o^vch mit gemainer vrtail ertailt ward, die vorgeschribenen ho^ef vnd gu^eter den obern hof ze Ainswille vff der egge vnd den nidern hof ze Ainswille mit allen rehten vnd mit aller zv^o geho^erde, alz vor ist beschaiden, vf zv^o Hainrices Garnleders da vorgenemt hant, der o^vch dez vorgeschribenen gotzhus ze sant Gallen lehen man ist, also daz er die selben vorgeschribenen ho^ef vnd gu^eter mit allen rehten vnd mit aller zv^o geho^erde vf geben vnd vertgen so^elt zv^o dez vorgenanten mines herren abt Chůn abt dez vorgeschribenen gotzhus ze sant Gallen hant vnd in bitten, daz er die vorgeschribenen ho^ef vnd gu^eter mit allen rehten vnd mit aller zv^o geho^erde lihi den vorgenemten fro Adelhaiten Ho^erinen vnd Johansen Ho^ern ir êlichem sun baiden gemainlich vnd vnuerschaidenlich ze rehtem lehen vnd ze ainer rehten gemainde. Vnd ze vrkúnd der warhait aller der vorgeschribenen dinge vnd vergiht so han ich Jacob Růpreht amman da vorgenemt von dez gerihtes wegen min insigel mit vrtail offenlich gehenkt an disen brief. Wir die vorgenemten Walther Kaltysen, Vrsella sin êlichi wirtinne, Laurentz Arnolt ir vogt vnd Hainrice Garnleder fúrsprech in der vorgeschribenen sache veriehent ainer gantzzer warhait aller der dinge, so von v´ns an disem brief da vorgeschriben stânt, vnd ze merer sicherhait der selben dinge so haben wir o^vch v´nserú insigel gehenkt an disen brief. Der geben ist ze sant Gallen an dem na^ehsten fritag vor sant Margarethen tag ze mittem ho^ewat in dem jar, do man zalt von Cristus gebúrt drúzehenhundert jar, ahtzig jar vnd darnach in dem fúnften jâre.

Source Fulltext: Chartularium Sangallense X, Nr. 6091, S. 277-279.