Wir^a) diz nâchgenempten Wetzel vnd Andres die Entziswiller burger ze sant Gallen gebrůder tu^egint kunt vnd veriehent offenlich mit || disem brieue allen den, die in sehent lesent oder ho^erent lesen, fúr vns vnd fúr alle vnser êrben, daz die beschaiden Adelhait || Cůntzen von Hûsen¹ êlichi hûsfrow, Hainrich von Husen ir êlicher sun vnd Ma^ehthilt Katherinen Kúnginen êlichi tochter, die vnser || recht aigen wârent, sich selber mit libe vnd mit gůt vnd mit allen rechten vnd ansprâchen, die wir zů inen hattont ald gehaben mochtont, von vns recht vnd rêdlich geko^vfft hant an daz êrwirdig gotzhus ze sant Gallen vmb ainlof phunt gůter vnd genger haller, dero wir gantzlich von inen gewert sint vnd enphangen habent vnd an vnsern offen nutz bewendet, vnd habent o^vch die selben lúte Adelhaiden von Hûsen, Hainrichen ir sun vnd Ma^ehthilten Katherinen Kúnginen tochter gar vnd gantzlich mit lib vnd mit gůt vnd mit allen rechten vnd ansprâchen, die wir zů inen hattont ald haben mochtent, recht vnd rêdlich vfgeben geuêrtgot, als recht sitte vnd gewonlich waz vnd als es kraft vnd maht sol vnd mag han, zů dez êrwirdigen vnsers gena^edigen herren abt Chůnen abt dez vorgeschribenn gotzhus ze sant Gallen² vnd zů dez selben gotzhus handen, also vnd in dem rechten, daz die vorgenempten Adelhait Cůntzen von Hûsen êlichi hûsfrow, Hainrich von Husen ir sun vnd Ma^ehthilt Katherinen Kúnginen tohter von Husen gar vnd gantzlich mit lib vnd mit gůt vnd mit allen rechten vnd ansprâchen, die wir zů inen hattont ald gehaben mochtont, an daz vorgeschriben gotzhus ze sant Gallen geho^eren vnd dez aigen sin sont, vnd dâr vmb so haben wir vns willeklich verzigen vnd verzihent vns mit disem brief gantzlich vnd gar fúr vns vnd fúr alle vnser êrben der vorgenempten Adelhaiden von Hûsen, Hainrichs ir suns vnd Ma^ehthilten Katherinen Kúnginen tochter von Hûsen gar vnd gantzlich mit lib vnd mit gůt vnd mit allen rechten aller aigenschaft aller lêhenschaft aller besatzzung aller kuntschaft aller gewêr lút vnd brief alles gaistlichen vnd weltlichen rechten aller vordrunge vnd ansprâchen aller recht vnd rechtunge, so wir oder vnser êrben an den zů den vnd von der vorg(enanten) Adelhaiden von Hûsen, Hainrichs ir suns vnd Mahthilten Katherinen Kúnginen tohter lib oder gůt von aigenschaft ald von lêhens wegen ie gehebt habent ald hienâch iemer gehaben oder gewúnnen mo^echtint. Vnd ze offenem wâren vrkúnde aller dirre vorgeschribenn dinge vnd gedinge so haben wir die vorgenempten Wetzel vnd Andres die Entziswiller gebrůder baid vnsrú insigel fúr vns vnd vnser êrben offenlich an disen brief gehenket. Der geben wart ze sant Gallen, do von Cristus gebúrt wârent drútzehenhundert jâr, achtzig jâr vnd dâr nach in dem sechsten jâre, an dem na^ehsten fritag nâch vnsers herren vffart tag.

Source Fulltext: Chartularium Sangallense X, Nr. 6144, S. 335-336.