Allen^a) den, die disen brief ansehent lesent oder ho^erent lesen, kúnde ich Johans Midensun burger ze sant Gallen vnd || vergich offenlich an disem brief von der zwai vnd sehtzig pfunt pfenning Costenzer múnse wegen, die die wisen || ersamen der burgermaister vnd der rat vnd burger gemainlich ze sant Gallen mir vnd Margareten miner || swester schuldig sint¹, das mir die selben burgermaister der rat vnd burger ze sant Gallen an minem tail der selben geltschulde zehen pfunt pfenning gůter Costenzer múnse gantzlich vnd gar geben vnd bezalt hant, vnd darvmb sage ich die selben burger vnd die stat ze sant Gallen vnd ir erben vnd nachkomen der selben zehen pfunt pfenning gantzlich quit ledig vnd los fúr mich vnd min erben. Ich vergich o^vch, das mir die selben burger vnd die stat ze sant Gallen bi minem tail der vorgedahten zwai vnd sehtzig pfunt pfenning ho^vptgůtes nit mer schuldig sint denn ains vnd zwainzig pfunt pfenning der vorgeschribnen múnse. Vnd des alles ze offemm wâren vrkúnde so han ich erbetten den beschaiden Cůnrat den Keller von Bu^esenhofen² och burger ze sant Gallen, das er sin insigel fúr mich vnd min erben gehenkt hat an disen brief, vnder das selb insigel ich mich vnd min erben willeklich gebunden han aller vorgeschribener ding, won ich aigens insigels nit hatt, vnd ich der selb Cůnrat Keller von Bu^esenhofen vergich offenlich, das ich von bett des obgenanten Johansen Midensuns min insigel fúr in gehenkt han an disen brief mir vnd minen erben vnscha^edlich. Dirr brief ist geben an sant Franciscus tag, do man zalt von Cristus gebúrt drúzehenhundert jar, ahtzig jâr vnd darnach in dem sibenden jâre.

Source Fulltext: Chartularium Sangallense X, Nr. 6212, S. 419-420.