Wir Albrecht von gottes gnaden herczog zu Osterrich¹ zu Styr zu Kernden vnd ze Crain graff zu Tiroll etc. bekennen das, das wir durch begird vnd flissig bitt der edlen vnser lieben mumen Itten von Tockenberg greffin zu Hohemberg² vnsern gunst dar zu geben mit dem brieff, das sie die achthalb hundert pfund vnd funffczehen pfund haller, die sie nach irer brieff sag inn saczs wyse hat, als vns ist furgelegt, vff Altheim³ dem dorff vnd den hoffstetten vnd gartten zinßen in vnser statt zu Horw⁴, mag machen vnd geben an den spital in der selben statt zu Horw vns vnd vnseren erben onschedlich an der losung vnd den rechten, die wir billich daran haben sollen vngeuerlich. Mit vrkund diß brieffs, geben zu Baden⁵ in Ergouw am pfingstag vor Allerheiligen tag, nach Cristus gepurt druczehenhundert jar, darnach in dem suben vnd achczigesten jare.

Source Fulltext: Chartularium Sangallense X, Nr. 6216, S. 425.