Burkardus dei et apostolice sedis gracia episcopus Constanciensis¹ dilectis nobis in Christo abbati et conventui monasterii sancti Galli² ordinis sancti Benedicti nostre Constanciensis dyocesis sedi apostolice inmediate subiecti et omnibus presentes litteras inspecturis salutem in domino sempiternam et presentibus dare fidem. Vestre dilectorum in Christo abbatis et conventus monasterii sancti Galli predicti devocionis sinceritas divinis laudibus sub religionis observancia dedicata, quam ad bonum propositum et vere religionis observanciam geritis, promeretur, ut vos illis favore auxilio et gracia prosequamur, per quem, quod et quam vestris et monasterii vestri necessitatibus valeatis providere. Sane petitio pro parte vestra nobis nuper exhibita continebat, quod monasterium vestrum, in quo regularis viget observancia, tum propter ignis voraginem dudum sine culpa vestra factam, tum propter malas et varias oppressiones laycorum, tum propter guerras et mortalitatum pestes, tum eciam propter sterilitatem terrarum et possessionum eiusdem monasterii et alias calamitates varias, que partes illas sepius afflixerunt, multorum debitorum est oneribus pregravatum et quasi in collapsum deductum, sic quod redditus et proventus ipsius monasterii nedum quod ad huiusmodi debita persolvenda sufficiant, ymmo solum ad sustentacionem eiusdem monasterii congruam et ad observanciam hospitalitatis, que ibidem liberaliter ac laudabiliter exhiberi consuevit et exhibetur, et alia onera supportanda minime sufficere dinoscuntur, quare nobis humiliter supplicastis, ut providere vobis super premissis de oportuno remedio dignaremur. Nos igitur predicto vestro monasterio pio conpatientes affectu et attendentes, nobis ex debito pastoralis officii incumbere, super hoc prout possumus providere, super hiis omnibus et singulis cum dilectis nobis in Christo capitulo nostre ecclesie Constanciensis et intra nos tractatum habuimus diligentem, et quia invenimus, quod redditus et proventus ipsius vestri monasterii, ut predicicitur^a), adeo diminuti existunt, quod nedum ad solvendum predicta debita sufficere dinoscuntur, ymmo solum ad sustentacionem ipsius vestri monasterii congruam et ad observanciam hospitalitatis, que ibidem liberaliter ac laudabiliter exhiberi consuevit et exhibetur, et alia onera incumbencia supportanda minime sufficiunt, parrochialem ecclesiam in Wasserburg³ dicte nostre Constanciensis dyocesis de patronatu vestro et dicti monasterii vestri existentem cum suis filiabus videlicet ecclesiis seu capellis dependentibus ab eadem vobis abbati et conventui et vestro monasterio predicto pro vestris necessitatibus relevandis et supportandis de consilio et assensu capituli nostre Constanciensis ecclesie predicti ad laudem dei et sanctorum eius servatis servandis applicavimus annexuimus incorporavimus et univimus et hiis in scriptis in dei nomine in perpetuum applicamus annectimus incorporamus et unimus, ita quod cedente vel decedente ipsius ecclesie rectore vel ipsa ecclesia alias quovismodo vacante liceat vobis et successoribus vestris, possessionem ipsius ecclesia ac iurium et pertinentiarum eiusdem auctoritate propria apprehendere et eciam retinere, nostra licencia seu successorum nostrorum aut alterius cuiuscumque minime requisita, reservata tamen congrua porcione pro perpetuo vicario in ipsa ecclesia instituendo, de qua possit comode sustentari episcopalia iura solvere et alia ei incumbencia onera supportare, salvis eciam nobis ecclesie nostre Constanciensi successoribus nostris et archidyacono loci universis iuribus episcopalibus et archidyaconalibus hactenus debitis et consuetis. In quorum omnium et singulorum fidem et testimonium presentes litteras fieri et nostri sigilli episcopalis fecimus appensione muniri. Et nos capitulum predicti omnia et singula premissa ratificamus approbamus ac ita facta esse recognoscimus, et ad maiorem omnium firmitatem sigillum nostrum presentibus duximus appendendum. Datum et actum in ecclesia Constanciensi anno domini millesimo trecentesimo octugesimo^a) octavo, VI idus augusti, indictione undecima.

Source Fulltext: Chartularium Sangallense X, Nr. 6281, S. 525-526.