Nos Heinricus dei et appostolice sedis gracia eppiscopus Ternopilensis¹ reverendi in Christo patris et domini domini Burcardi eadem gracia electi et confirmati eppiscopi Const(anciensis)² vicarius in pontificalibus generalis ad infra scripta ipsius domini eppiscopi ordinaria auctoritate suffulti subscriptorum noticiam cum salute. Noverint igitur universi sancte matris ecclesie filii presentes litteras inspecturi, quod sub anno domini M°CCC° octuagesimo octavo ipso die beati Othmari abbatis indicione undecima consecravimus partem cimiterium^a) ecclesie sancti Magni confessoris extra muros oppidi sancti Galli³ dicte Const(anciensis) dyocesis, quia ipsum cimiterium erat amplificatum, et ex tunc diem dedicacionis utriusque ecclesie predicti sancti Magni et ecclesie in Bernhardizella⁴, que diebus feriatis et minus debite celebrabantur, ex certa causa commutavimus et transtulimus in hiis scriptis, ita quod prefate ecclesie sancti Magni dedicacio in dominica proxima post festum ipsius sancti Magni, ecclesie vero in Bernhardizella dedicacio in dominica, qua in dei ecclesia officium Misericordia domini cantatur, singulis annis perpetue celebrentur. Ut igitur prefate ecclesie congruis honoribus et dignis laudibus eo frequentius venerentur, omnibus Christiani no(minis) professoribus sexus utriusque vere penitentibus contritis et confessis, qui easdem ecclesias in diebus dedicacionum ecclesiarum supradictis et in festivitatibus patronorum eorundem nec non in subscriptis festivitatibus nativitatis videlicet epiphanie resurrectionis ascensionis pentecostes et corporis Christi in omnibus festivitatibus beate Marie virginis et beatorum Petri et Pauli et omnium aliorum appostolorum et ewagelistarum Johannis Baptiste et infra eorundem festivitatum octavas in cena domini et sequentibus duobus diebus in festivitatibus quoque sanctorum Georii, Laurencii, Vincencii, Vrbani martirum, quatuor doctorum, Nicolai, Martini, Cůnradi, Galli et Otmari confessorum, Marie Magdalene, Cecilie, Agnetis, Agathe, Lucie, Katherine, Barbare, Dorothee, Margarete et Vrsule virginis, Michaelis, omnium sanetorum et in conmemoracione omnium animarum in utraque festivitate sancte crucis atque in omnibus dominicis diebus devote visitaverint veniam petituri terque oracionem dominicam cum tottidem Ave Maria flexis genibus devote dixerint seu alias pro fabrica earundem ecclesiarum ac conparacionem lumin(um) librorum calicum et aliorum ornamentorum ecclesiasticorum suas largiti fuerint elemosinas et manus porrexerint adiutrices, quodque qui genu flexerint et ter angelicam dixerint salutaciones serotina pulsacione cuicumque associaverint corpus Christi vel sacramenta oleum, cum ad infirmos portatur, quocienscumque verbum dei audierint, quod in dictis ecclesiis seminatum fuerit predicando aut qui aliud de premisis devote fecerint, de omnipotentis dei gracia et beatorum Petri et Pauli appostolorum eius meritis et auctoritate confisi quadraginta dies criminalium et unum annum venialium et karenam de iniunetis eis peniteneiis pro qualibet vice misericorditer in domino relaxamus. In quorum premisorum omnium evidens testimonium atque robor sigillum nostrum pontificale presentibus est appensum. Datum et actum anno die et indicione quilibet^b) supra.

Source Fulltext: Chartularium Sangallense X, Nr. 6290, S. 535.