Wir die burgermaister rat vnd burger gemainlichen der stet Augspurg, Nu^ernberg vnd Vlm fu^er vns vnd alle ander stet, die den bund mit vns haltend in Swaben, in Franken vnd in Bayrn, bekennen offenlich mit disem brief vnd tun kunt allen den, die in sehent oder ho^erent lesen, vmb die frewntlichen stallung, die der aller durchlewhtigstig fu^erst vnd herr her Wentzl(aw) von gotz gnaden Ro^emischer ku^enig zu allen zeiten merer dez reichs vnd kunig zu Beh(eim) vnser lieber gned(iger) herre zwischen den hochgepornen fursten vnd herren hern Stephan von gots gnaden pfalzgraue bey Rein vnd hertzog in Bayrn¹, hern Albreht von gotz gnaden hertzog zu O^esterrich zu Steyrn zu Kreinden ze Crain graue zu Tyrol² etc. vnd hern Frid(rich) von gots gnaden burggraue zu Nu^ernberg³ vnd auch allen andern kurfu^ersten vnd auch fu^ersten geistlichen vnd weltlichen grauen herren dienstlewten rittern knehten vnd steten, wie die genant sint, die sich zu dem selben vnserm gnedigen herren dem Ro^emischen ku^enig verainyget hand, vnd auch zwischen vns vorgenanten steten vnd allen andern steten, die mit vns verbunden sind, wie die genant sind, gesetzt vnd gemaht hett, vnd die selben frewntlichen stallung zwischen vns nu vff die nehsten pfingsten vz get, daz vnsers herren dez Ro^emischen ku^enigs rat die selben stallung von vnsers herren dez ku^enigs wegen durch vnser vnd gemains landes nutz vnd frides willen zwischen vnser vnd den vorgenanten fu^ersten vnd herren erlengt hant von den selben pfingsten, die nehst koment, biz vff sant Go^ergen tag, der darnach schierst kumpt, vnd von dem selben sant Go^ergen tag vber ein gantz iar nehst darnach volgend, daz div in den landen begriffen vnd kreissen, alz die hernach begriffen vnd benempt sind, vnd auch mit den artikeln, die her nachgeschriben stand, von all den siten getrewelichen gehalten geleist vnd wollefu^ert werden sullen on alle geuerde. Bey dem ersten, wer ez sach, daz iemant von den vorgenanten fu^ersten vnd herren oder die in zu versprechen stand, ez wem herren ritter kneht oder stet oder wer die sind, die ietzo in irer aynung sind oder noch zu in komen, angegryffen oder beschedigt wu^erden vff wazzer oder vff landen mit rawb mit mord mit prand oder mit vnrehten widersagen, daz dann wir vorgenanten stet oder wer zu vns zeho^eret in darzu getrewlichen beraten vnd beholfen sein su^ellent, alzbald wir oder die vnsern dez innan oder gewar werdent oder von in oder von den, den der schade wideruarn oder geschehen wer, oder von iemant anders von iren wegen darumb gemant werden zu frischer getat mit nachylen mit zuschreien vnd mit allen andern sachen, die darzu geho^erent, nach allen irem besten von einem mittentag biz an den andern gleicher werz, alz ob daz vns selb angieng vnd vns selber wideruarn vnd beschehen wer, on alle geuerde. Wer es aber sach, daz solch geschiht vnd angriffe also geschaffen vnd gestalt wern, daz die zu frischer tat niht so^elten oder mo^ehten awzgetragen werden, so sullent der oder die, den so^elcher schad wideruarn vnd geschehen ist, die sach bringen mit clag an den oder die fu^ersten oder herren, der diener oder burger er ist oder dem er zu versprechen stet oder ob daz einem fu^ersten oder herren selb anging, bekennet sich denn ein fu^erst vff sein fu^erstlich trew vnd ere ein graue oder ander herr vff seinen ayd, daz im oder den seinen, alz dauorgeschriben stet, an den vorgenanten vier stu^ecken ir einem oder mer vnreht beschehen sey, so sullen vnd mu^egen die selben fu^ersten vnd herren, von