Wir^a) Wenczlaw von gots gnaden Romischer kunig zu allen zeiten merer des reichs vnd kunig zu Beheim bekennen vnd tun kunt || offenlichen mit diesem briefe allen, die in sehen oder horen lezen, das wir mit vnsern vnd des reichs steten vnd liben getrewen || Costnicz, Augspurg, Basel, Nuremberg, Vlme, Esslingen³, Rutlingen⁴, Rotwil⁵, Wil⁶, Vberlingen⁷, Memingen⁸, Bibrach⁹, Rauenspurg¹⁰, || Lindow¹¹, sant Gallen, Pfullendorf¹², Mulhusen¹³, Kempten¹⁴, Koufburren¹⁵, Lutkyrch¹⁶, Isyn¹⁷, Wangen¹⁸, Nordlingen¹⁹, Rotenburg vf der Tauber²⁰, Gmunde²¹, Halle²², Hailtprunn²³, Dinkelspuhel²⁴, Winczhein²⁵, Weissenburg²⁶, Wimpfen²⁷, Winsperg²⁸, Giengen²⁹, Aulen³⁰, Bophingen³¹, Wil in Turgow³², Buchorn³³ vnd Buchow³⁴ von der juden wegen vnserr vnd des reichs camerknechte mit gutem willen rat vnserr vnd des reichs fursten edlen vnd liben getrewen in teidingen vberein komen sein, also das die obgenanten vnsere vnd des reiches stete alle gmeinlichen vnd ir igliche besunder vmb alles das, des sie der obgenanten juden vnserr camerknechte bis vf diese zeite genossen hand oder hinnen bis vf vnserr frowen tage lichtmesse, der schirist komet, vnd dannen vber zwei gancze jare die nehsten von des geltes wegen, das sie vns von vnsern juden geschaffet haben, niessen werden angeuerde in vnsere vnd des reichs hulde genomen vnd meynen noch wollen dorumb keinen zuspruch zu in haben noch nyman anders von vnsern wegen. Ouch wollen wir, ob das wer, das der juden dheiner, die in den egenanten vnsern vnd des reichs steten wonhaftig vnd sesshaft sind, von in in disen leufen vnd ee das sie vns das gelt, das sie von iren wegen verheissen haben, genczlichen beczalt haben, hinder fursten herren oder andere stete entwichen oder fluhen, wohin das were, das man in dieselben juden mit leibe vnd mit gute vnuerczogenlichen widergeben vnd antworten sol. Vnd wer es, das sich ymand, es were furste grafe herre ritter knechte stete oder ander lute, dawider seczten, des wollen wir den obgenanten steten getrewlich beholfen sein. Wir meinen ouch, ob dhein jude in der vorgeschriben frist in dhein freyung oder gleite qweme, das sie die dofur nicht schirmen sullen, wann das die obgenanten stete gmeinlich oder besunder die wol dorauss nemen sullen vnengolten vnserr vnd des reichs vnd allermeniclichs. Dorumb gebieten wir allen fursten geistlichen vnd werntlichen grafen freyen rittern knechten dinstluten steten merkten burgern vnd allen andern vnsern vnd des reichs vndertanen, das nymand oder ir keiner wider diese vnsere gnade kome vnd tue in keinen wege, als libe in sey vnser vnd des reichs swere vngnade zuvermeiden. Mit vrkunt dicz briefs versigelt mit vnserr kuniglichen maiestat insigel. Geben zum Burgleins³⁵ noch Crists geburd dreiczenhundert jare vnd dornach in dem funfevndachczigisten jare des suntags noch sand Margarethen tage, vnserr reiche des Behmischen in dem XXIII vnd des Romischen in dem czehenden jaren.

Source Fulltext: Chartularium Sangallense X, Nr. 6095, S. 285-286.