Ich^a) Herman von der Braiten Landenberg¹ sesshaft ze Hagenwile² vergich vnd tůn kund allermenglichem || mit disem brief, als mir die erwirdigen min gna^edigen herren Cůno von gottes gnaden abt³ || vnd das capitel gemainlich des gotzhus ze sant Gallen die gnad getan ha^vnt, daz sú sich || verzigen ha^vnt des wehsels, so si von ires gotzhus wegen ha^vnt zů disen nachgeschribnen minen lúten Margrethen Peters in der Múli von Roggwila⁴ elichen wirten, Margrethen, Iten, Hainrichen vnd Margethen ir elichen kinden, alz der brief wol wist, den ich dar vmb von inan inne ha^vn, daz ich dar vmb mit gůter vorbetrahtung vnd beschaidenhait mich wilklich gegen denselben minen gna^edigen herren vnd gegen allen iren nachkomen vnd och gegen dem obgenemten irem gotzhus ledklich vnd frilich verzigen ha^vn vnd verzich vnd entwer mich och redlich vnd recht mit disem brief fúr mich vnd fúr alle min erben alles des wehsels rechtung vordrung vnd ansprach, so ich ald min erben mit dem obgenanten gotzhus ald mit dehainen desselben gotzhus lúten von der obgenanten miner lút wegen Margrethen Peters in der Múli elichen wirtenn, Margrethen, Iten, Hainrichen vnd Margrethen ir elichen kind ietzo ha^vnt ald hernach iemer gehaben ald gewinnen mo^ehtent, vnd sagent si dar vmb ledig mit vrkúnd dis briefs. Vnd des ze offem vrkúnd der warhait so ha^vn ich min insigel fúr mich vnd fúr alle min erben offenlich gehenkt an disen brief. Der geben ist an sant Peters aubent, do man zalt von Cristus gebúrt drúzehenhundert vnd ahtzig jar, dar nach in dem sibenden jar.

Source Fulltext: Chartularium Sangallense X, Nr. 6194, S. 395-396.