welicher partey die wem, vns vorgenanten stet, welich denn dem angriffe aller nehst gelegen vnd gesezzen sein, darumb zusprechen vnd vmb hilf manen, vnd su^elln wir dann den vorgenanten fu^ersten vnd herren L. mit spiessen erber wol bezeugter leut zu rozze on alle geuerde schiken vnd bestellen vnd die auch nach der selben irer ermanung in den nehsten XIIII tagen von haws awsreiten vnd auch fu^erderlich vollreiten su^ellen an die stet, die vns denn von in benennet vnd verku^endet werden, on alle geuerd, vnd su^ellen auch diz tun vff vnser aigen kost schaden vnd verlust alzlang, biz daz so^elicher schad abgeleit vnd widerkert wirt, on alle geuerd. Wer es aber sach, daz man von su^elcher geschiht wegen mit der zal des obges(chriben) volkes ze veld ligent wu^erde vnd daz dann daselbst volk vff dem velde besorgt wu^erde, daz man sie abtrieben oder v^eber sie vallend wo^elte, so su^ellent dann daz volk der vorgenanten fu^ersten vnd herren oder die zu in geho^erent, alz vorgeschriben stet, drye schiedman von irer partey darzu bescheiden vnd geben vnd auch vnser vorgenante stet wolk, daz bey in vff dem veld ist, auch drey schiedman darzu bescheiden vnd geben, vnd bekennent sich dann die selben sechs oder daz merer teil vnter in vff ir ayd, daz sie mer volks zu su^elchen sachen bedu^erffen vnd notu^erftig sein, daz su^ellent sie denn vns vorgenanten steten vnd auch den egenanten fu^ersten vnd herren verku^enden, so su^ellent dann wir die selben vorgenanten stet L. mit gleen zu vnsern ersten L. mit gleen vnd auch die vorgenanten fu^ersten vnd herren von irer partey auch L. mit gleen zu iren ersten L. mit gleen darzu schiken vnd senden vnuerzogenlich vnd on alle geuerd, vnd wer ez, daz die vorgenanten herren vnd fu^ersten vnd herren mit der selben hilff, so die manunge ir wer vnd von iren wegen dannen ging, iht slozze oder geuangner gewu^ennen, mit den selben slozzen vnd geuangen mu^egent sie gefarn vnd tun, waz sie wo^ellen, on vnser vnd der vnsern irrung vnd widerred, also doch, daz sie versorgen sullen, so sie best mu^egent, vngeuerlichen, daz vns vorgenanten steten noch den vnsern gemainlichen noch besunder, alz vorgeschriben stet, dhein schad dauon mer vff stand noch widerfar on alle geuerd, doch daz die vorgenanten fu^ersten vnd herren, waz kostung oder schad darvber ging von gezeug oder werklewt wegen, vz rihten vnd bezaln su^ellent vns vnd vnsern partey on schad, also doch bescheidenlichen, ob die vorgenanten fu^ersten vnd herren oder die iren, die zu in geho^erent, vnser vorgenanten stete, die der geschiht aller nehst gesezzen sind, gezeug oder werklewt darzu bedo^erften vnd vns darumb bitten oder manen wu^erden, daz wir in den denn darzu fu^erderlichen leihen su^ellent on widerred vnd den auch sie bey vns holen vnd vns den wider antwu^erten su^ellen vff ir aigen kost on vnsern schaden on alle geuerd. Item vnd wann wir vorgenanten stet von den vorgenanten fu^ersten vnd herren vmb hilff gemant werden, e daz wir in vmb hilf zu gesprochen heten, so sullen wir in daz vorgenant v´nser volk schiken vnd senden. Wie doch daz wer, daz wir selb vff die selben zeit zu schaffen heten, also daz mit namen die erst manung vor gan sol vnd doch mit su^elchem vnterscheid, wenn wir von den vorgenanten fu^ersten vnd herren ir einem oder mer gemant werden vnd in vnser hilff gesent haben, daz wir dann den andern fursten vnd herren diser eynung keins volks schuldig sein ze schiken alzlang, biz daz vnser volk, daz wir in zehilff gesent heten, wider heim komen