Allen^a) den, die disen brief ansehent lesent oder ho^erent lesen, kúnden wir Johans Midensun || vnd Margaretha sin swester Johansen Midensuns sa^elgen des metzgers elichi kint burger || ze sant Gallen vnd veriehent offenlich mit disem brief fúr v´ns vnd alle v´nser erben von || der zwai vnd fúnfzig phunt phenning Costentzzer múnse wegen, die v´ns der burgermaister der rât vnd die burger gemainlich ze sant Gallen schuldig sint, dez selben geltz mir obgenanten Johansen Midensun nút me gezúht denn ains vnd zwainzig phunt phenning vnd mir obgenanten Margarethen ains vnd drissig phunt phenning, da veriehent wir baidú mit disem brief, daz v´ns der obgenant burgermaister der rât vnd die burger gemainlich ze sant Gallen an den vorgeschribenen zwai vnd fúnfzig phunt phenningen ahtzehen phunt phenning der vorgeschribenen múnse gantzlich gewert vnd bezalt hant, vnd darumb so lassen vnd sagen wir baidú fúr v´ns vnd v´nser erben die vorgedahten den burgermaister den rât vnd die burger gemainlich ze sant Gallen vnd alle iro erben vnd nachkomen vmb die vorgedahten ahtzehen phunt phenning gantzlich vnd gar quitt ledig vnd los mit vrkúnd diz brieues. Vnd ze vrkúnd der warhait aller der vorgeschribenen dinge vnd vergiht so haben wir erbetten den beschaidenn Hugen Hofakrer o^vch burger ze sant Gallen, daz er sin insigel fúr v´ns vnd alle v´nser erben offenlich gehenkt hat an disen brief, won wir aigener insigel niht habent, vnder dez selben insigel wir v´ns o^vch willeklich verbunden habent, dez o^vch ich obgenanter Hugo Hofakrer offenlich vergich mit disem brief, mir vnd allen minen erben vnscha^edlich. Dirre brief ward geben ze sant Gallen an der na^ehsten mitwuchen nach sant Ambrosien tag in dem jâr, do man zalt von Cristus gebúrt drúzehenhundert jâr, ahtzig jâr vnd darnach in dem ahtenden jâre.

Source Fulltext: Chartularium Sangallense X, Nr. 6265, S. 504.