Wir^a) Cůn von gottes gnaden abt des gotzhus ze sant Gallen¹, dz a^vn alles mittel zů geho^ert dem stůl ze Ro^vm, veriehen vnd || tůnd kund mit disem brief, das fúr vns kam an dem tag, als dirre brief geben ist, ze Wil² in vnser statt der veste Eberha||rt von Sax³ der elter vnd sprach, das wingarten sint gelegen ze Rebstain⁴ im Rintal mit lút vnd gu^etern, die darzů geho^errent, || die er ko^vfft hab von herr Eglolfen von Roschach⁵ ritter, vnd von dem halbritter von A^emptz⁶ der hof ze Gerswendi⁷, lút vnd gu^eter ze Wintersperg⁸ vnd ander lút vnd gu^eter, die zů der vesti Sax geho^errent, wie die genempt oder gehaissen sigint ald wa si gelegen sint, sin reht lehen sigint von v´ns vnd vnserm vorgeschribnen gotzhus ze sant Gallen, die selben wingarten lút vnd o^vch gu^eter, vsgenomen ainen wingarten, den man nempt Englabers⁹ wingarten, der sin lipding wa^er von vnserm gotzhus ze sant Gallen, er in rehtz gema^echt wis fu^egen vnd machen wo^elt sinem lieben vettern Eberharten von Sax V^olrichs von Sax¹⁰ sa^eligen elichen sun mit der beschaidenhait vnd gedingde, bescha^eh das der selb Eberhart von Sax der elter von todes wegen abgieng vnd elichi kind liessi, die sin liberben wa^erint, dz denn dis gma^eht den selben liberben an disen vorgenempten wingarten lút vnd gu^etern kainen schaden nút bringen sol in dehainen weg, vnd batt v´ns do der selb Eberhart von Sax der elter, das wir im des gundin vnd vnsern willen darzů ga^ebint. Darvmb erhortont wir do sin bett vnd habent in der ga^entzlich geêrot, vnd fůgt vnd machot do ze stett der selb Eberhart von Sax der elter sinem lieben vetter Eberharten von Sax V^olrichs sa^eligen von Sax elichen sun die vorgeschribnen wingarten lút vnd gu^eter, vsgenomen den wingarten als vorgeschriben stat, ze ainem rehten redlichen gema^eht vnd in rehtz gema^ehtz wis, doch also mit so^elicher beschaidenhaitt vnd gedingde, bescha^eh dz der selb Eberhart von Sax der elter von todes wegen abgieng vnd elichi kind liessi, die sin liberben wa^erint, dz denn dis gema^eht den selben lib erben an disen vorgenempten wingarten lút vnd gu^etern kainen schaden nút bringen sol in dehainen weg. Vnd ist diz beschehen vnd vollfu^ert reht vnd redlich nah vnsers gotzhus gewonhait vnd reht, als es krafft vnd maht haben sol vnd mag ietz vnd hie nah. Vnd des hierv´ber ze offnem vrkund haben wir abt Cůn da obgenant vnser insigel offenlich gehenkt an disen brief. Darnach vergich ich Eberhart von Sax der elter, das alles das war ist, dz der ho^vhwirdig fúrst Cůn von gottes gnaden abt des gotzhus ze sant Gallen min gna^ediger herre von des obgeschribnen lipdinges wegen vnd des wingarten wegen, den man nempt Englaberg, der min lipding ist von dem vorgenempten gotzhus, von mir an disem brief veriehen vnd verschriben hat. Vnd ze noch merer sicherhait derselben dinge han ich o^vch min aigen insigel offenlich gehenkt an disen brief. Der geben ist an dem na^ehsten zinstag vor sant Georien tag in dem jar, do man zalt von Cristi gebúrt drúzehenhundert ahtzig vnd aht jar.

Source Fulltext: Chartularium Sangallense X, Nr. 6267, S. 507-508.