ist, on alle geuerd. Wer es aber, daz dhein su^elchs slozz oder stat, die die vorgenanten fu^ersten vnd herren mit vnser hilf vmb die vorgeschriben sach also besitzen vnd bestellen so^elten oder mu^esten von den vor genanten fursten oder herren oder von den, die ietzo sind by in oder fu^erbaz zu in komen, von ir einem oder mer zu lehen rurten oder von in versatzt oder verpfant wern oder ir offne sloz wem, so mu^egen die oder die selben, die oder den daz also angieng, solchen rawb vnd schaden, alz darvz vnd dorvm geschehen wer, rihten bekern vnd bezaln nach erkantnu^ezze dez oder der, den solcher schad widerfarn vnd geschehen wer, den sie doch ku^entlichen machen vnd beweisen su^ellent, die dez oder der fu^ersten oder herren v^eber der stet oder stat rete, dem der beschedigt zu geho^ert, burger ist oder zu versprechen stat, weiset vff ir aid, daz der den schaden ku^entlich machen vnd beweisen su^elle, daz sol er tun vnd sol auch dabey bleiben, wer aber der beschediget ein fremder man, so su^ellent dez fu^ersten oder herren ret, in dez lande vnd gebieten daz geschehe, oder der stet oder stat ra^ete, die dez ersten darumb angriffen wu^erden, vff ir aid bekennet, wie er den schaden ku^entlichen machen vnd bewisein su^elle, e daz man fu^er daz sloz gezogen wer, vnd daz slozz denn damit an sich nemen, also doch, daz er den andern steten reten in grafen herren rittern knehten von baiden partien gut sicherheit da fur tun sol, daz in zeit diser veraynung in darawz noch darein dhein schad mer beschehe. Wer ez aber, daz daz nit beschehe noch vollendet wu^erd, e daz man zu veld gezogen wer, so sol man auch denn volluarn vnd ziehen vnd zu den sachen greiffen vnd tun, alz vorgeschriben stat, on alle geuerde. Beschehen auch so^elch angriff vff den strassen vff wasser oder vff dem lande an kawflu^eten an gesten an lantfarern an pilgryn oder an andern geistlichen oder werblichen lewten, so su^ellen die vorgenanten fu^ersten vnd herren vnd die bey vns sind dem angriff aller nehst vnd beste gesezzen vnd gelegen sind oder in dez landen vnd gebieten daz geschehen wer vnd auch wir vorgenanten stete, welichs tail vnder vns dez denn dez ersten erinnert oder von den oder dem, den solcher schad wideruarn wer vnd beschehen, oder von iemant anders von im wegen darumb angeru^effet oder ermant wu^erd zu frischer getat darzu greiffen vnd tag, alz vorgeschriben stat, mo^eht aber daz zu frischer getat nit awzgetragen werden, so su^ellent die vorenanten fu^ersten vnd herren vnd auch wir vorgenanten stet, welichs tail denn dez ersten darumb angeruffet oder gemant wu^erd oder in dez fu^ersten oder herren landen vnd gebiet daz geschehen wer, die andern partey darumb manen vnd vmb hilff zu sprechen, vnd die selb hilff auch denne vnuerzogenlichen darzu beschehen sol in aller der mazz, alz vorgeschriben stat, on alle geuerde. Item wer ez, daz von den vorgenanten sachen dhein krieg vfferstu^end, da su^ellent sich die vorgenanten fu^ersten vnd herren vnd die zu in geho^erent niht friden su^enen noch vor worten in dhein weise, sie haben dann vns vorgenanten stet vnd die vnsern in der selben sůn vnd richtung verfangen vnd begriffen gleich in selb on alle geuerd. Auch sullent wir vorgenanten stet noch die vnsern der vorgenanten fu^ersten vnd herren noch der iren, die ietzo bey in sind oder noch furbz zu in komen, ez sein fursten grauen herren ritter oder kneht on geuerd, die sie in den vorgenanten vier stu^ecken ir einem oder mer angriffen, in vnsern steten vnd slozzen niht halten