Allen^a) den, die disen brief ansehent lesent oder ho^erent lesen, kúnden wir Bartholome Blârrer, V^olrich Ru^edger vnd V^olrich Ko^echler pfleger || vnd maister der siechen des spitals ze sant Gallen¹ vnd veriehent offenlich an disem brief fúr v´ns vnd fúr alle v´nser nachkomen, das || wir mit gůter vorbetrahtunge vnd mit gůtem ainberem willen an des vorgedahten spitals stat den nachgenemten erberen lúten Johansen || Veser von Nidrenmúli² vnd V^olrichen sinem sun baiden gemainlich vnd vnuerschaidenlich reht vnd rêdlich verlihen habent vnd lihent inen vnd allen iren erben mit disem brief den hof ze Obrensorendal³, der des vorgedahten spitals reht aigen ist vnd^b) gelegen ist ob Byschoffcelle⁴, mit allen rehten nútzen vnd gewonhaiten vnd mit allem dem, so von reht ald von gewonhait darzů vnd darin geho^ert, es sie genemptz ald vngenemptz gesůchtz oder vngesůchtz wissentz oder vnwissentz, ze ainem rehten sta^eten êrbzinslehen vmb ainen sta^eten zins, mit so^elicher beschaidenhait vnd in dem rehten, das die vorgenemten Johans Veser vnd V^olrich sin sun vnd iro erben, ob sú enwa^erint, den vorgenemten hof ze Obrensorendal mit allen rehten vnd mit aller zůgeho^erde in êren vnd vnwůsteklich haben vnd niessen sont, vnd sont dem vorgedahten spital ze sant Gallen von dem selben hof aller ia^erklich ie ze sant Gallen tag drie mut kernen Costentzer messes zwai malter haber gůtes vnd vngeuârliches Bischoffceller messes ain pfunt pfenning gůter vnd gena^emer Costentzer múns vier hu^enr fúnfzig aiger vnd von den blúweln zwai viertail kernen Bischoffceller messes alles gůtes vnd vngeuârliches kernen vnd den korherren ze Bischoffcelle zehen schilling pfenning gůter Costentzer múnse vnd niht mêr ân fúrzug vnd âne alle mindrung ze rehtem ia^erlichen zins gantzlich vnd gar geben rihten vnd antwúrten in dem vorgeschriben spital ze sant Gallen âne allen des selben spitals schaden. Vnd habent darvmb von den obgenanten Johansen Veser vnd V^olrichen sinem sun ze rehtem êrschatz genomen vnd enpfangen drissig pfunt pfenning gůter vnd gena^emer Costentzer múnse, die in des selben spitals offenn nutz komen sint. Vnd wa^er, das dem vorgedahten spital der vorgeschriben zins dehaines iâres versessen oder verzogen wurdi, als lang vntz das ain zins den andern erloffen hetti, so ist mit namen bedingot, das dann der vorgenemt hof ze Obrensorendal mit allen rehten vnd zůgeho^erden dem selben spital gantzlich vnd aller dinge ledig vnd los vnd zinsvellig sin vnd beliben sol, also das wir vnd v´nser nachkomen an des vorgenemten spitals stat den selben hof dannanhin mit allen rehten vnd zůgeho^erden verko^vffen versetzen besetzen vnd entsetzen haben vnd niessen vnd damit tůn sont vnd mugent, was wir wellent oder was vns dunkt, das dem selben spital fůgklich ald nutzlich sie ald gesin mug, vnd sont die obgenanten Johans Veser noch V^olrich sin sun noch kain iro erben v´ns noch den selben spital daran nit sûmen noch irren noch in kain wise beswa^eren noch ieman von iro wegen. Es ist o^vch berett worden, das der vorgedaht spital vff dem vorgenemten hof ze Obrensorendal holtz wol ho^vwen sol vnd mag ze zimberrenn, wenne vnd als dik er des bedarff, âne alle geua^erde. Och ist mit namen bedingot, bescha^eh das wir oder v´nser nachkomen, welhi dann des vorgedahten spitals pfleger sint, von des selben spitals rehten des vorgeschribnen hofs ze Obrensorendal gân vnd die verko^vffen woltint, das wir danne oder v´nser nachkomen des selben spitals vorgeschribnen reht den vorgenemten Johansen Veser vnd V^olrichen sinem sun oder iren erben, ob si ensint, des êrsten vail bieten vnd vor ma^englichem ze ko^vffenn geben so^ellin fúnf schilling pfenning gůter Costentzer múnse na^eher denn iemann andre, ob sú sie ko^vffen wellent, wa^er aber, das sú sie nit ko^vffen wo^eltint ald mo^ehtint, so mugent wir oder v´nser nâchkomen dannanhin des selben spitals reht wol ze ko^vffenn geben, wem wir wellent, inen vnd iren erben an allen iren rehten gantzlich vnscha^edlich. Bescha^eh o^vch, das die vorgenemten Johans Veser vnd V^olrich sin sun ald iro erben, ob sú enwa^erint, dehaines iâres von iren rehten des vorgeschriben hofs vnd êrblehens gan vnd die verko^vffen woltint, so sont si o^vch die selben irú reht des vorgedahten spitals pflegern des ersten vail bieten vnd vor ma^englichem ze ko^vffenn geben o^vch fúnf schilling pfenning der vorgeschribnen múnse na^eher denn iemann andre, ob wir si ko^vffen wellent, woltint aber wir oder v´nser nâchkomen sie nit ko^vffen, so mugent si dannanhin die selben irú reht wol ze ko^vffenn geben, wem si wellent, dem vorgedahten spital an allen sinen rehten gantzlich vnscha^edlich. Vnd ze vrkúnd der wârhait aller vorgeschribner dinge vnd gedinge so habent wir die vorgenemten pfleger alle drie v´nsrú insigel vnd des vorgedahten spitals insigel fúr vns vnd fúr alle v´nser nachkomen offenlich gehenkt an disen brief. Der geben ist ze sant Gallen an sant Siluesters tag des hailgen bapstes in dem iâre, do man zalte von Cristus gebúrt drúzehen hundert jar vnd darnach in dem aht vnd ahtzigosten jâre.

Source Fulltext: Chartularium Sangallense X, Nr. 6236, S. 457-459.