Wir^a) Walther von gottes verhengnúst abt vnd gemainer couent des gotzhus ze sant Johann¹ in Turtal sant Be||nedicten ordens in Costentzer bistum gelegen veriehen vnd tůnt kund allermenglichem mit disem brief, alz die || erwirdigen gaistlichen herren abt Johans von gottes verhengnúst vnd gemainer couent des gotzhus ze Vischinan² || des egenanten ordens in dem obgenanten bistum v´ns vnd v´nsern nachkomen zů v´nsers obgenanten gotzhus handen ze rechtem wehsel vnd in wehsels wis ledklich vnd frilich geben ha^vnt dis nachgeschribnen zwen man Johansen Gupfer von Sirnach³ vnd Wernlin Hůber genant Saylin von Kilchberg⁴, die ires gotzhus recht aigen warent, alz dis alles der brief wol wiset, den wir von inan dar vmb inne ha^vnt, daz wir mit gůter vorbetrahtung vnd beschaidenhait mit gemainem ainhelligem ra^vt v´nsers capitels den vorgenanten abt Johansen vnd gemainem couent des gotzhuses ze Vischinan vnd allen iren nachkomen vnd och demselben irem gotzhus vmb die obgeschribnen zwen man ze ainem rechten redlichen iemerwerenden wehsel vnd in rechtes wehsels wis ledklich vnd frilich vnd och luterlich geben haben vnd gent inan och redlich vnd recht mit disem brief fúr v´ns vnd fúr alle v´nser nachkomen dis nachgeschribnen zwen man Johansen Liebhart den sailer vnd Hainrich Singer von Sirnach mit lib vnd mit gůt vnd mit allen rechten vnd zůgeho^erden, die v´nsers obgenanten gotzhus recht aigen warent, vnd haben inan och dieselben zwen man mit aller zůgeho^erd vffgeben vnd zů iren vnd ires gotzhus handen braht vnd geuertgot vnd si dero in nutzlich gewer gesetzt, alz recht sitt vnd gewonlich was vnd also daz sú die selben lút mit aller zůgeho^erd nu hinnan hin inne haben vnd fúr recht aigen nutzen sont alz ander ires gotzhus aigen lút, a^vn geua^erd. Vnd haben v´ns och hierúber gegen inan verzigen vnd verzihent v´ns redlich vnd recht mit disem brief fúr v´ns vnd fúr alle v´nser nachkommen vnd och fúr daz obgenant v´nser gotzhus an den egenanten zwain mannen mit lib vnd gůt vnd mit aller zůgeho^erd aller aigenschaft aller manschaft aller gewer aller kuntschaft aller zúgnúst lút vnd brief alles erbs aller va^ell vnd gela^ess aller dienst aller rechtung aller vordrung vnd ansprach alles rechten alles fúrzugs vnd vsszugs vnd aller andren sachen vnd geua^erden, dar mit wir die selben lút mit aller zůgeho^erd iemer angesprechen ald dar mit wir wider disen wehsel ald wider disen brief in dehain wis iemer kúnden ald mo^ehten getůn ald schaffen geta^vn mit worten ald mit werken vngeuarlich. Wir haben och gelobt vnd lobent vesteklich mit disem brief fúr v´ns vnd fúr alle v´nser nachkomen, des vorgeschribnen wehsels vnd der egenanten lút der vorgenanten abt Johansen vnd gemaines couents vnd ir nachkomen vnd des gotzhus ze Vischinan gen allermenglichem recht wern ze sint nach dem rechten, wenn wa ald wie dik si ald die obgenanten lút des bedurfent ald dar vmb mit dem rechten vfgetriben ald angesprochen werdent, a^vn geua^erd. Vnd des alles ze offem vrkúnd der warhait so haben wir obgenanten abt Walther vnd gemainer couent des gotzhus ze sant Johann v´nsrú insigel offenlich gehenkt an disen brief. Der geben ist in v´nserm ietzgenanten gotzhus an dem ersten tag in dem aperellen, do man zalt von Cristus gebúrt drúzehenhundert vnd ahtzig jar, dar nach in dem ahtenden jar.

Source Fulltext: Chartularium Sangallense X, Nr. 6258, S. 493-494.