Allen^a) den, die disen brief sehent lesent oder ho^erent lesen, kúnd ich Johans Hertzog von Trogen² vnd vergich || offenlich mit disem brieue, daz ich schuldig bin vnd reht vnd redlich gelten sol vnd min erben den erberen wolbe||schaidnen Bartholome dem Blarrer, V^olrich Ru^edger vnd V^olrich Ko^echler phleger der siechen dez spittals ze sant || Gallen³ an dez selben spittals stat vnd zv^o sinen handen allen drien gemainlich vnd vnuerschaidenlich vnd iren nachkomen zehen phunt phenning gůter vnd gena^emer Costentzzer múnse fúr den schaden, den der selb spittal von minen wegen genomen vnd enphangen hat, der selben phenning sol ich in drithalb phunt geben vnd rihten ze der fron vasten, die nach dez hailigen crútzzes tag ze herbst, alz ez erho^eht ward, die nv na^ehst wirt, aller schierost kumpt nach dem tag, alz dirre brief geben ist, vnd sol in dannenhin alle frôn vasten ze ieklicher frôn vasten besunder, die darnâch ân vnderlass aller schierost nach ain ander koment, o^vch drithalb phunt phenning der vorgeschribenen múnse geben vnd rihten, vntz daz ich sv´ also der vorgeschribenen zehen phunt phenning gůter Costentzzer múnse gantzlich gewert vnd vsgeriht han, vnd han in darumb zv^o mir ze merer sicherhait ze búrgen geben diz nachgenemten erberen lút Růdolf Hertzogen an den O^esten⁴ minen brůder, Růdolf Nidrer von Trogen, Walther Wilhelms von Benlen⁵ vnd Jacob den Bra^endler ab Ringlisberg⁶, die diz búrgschaft alle vnuerschaidenlich vff sich genomen vnd gelobt hant, mit so^elicher beschaidenhait vnd gedinge, wa^er daz ich in die vorgeschribenen phenning niht rihti vnd ga^ebi gantzlich vnd gar ze den ziln vnd ze den tagen, alz vor ist beschaiden, wie sv´ denne nach ieklichem der vorgeschribenen zil dez selben gůtes, darumb sich denn tag ergangen hant, ze gewonlichem schaden koment, sv´ nement ez an cristan an juden an ko^effen an wehseln vff linwât oder an anderm schaden, ald ob sv´ sin ze schaden ka^emint von zerung von klag mit botten mit brieuen oder von dehainen andern sachen, von dem schaden vnd o^vch von dem ho^vpgůt sol ich vnd min erben, ob ich enbin, vnd o^vch die vorgenemten búrgen sv´ vnd iro nachkomen gantzlich vnd gar lo^esen vnd ledig machen. Ich han o^vch gelobt fúr mich vnd min erben, den vorgenemten búrgen iren schaden gantzlich ab ze tu^enne, in den sv´ koment von der vorgeschribenen búrgschaft wegen. Vnd ze vrkúnd der warhait aller der vorgeschribenen dinge vnd gedinge so han ich erbetten den beschaiden Hugen Růpreht burger ze sant Gallen, daz er sin insigel fúr mich vnd fúr alle min erben gehenkt hat an disen brief, won ich aigens insigels niht han, doch im vnd allen sinen erben gantzlich vnscha^edlich. Darnach veriehent wir die vorgenemten búrgen alle ainer gantzzer warhait aller der dinge, so von v´ns an disem brief da vorgeschriben stânt, vnd ze merer sicherhait der selben dinge so han ich Jacob Bra^endler da vorgenemt o^vch min insigel gehenkt an disen brief, vnd won wir die andern vorgenemten búrgen Růdolf Hertzog, Růdolf Nidrer, Walther Wilhelms aigener insigel niht habent, so haben wir v´ns willeklich gebunden vnder dez obgenanten Hugen Růprehtz insigel, wâr vnd sta^et ze lassenn alles, daz von v´ns da vorgeschriben stat an disem brief. Der geben ist ze sant Gallen an dem na^ehsten donstag vor dem^b) hailigen tag ze phingsten in dem jar, do man zalt von Cristus gebúrt drúzehenhundert jâr, ahtzig jar vnd darnach in dem sehsten jare, da ze gegen warent die erbern Johans Widmer vnd Eberhart Schirmer, die von dem rât ze sant Gallen darzů geben vnd geschikt wûrdent, vnd ander erber lút vil.

Source Fulltext: Chartularium Sangallense X, Nr. 6147, S. 339-340.