Ich^a) Hans Húbschli burger ze Rauenspurg¹ verigich^b) vnd tůn kunt aller menglichem mit vrkúnd ditz offenen brieffz, || daz ich an des erberer mans Hainr. Webers amans stat ze offem gericht vor dem rat ze Rauenspurg gesessen bin vnd das fúr || mich vnd das gericht komen sint Hainrich Vogt vom Lúpoltz² mit sinem fursprechen Cůnrat Wirt an ainem tail || vnd V^olrich Werhmaister v´nser mitburger mit Hainrich Gúndel sinem fúrsprechen, do klegt der ben(empt) Hainrich Vogt ze dem ben(empten) V^olrich Werhmaister vnd erzoget da ainen brieff vnd bat den da ze lesent vnd bedinget im da klag red vnd wider red vff, der selb brieff och mit recht vnd mit vrtail gelesen vnd verho^eret wart, vnd der seit, das V^olrich Werhmaister recht vnd redlich ze koufent gegeben hett Ru^efen dem Vogt von Sumerow³ sinem vatter sa^eligen etwifil gelegener gu^eter, der etlichú lehen wa^erent von dem hailigen rich vnd etlichú von dem gotzhus ze sant Gallen, vnd hett im^c) och geben ain vogtye v´ber simlich lút, die oh lehen wa^eren von dem gotzhus sant Gallen, vnd hett im die geben mit allen sinen rechten nútzen vnd gewonhaiten, als er die vntz her hett innegehebt, vnd so^elt och der lehen getriver trager sin vntz vff die zit, das er si geuertget von dem lehenherren, da wa^er er zůgeuaren vnd hett der lút ainen, der in die selben vogtye gehortt, geuallet vnd hett sich des gůtz vnderzogen, als ver vntz daz der Ra^vtzenhuser mit im ta^edingen můs, dar zů er nit recht hett, wan er sich der selben vogtye mit allen ieren rechten nútzen vnd gewonhaiten gentzlich verzigen hett, vnd bat ze erfaren mit vrtail, was er da och von dem hett in genomen, ob er im daz it billich so^elt wider keren, da wider antwrt der benempt V^olrich Werhmaister vnd sprâch, er redti im wider sinem brieff nitz vnd logent nit, er hett im die vogtye v´ber die selben lút gegeben mit allen ieren rechten vnd nútzen, als er si vor hett inne gehebt, vnd sumti in daran nit, aber daz gotzhus sant Gallen hett v´ber die selben lút dú recht, welas von todes wegen ab gieng, das in genoschaft nit gesessen wa^er, das denn das gotzhus ze sant Gallen mit dem tailti, waz es gůtz verliesi, vnd dú selben recht hett er von dem gotzhus sant Gallen vnd getruwet got, er so^elt in och bi den selben sinen rechten lan beliben, dar vmb nach klag vnd widerred vnd nach des brieffz sag, wan der seit, das er im die selben vogtye v´ber die selben lút hett gegeben mit allen ieren rechten vnd nútzen, als er sin do hett inn gehebt, do wart ertailet mit merer vrtail, daz och V^olrich Werhmaister den benempten Hainrich den von Vogt^d) vnd sin erben an der selben vogtie so^elt billich vngesumpt lan, vnd was er von dem Ratzenhuser hett ingenomen, dz er das Hainr. dem Vogt so^elt widerkeren gentzlich, hett aber das gotzhus ze sant Gallen zů den selben lúten reht, dz das Hainrich der Vogt verantwrti gen dem selben gotzhus, dz er denn wa^vndi, dz er recht ta^eti. Des gerichtz můtet do Hainrich Vogt ains brieffz, der och im mit merer vrtail ertailet wart do ze maul, dar vmb gib ich im disen brieff von des gerichtz wegen besigelt mit sinem aigenn angehenkten insigel. Der geben wart an dem ma^entag vor sant Valentis tag, anno domini M° CCC°. octagesimo sexto.

Source Fulltext: Chartularium Sangallense X, Nr. 6127, S. 317-318.