Sanctissimo in Christo patri ac domino domino Vrbano digna dei providencia pape sexto sua devota creatura et humilis orator Cůno¹ abbas monasterii sancti Galli ordinis sancti Benedicti Constanciensis diocesis sedi apostolice immediate subiecti se ad devota pedum oscula beatorum cum oracionibus humilibus, utinam apud illum efficacibus in celis, cuius vicarius estis in terris. Sanctissime pater, cum venerabilis dominus Burkardus de Hewen² prepositus et canonicus ecclesie Constanciensis, cuius vita et conversacio mihi ab antiquo note existunt, a qua quidem ecclesia reverendus pater dominus Nicolaus³ pridem episcopus Constanciensis ad ecclesiam Olomicensem canonice est translatus, vinculo, quo ipse ecclesie Constanciensi tenebatur, dissoluto, in episcopum et pastorem Constanciensem per capitulum ipsius ecclesie Constanciensis concorditer sit electus seu a vestra s(anctitate) supradicta petitus eidem, s(anctitatem) v(estram) supplico devote, quatenus ipsa eundem dominum Burkardum in episcopum et pastorem Constanciensem promovere dignetur. Licet viri probi de gremio ipsius ecclesie Constanciensis existant, tamen ipse eosdem ydoneitate precellit et eciam potens et nobilis est, scismaticis et hereticis e vestre sanctitati adversantibus resistere et sibi obviare ac huiusmodi scisma et heresim in diocesi Constanciensi extirpare valens, quod eciam ipsum et quod alias locutione presit et prosit, non dubito facturum. Cum hoc vestram clemenciam altissimus incolomem conservet. Datum in dicto monasterio sancti Galli, quod vix ad mediam dietam distat ab ecclesia Constanciensi memorata, die lune ante festum penthecostes anno vestri pontificatus X^mo.

Source Fulltext: Chartularium Sangallense X, Nr. 6186, S. 385-386.