weder hawsen noch hofen weder speisen ezzen noch trenken noch geverlichen hanthaben noch hinschieben die zeit awz in dhein weise on geuerde. Item wer ez, daz ez zu su^elchen gesessen kriegen oder zugen ko^em von dieser vereynunge wegen, so sol man der frewnd gůt kirchen noch geistlichen lewten noch iren guten dheinen schaden tun noch die brennen on alle geuerd, doch mag man essend speiz nemen zu bescheidenheit, waz man der bedarff on alle geuerd niht wider hinder sich schicken, also doch, daz man awz kirchen vnd awzz clo^estern nihtzit nemen sol vnd dez gentzlich vberhabt sein su^ellent. Vnd vmb daz, daz dise frewntlich stallung zwischen vns beider seit die egeschriben zeit dester frewntlicher gehalten werd, so haben wir vns dez mit den vorgenanten fu^ersten vnd herren auch gu^etlich vereinet, also wer ez, daz in zeiten diser gu^etlicheit iht pru^ech oder sto^ezz zwischen den vorgenanten fu^ersten vnd herren oder irer diener vnd die in zu versprechen stend vff ein seit vnd auch vns steten vnd den vnsern, die vns zeuersprechen stand, vff die andern seit vns einem oder mer fu^erbaz vff erstu^end oder wachsen wu^erden, daz wir die denn gen einander awztragen vnd rehtfertigen su^ellen. Wer ez, daz vns vorgenanten stete oder die vnsern daz gen den egenanten fu^ersten vnd herren oder gen den iren anging, welichen fu^ersten oder herren denn die sach anrurent wu^erd oder die im zu versprechen stunden, so sullent die stet oder stat vnter vns oder die iren, die daz anging, einen gemainen man dar vmb nemen vzzer dez selben oder der andern fu^ersten vnd herren rete dez vierdentails, zu den denn der selb fu^erst oder herre, den die sach anrurt, getailt vnd geordiniert ist, welichen sie denn went, vnd dez gleichen wider vmb, ob dhein fu^erst oder herre oder die iren, die in zu versprechen stand, iht sto^ezz oder pru^ech furbaz gewunnen an vns vorgenanten stet oder an den vnsern, die vns zu versprechen stu^enden, an vnser einer oder mer, so sullent vnd mu^egent die selben fu^ersten vnd herren oder die iren darumb auch einen gemaynen man nemen vszer der selben stat oder der andern stete geswornen reten dez vierdenteils, daz denn zu der selben stat auch getailt vnd geordiniert ist, die selb tailung vnd ordnung von baiden seiten auch hernach begriffen stat, vnd welicher also zu einem gemainen man genomen vnd erweit wirt, ez beschehe von den vorgenanten fu^ersten herren oder von vns steten, so sol mit namen der selb fu^erst oder herre die stat, vszer dez oder der rete der denn genomen wirt, mit im schaffen vnd fu^egen, daz er sich dez an nem vnd auch daz tu, ez wer dann, daz der selb vor diser aynung verlobt het reht zu sprechen on geuerd, daz er daz gesprechen mo^eht bei seinem ayd, so sol man einen andern nemen in allem vorges(chriben) rehten, vnd der selb gemain man sol auch denn baiden tailn nach dem, so er erfordert wirt, in den nehsten XIIII tagen darnach gelegen tag bescheiden on alle geuerd an su^elch stet, die in denn baidenthalb bequemlich sein, vnd sol vnd mag ieglich partey einen oder zwen schiedman zu dem gemainen man setzen vnd geben, vnd die selben fu^enf oder dry sullent denn die sach zwischen in mit einem freuntlichen rehten awzrihten vnd daz reht vff ir aid vszsprechen vnd entscheiden, ob sie daz sust mit der minne zwischen in niht gu^etlichen gerichten mu^egent, vnd sullen auch der gemain vnd die schiedlewt da von einander nit komen, e daz sie der sach awztrag geben haben mit minne oder mit dem rehten, alz vorgeschriben stat, on alle