Ich^a) Elsa Smitz von Hochdorff¹ gesessen ze Búrron² tůn kunt alrmenliche(m) mit vrkúnd disz briefes, alz || vmb die vordrung vnd ansprach, so ich hatte an den spittal ze Raperswilr³ von erbes wegen, so an mich vallen || solte von mines vetter Heinrichs Bertschingers seligen wegen von Raperswilr, da gespreche ich fúr mich vnd fúr || min erben den egenanten spittal vnd alle sine nachkomen dez selben erbes quit lidig vnd los vnd loben fúr mich vnd fúr min erben, den vorgenanten spittal noch alle sin nachkomen von disz hin von dez vorgenanten erbes wegen niemer me an ze sprechenne noch ze bekúmerrenne weder mit geistlichen noch mit weltlichen gerichten noch ane gericht, vnd erzien^b) mich o^vch fúr mich vnd fúr min erben hie wider aller helfe geistlichs vnd weltlichs gerichtes alles geschribnen vnd vngeschribnen rechtz vnd aller der fúnden vnd vsziechung, die nv funden sint oder noch funden mo^echten werden, da mitte ich oder ieman von minen wegen hie wider getůn mo^echte in deheinen weg. Es ist o^vch zewissende, dz diz alles ist beschechen mit hant gunst willen vnd wissend Richhartz zem Brunnen burger vnd gessen^c) ze Búrron mines elichen mannes vnd rechten vogtz, dez ich Richhart zem Brúnnen vorgenant vergich offenlich an disem brieff, vnd dar vmb loben ich o^vch fúr mich vnd fúr min erben, wider die^d) egenant lidiglassung niemer zetu^enne weder mit worten noch mit werken mit reten noch mit geteten heimlich noch offenlich noch nieman ze gehellenne, der da wider tůn wo^elte, bi gůten trúwen ane alle geuerde. Dis dinges sint gezúge Heini zem Bach, Hensli Maiger, Ru^edi Ruchtis burger vnd gesessen ze Búrron vnd ander erber lúten genůg, vnd dúrch dz diz alles war si vnd stette belib, so hein wir Elsa Smitz vnd Richhart zem Brúnnen ernte vorgenant erbetten den fromen notuesten ritter her Johans Greflin gesessen ze Búrron, dz er sin ingesigel fu'r vns an disen brieff gehengket hat, dz ich Johans Grefli ritter vorgenant mich vergich getan han durch bette willen der egenanten Elsen vnd Richhartz elúten. Dis geschach vnd wart dirre brieff gegeben an dem nechsten mentag vor v´nsers herren vffart des jares, do man zalte von gottes gebúrte thuseng^e) drúhundert fúnf vnd achtzig jar.

Source Fulltext: Chartularium Sangallense X, Nr. 6073, S. 253.