Allen^a) den, die disen brief ansehend lesend oder ho^errend lesen, kúnd ich Elsbetha von Lindenberg¹ klosterfro^vw ze Ta^ennicon² sant Bern||harts orden gelegen in Costentzer bystum vnd vergich offenlich mit disem brief, dz ich by gesuntem lib wolbedacht nach rât vnd || von ordnung vnd heissens wegen Albrechten von Lindenberg³ sa^eligen mines elichen brůders vnd mit gůtem willen vnd gunst aller || miner obern v´nsers geistlichen herren vnd vatter des abtes ze Kappel⁴ vnd o^vch v´nser vnd v´nsers gotzhus ze Tennicon a^ebtischinen fro Elsbethen Ru^edlingerinen⁵ vnd des couentes gemeinlich des ietzgeschribnen klosters geordnet besetzet vnd besta^etgot han des iars vnd tages, als dirr brief geben ist, das wenn ich von todes wegen enbin, dz denn ein a^ebtischin des egenanten klosters, wer die ie denn ist, mit râtt willen vnd gunst des egeschribnen couentes gemeinlich zwo erber fúrsichtig fro^vwen vnder in in dem couent setzen vnd erwellen sond vnd dien getrúlich enpha^elhen alles das ligend gůt, dz ich nach minem tode lan, dz ich von dem egenanten Albrechten minem brůder geerbet han, wie das genant si, die selben fro^vwen o^vch fúrsichtenklich vnd getrúlich versorgen vnd vsrichten sond dis nachgeschriben sachen vngeuârlich, des ersten dz das liecht, daz da hanget vor dem kelr, alle nacht ewenklich ze bett zit an gezúndet werd vnd dz ez brúnn, vntz das des gotzhus tôr o^elli beschlozzen werdent. Sú sond o^vch ewenklich ia^erlich zů ie der fro^vnfasten vsrichten vnd ga^eben drig mut kernen vnd sond die verko^vfen, so sú best mugend, vnd sond denn vor vs von dem gelt einr kustrinen, wer die ie denn ist, von ie der frowen ein Costentzer oder zwen haller ga^eben, vnd die sol denn dz opher vsrichten, vnd was denn v´briges ist, das sond sú teillen vnder die fro^vwen gelichlich vnd gemeinlich, vnd wer der pri^ester ist, der das iartzit begat vnd ma^ess des tages singt, dem sond sú och alz vil geben alz einr fro^vwen. Item sú sond o^vch vsrichten vnd versorgen, dz die acht iartzit, die min vnd miner vordem sind, alz das iartzit bůch wol wîset, von den fro^vwen ia^erlich begangen werden mit ma^essen mit vigilyen mit placebo vnd mit andren dingen als andrú iartzit vnd sond zů ie dem iartzit geben ein mut kernen vnd den teillen vnder die fro^vwen, die denn ze mâl in dem couênt sind. Vnd wer, das die gu^etter, die ich lan, alz vil nút gelten mo^echtin, so sol des ersten an dien iartzitten ab gan, wer aber, dz v´t v´brig da wer nach der ordnung vnd vsrichtung, dz sond sú bewenden, woran die fro^vwen gemeinlich wend vnd ynen aller kummlichost ist, vnd sond dz denn teilen vnder die fro^vwen gemeinlich, wer aber, dz die selben gu^etter einz oder mêr ein a^ebtischin oder der couent oder ieman von iro wegen in deheinen wa^eg anders verko^vfen versetzen oder verkúnberen wo^eltin, ez wer denn ob ynen ein gůt nút gelegen oder vnnútz wer, dz mugend sú wol verwechslen oder verko^vfen, also dz sú dz gůt anderswar wider an ligend gůt bewenden sond, dz sú denn gůt dunkt, vnd dz das selb gut denn hin wider geho^erri, als vorgeschriben ist, so sond sú o^elli gantzlich vnd gar mit aller zů geho^ert ledenklich gefallen sin an dz gotzhus ze Kappel. Wir Elsbetha Ru^edlingerin ze den ziten a^ebtischin vnd der couent gemeinlich ze Ta^enicon vergehen o^vch aller vorgeschribner ding vnd geding mit vrkúnd diss briefs vnd verbinden v´ns o^vch aller vorgeschribner sach vnder disen brief fúr v´ns vnd v´nser nachkomen ewenklich. Vnd des ze mêrer sicherheit vnd warer vrkúnd so henk ich egenanti a^ebtischin min eigen ynsigel vnd wir der couent v´nsers couentes eigen ynsigel an disen brief, der geben ist ze Ta^ennicon nach gotz gebúrt drúzehen hundert vnd achzig iar vnd dar nach in dem achtenden iar, an dem nechsten mentag vor v´nser fro^vwen tag ze der liechmisse.

Source Fulltext: Chartularium Sangallense X, Nr. 6241, S. 465-466.