Wir Wenczlaw von gotes gnaden Romischer kunig zu allen czeiten merer des reichs vnd kunig zu Beheim embieten || den burgermeistern reten vnd gemeinden der stete Costnicz, Auspurg, Nuremberg, Vlme, Esslingen³, Rutlingen⁴, Wil⁵, Vberlin||gen⁶, Memingen⁷, Bibrach⁸, Rauenspurg⁹, Lyndow¹⁰, sant Gallen, Pfullendorf¹¹, Mulhusen¹², Kempten¹³, Koufburren¹⁴, Lutkirchen¹⁵, Ysni¹⁶, || Wangen¹⁷, Nordlingen¹⁸, Rotemburg vff der Tawber¹⁹, Gmunde²⁰, Halle²¹, Hallprunn²², Dinkelspuhel²³, Winsheim²⁴, Weissenburg²⁵, Wimpfen²⁶, Winsperg²⁷, Giengen²⁸, Aulen²⁹, Bopfingen³⁰, Wil in Turgow³¹, Buchorn³² vnd Buchow³³ vnsern vnd des reichs lieben getrewen vnser gnade vnd alles gute. Wir haben dem edlen Gerlach von Hoenloch³⁴ vnserm lieben getrewen bescheiden vfczuheben viertawsent vnd dreyhundert guldein von sulcher summen geldes vierczigtawsent guldein, als ir vns von der juden wegen yeczunt zugeben pflictig seit, douon so heissen vnd gebieten wir euch ernstlichen vnd vesticlichen mit diesem briefe, das ir dem egenanten Gerlach von Hoenloch die egenanten viertawsent vnd dreyhundert guldein von der egenanten summen genczlichen richten vnd beczalen sullet, wann so ir das getan habt, so sagen wir euch der egenanten viertawsent vnd dreyhundert guldein an der egenanten summen genczlichen vnd gar qweit ledig vnd loze. Mit vrkunt dicz briefs versigelt mit vnserr kuniglichen maiestat insigel. Geben zum Burgleins³⁵ noch Cristes geburde dreytzenhundert jare vnd dornach in dem fumfvndachtzigisten jaren, des nehsten suntags vor sand Gallen tage, vnserr reiche des Behemischen in dem dreyvndczweinczigisten vnd des Romischen in dem czehenden jaren.

Source Fulltext: Chartularium Sangallense X, Nr. 6113, S. 301-302.