Wir Albreht Blarrer, Chůnrat in der Búnd genant Rúll, Chůnrat Egli, V^olrich Wu^est vnd Růdolf am Veld burger ze Costentz tu^egin kunt aller menglich mit disem brief, daz wir von ordenung vnd haissens wegen dez grossen ra^vts ze Costentz die vordrung ansprach sto^esse vnd misshellung, die zwúschend den ersamen gaistlichen inget^a) der priorinen vnd dem conuent dez gotzhus ze Magnow¹ vnd dem ersamen hern Johansen La^ebin kircheren ze Jonswile² vntz vff disen húttigen tag, als dirre brief geben, vffgeloffen warend, nach baider tail kuntschaft rede vnd widerrede verho^ert haben, vnd do wir die also verhorten, do kamend si ze bayder site der selben vordrung ansprach sto^ess vnd misshellung willeclich vff v´ns, also was wir v´ns all gemainlich oder der merteil vnder v´ns darumb vnder vns erkanden vnd vssspra^echen, da by weltin si gern vnd willeclich beliben vnd daz sta^et halten, vnd darumb haben wir v´ns alle fúnf gemainlich vnd ainhelleclich erkent vnd vssgesprochen, als hienach geschriben statt, dez ersten daz die vorgedahten vordrung ansprach sto^ess vnd misshellung vnd brief, die si wider enander erworben hattend vnd die sy dem beschaiden Chůnr. Sachsen stattschriber ze Costentz in antwúrten vnd geben sond, gentzlich tod vnd kraftlos sin súllend, sy súllend ouch nu hinnenthin gen enander vnd besunder der, die zů den selben sach haft gewesen sind, gůt frúnd haissen vnd sin vnd die sach niemer gerechen noch a^eferen mit dehainem gericht gaistlichem vnd weltlichem noch mit dehainen andern sachen in dehain wise, den^b) vorgenant her Johansen La^ebin sol ouch den obgenanten priorinen vnd conuent fúr all vordrung vnd ansprach rihten vnd geben drissig Vngerscher guldin gůt an gold vnd volleswa^erer an gewiht vntz vff den nehsten sant Thomas tag dez hailgen zwelfbotten, der schierest kompt, a^vn allen fúrzúg vnd widerrede, doch also dz sy inen^b) gunst vnd willen darzů geben súllend, daz der selb her Hans von den ba^ennen, die von ir wegen wider in geben vnd geloffen warend, geschlossen vnd gelediget werde. Die obgenante priorin ha^vt an ir selbs statt vnd in namen dez vorbenempten conuents gelobt mit ir trúw an ains geswornen aydes statt, vnd der vorgenant her Hans La^eby ha^vt gesworn ainen gelerten aid zů den hailgen, die vorgeschriben stuck pucten^b) vnd artikel war vnd sta^et ze halten ze laisten vnd ze vollfu^eren vnd dawider niemer ze tu^end in dehain wise a^vn all geuerd. Wa^er aber, daz deweder tail daz also nit sta^et hielt noch vollfůrty, wie sich daz gefu^egty, der sol dem andern tail darumb ze rechter bůss vnd pene verfallen sin hundert guldin, die er im ouch denn vnuerzogenlich richten vnd geben sol, vnd sol o^vch denn von dirre sach gentzlich sta^vn vnd fúrbazz dehain recht me darzů gewinnen noch haben in dehain wise. Acta anno domini millesimo CCC^mo LXXX^mo VIII°, dies sabati ante festum omnium sanctorum.

Source Fulltext: Chartularium Sangallense X, Nr. 6286, S. 529-530.