geuerd. Welher schiedman auch dem gemainen mainen sein reht vnd vrteil beschriben vnd versigelt gibt, der mag von dannen reiten, wenn er wil, vnd waz denn die drey oder fu^enf daz merteil vnter in sprechen zu dem rehten, daz sol der gemain man ieglichem tail daz, dez von im begert, beschriben vnd versigelt geben, vnd daz sullen denn beid partey vest vnd stet halten vnd gentzlichen vollfu^eren, vnd welicher fu^erst herre oder stat oder die iren, die daz anging, daz niht halten vnd vollfu^eren wo^elten, waz also awzgesprochen vnd entscheiden wu^erd, alz vorges(chriben) stat, so sullen wir vorgenanten stet vnd auch die egenanten fu^ersten vnd herren an die selben, die daz niht halten wo^elten, einander getrewlichen beholfen sein, daz ez geschehe, so sie dez ermant werden von dem tail, dem man daz nit halten wo^elt, in aller der masse, alz vor von der hilff geschriben stat, doch ist in disen sachen mit namen awzgesetzt, ob ein burger zu dem andern fu^erbaz ihtz zu sprechen gewu^enne, von welicher partey daz wer, daz die daz mit frewntlichen rehten gen einander vsztragen sullent in den gerihten vnd an den steten, do ieglicher burger, den man denn zu spriht, gesessen ist. Item vnd wer es, daz iht v^ebergriffe furbaz beschehen in diser gu^etlicheit, vff wedrer seit oder partey daz beschehe, den selben vbergriff su^ellen der oder die selben stet oder stat oder der fu^erst oder der herre, der oder die daz getan heten, oder den der oder die, die daz getan heten, ze versprechen stu^enden, vnuerzogenlichen vnd on alle geuerd schaffen widerkert vnd widertan, alzbald daz ervordert wirt, in XIIII tagen den nehsten darnach vnd vor e daz man zu dem rehten kom, doch awzgenomen verbriefter schuld vnd vnlawgenberer gu^elt vnd auch hubgelt vogtreht stewr vnd zins, daz sullent niht v^ebergriff noch der vorgenanten vier stu^ek dheins heissen noch sein, vnd mag man darumb wol angreiffen, daz darvff nit gemant werden sol, doch daz die, die von solcher sach wegen angreiffen, mit den selben pfanden pfentlich su^elln geuarn on alle geuerd. Dar zu ist auch v^ebertragen, daz wir vorgenanten stet vnd die mit vns diser einung sind den vorgenanten fu^ersten grauen herren rittern vnd knehten, die in ir aynung sind, dhein ir samenschaft oder besunder stet merkt do^erffer oder weiler niht enpfahen su^ellent in vnsern bund aynung oder ze burger, alz lang die obgenant stallung wert, doch mu^egen wir vorgenanten bede partey wol einnemen vnd enpfahen ainzilig personen, alz daz von alter her komen ist, vngeuerlichen. Auch sol ieglicher vorgenant tail kainen pfalburger innemen noch enpfahen, alz lang die obgenant stallung wert, on alle geuerd. Item auch sullent die vorgenanten fu^ersten grauen herren ritter kneht vnd auch stet diser eynung beleiben bey allen iren herscheften landen lewten freyheiten guten gewonheiten vnd auch gerihten geistlichen vnd werltlichen, alz sie die von alter herbraht vnd gehabt haben, on alle geuerd, doch daz alle obgenanten artikel von baiden tailn die vorgenant zeit vszgehalten sullen werden on alle geuerde. Item so sind ditz die tailung vnd ordnunge der fursten vnd herren partey, alz sie sich in vier partey getailt hant, dez ersten daz ku^enig riche zu Beheim vnd waz zu der cronen dez selben ku^enigrichs mit allen fu^ersten grauen herren landen oder leuten geho^eret, die mark zu Brandenburg, die hertzogtum zu Sachsen vnd zu Lunenburg. Item die ander partey die ertzbyscho^eff zu Meintz vnd zu Co^eln, hertzog Rupr(echt) der elter, hertzog Rupr(echt) der iu^enger⁴, der lantgraf von Hessen⁵ vnd margraf Růdolf von Baden⁶. Item die dritt partey hertzog Albr(echt) von O^esterrich, her Stephan, her Fridr(ich) vnd her Johans gebrůder hertzogen in Bairn⁷, die bischo^eff von Straszburg, von Augspurg vnd von Regenspurg, graf Eberhart von Wu^ertenberg⁸, Ludwig vnd Fridr(ich) grafen zu O^etingen⁹. Item die vierd partey die byscho^eff von Babenberg¹⁰ vnd von Wirtzburg, Balthasar, Wilhalm vnd ir vetern markgrauen zu Meichsen vnd lantgrafen zu Du^eringen¹¹, hertzog Rupr(echt) der iu^engst¹² vnd Fridr(ich) burggraue zu Nu^ernberg. So ist disz die tailung vnd ordnunge der stet, alz si sich in viere getailt vnd geordiniert hant, bey den ersten Regenspurg, Augspurg, Nu^ernberg, No^erdlingen¹³, Rotenburg¹⁴, Dynkelspuhel¹⁵, Winshein¹⁶, Sweinfu^ert¹⁷, Weissenburg¹⁸ vnd Popfingen¹⁹, daz ander vierteil Basel, Costentz, V^eberlingen²⁰, Lindaw²¹, Rauenspurg²², Mulnhawsen²³, sant Gallen, Pfullendorff²⁴, Wangen²⁵ vnd Buchhorn²⁶, daz dritt Ezzlingen²⁷, Reutlingen²⁸, Rotweil²⁹, Weil³⁰, Halle³¹, Hailprunne³², Gemu^end³³, Wimpfen³⁴, Weinsperg³⁵ vnd Aulun³⁶, daz vier Vlm, Memmingen³⁷, Bybrach³⁸, Kempten³⁹, Kawffburn⁴⁰, Leutkirchen⁴¹, Isni⁴², Giengen⁴³ vnd Buchawe⁴⁴. So sein ditz die begriff vnd terminyen, in den die hilf beschehen sol nach gelegenheit der lande, dez ersten an dem Hawenstein⁴⁵ an vnd daz gebirg fu^er sich vmbhin vnd an der herren land von Bairn vnd dadurch der herren land von Bairn vmb hin vntz fu^er den Behaimer Wald⁴⁶ vnd vor dem Beheimer Wald ab vntz an den Duringer Walt⁴⁷ vnd dauon ab vntz an die Lo^ene⁴⁸ vnd v^eber die Lo^ene vntz an der Schelter Wald⁴⁹ vnd von dem Schelter Wald vntz gen Drydorff⁵⁰ vnd von Drydorff vntz gen Hadmar⁵¹ vnd von Hadmar vntz gen Muntbur⁵² vnd von Muntpur vntz gen Lonstein⁵³ vnd von Lonstein dannan v^eberhin vntz vff denn Huntzrugken⁵⁴ vnd da fu^ersich vmb hin vntz gen Kayserslawter⁵⁵ vnd dannen vffhin vntz gen Tagspurg⁵⁶ vnd dannen daz gebirg fu^ersich vff vntz gen Rotenburg⁵⁷ vnd dannan wider vffhin vntz wider an den Hawenstein, doch nemen wir vorgenanten stet all gemainlichen in diser stallung vnd vereinung vsz den aller durchleuhtigsten fu^ersten vnd herren hern Wentzlaw von gotz gnaden Romischen ku^enig zu allen zeiten merer dez reichs vnd etc. vnsern lieben gnedigen herrn vnd daz heilig Romisch reich, darzu nemen wir awz den hohwirdigen fu^ersten vnd herr hern Pilgrim von gotz gnaden ertzbischoff zu Saltzburg⁵⁸ dez heiligen stuls zu Rom legat vnser gnedig herren vnd auch vnser aydgenossen die Reinyschen stet, auch nemen wir vorgenante stet aber awz alle vnd ieglich aynung vnd verpu^entnu^esse, die wir vor vntereinander haben, oder wer darein zu vns komet oder sich zu vns verbindet, ez sein fu^ersten grauen herren ritter oder kneht oder stet oder die wir ietzo gen andern fu^ersten grauen herren rittern knehten oder steten gemainlichen oder besunder gelobt gemaht oder begriffen haben, vnd sol auch vns mit namen dise aynung vnd stallung an den selben bu^enden vnd veraynungen kainen schaden bring, vnd wir su^ellen auch der geniessen, alz die selben bu^end vnd aynung daz vszweisent vnd begriffen sind, on alle geuerde. Mit vrkund ditz briefs versigelt mit vnser der vorgenanten dreyer stet aigen insigeln, die wir fu^er vns vnd all ander stet vnsers punds vnd wer dar in zu vns geho^ert an disen brief gebruchen. Der geben ist zu Margentheim⁵⁹ dez nehsten zinstags vor sant Martins tag anno domini M°CCC°LXXXVII°.

Source Fulltext: Chartularium Sangallense X, Nr. 6224, S. 433-439.